យោងតាមតុល្យការចុងក្រោយចេញផ្សាយកាលពីថ្ងៃទី១៩ វិច្ឆិកា ដោយអង្គការសុខភាពពិភពលោក WHO ថា ការឆ្លងរាលដាលនៃជំងឺអេបូឡា បណ្តាលឱ្យមនុស្សស្លាប់៥.៤២០នាក់ហើយ ចាប់តាំងពីខែមីនា មក ក្នុងចំណោមអ្នកឆ្លងជំងឺនោះសរុប១៥.១៤៥នាក់ ។
WHO ធ្វើការកត់សម្គាល់ថា ការឆ្លងរាលដាលនៃវីរុសអេបូឡា នៅតែខ្លាំងក្លាពិសេសនៅប្រទេសសេរ៉ាឡេអូន ជាប្រទេសមួយក្នុងចំណោមប្រទេសអាហ្វ្រិកខាងលិច៣ ដែលរងការប៉ះពាល់ខ្លាំងជាងគេ ។ WHO បញ្ជាក់ក្នុងសប្តាហ៍គិតចាប់ពីថ្ងៃទី១០ វិច្ឆិកា មកថា មានអ្នកឆ្លងវីរុសថ្មីដល់៥៣៣នាក់ នៅសេរ៉ាឡេអូន ពិសេសនៅភាគខាងលិច និងភាគខាងជើងប្រទេសនោះ ។ ក្នុងចំណោមអ្នកឆ្លងវីរុស៧៣២នាក់ ក្នុងដំណាក់កាលនោះ ជាង៧០%គឺនៅប្រទេសសេរ៉ាឡេអូនតែមួយគត់ ។
តាំងពីចាប់ផ្តើមមានការឆ្លងរាលដាលពីខែមីនា មក ប្រទេសសេរ៉ាឡេអូន លីបេរីយ៉ា និងហ្គីណេ ជាប្រទេស៣ រងការប៉ះពាល់ខ្លាំងជាងគេដោយសារវីរុស ។ ប្រទេសម៉ាលី និងនីហ្សេរីយ៉ា ក៏រាយការណ៍ថា មានអ្នកឆ្លងវីរុសអេបូឡាដែរ ។ នៅប្រទេសម៉ាលី ជាប្រទេសទី៦ នៅអាហ្វ្រិករងការប៉ះពាល់ដោយជំងឺនោះ អាជ្ញាធរជំរឿនឃើញអ្នកឆ្លង៦នាក់ ក្នុងនោះស្លាប់៥នាក់ ៕
ចែករំលែកព័តមាននេះ