រដ្ឋាភិបាលកូរ៉េខាងត្បូងប្រមូលប្រជាជន និងទាហានរាប់សែននាក់ បើកយុទ្ធនាការបោសព្រិលនៅតាមផ្លូវដែលគ្របដណ្ដប់កំពស់ជាង២តឹក
ដោយ ៖ សាម៉ន
ថ្ងៃសុក្រ ទី៨ ខែមករា ឆ្នាំ២០១០ ម៉ោង ១២:៣៩
រដ្ឋាភិបាលកូរ៉េខាងត្បូងបានប្រមែប្រមូលមន្ដ្រីរាជការ ប្រជាជន និងកងទ័ព មកសំអាតព្រិលនៅតាមដងផ្លូវនានានៅទូទាំងប្រទេស កាលពីថ្ងៃទី៥ មករា កន្លងមក ខណៈដែលសីតុណ្ហភាពបានធ្លាក់ទៅដល់ចំណុចដក២០អង្សាសេ ។នៅក្នុងទីក្រុងសេអ៊ូលតែមួយ គឺមានមន្ដ្រីរាជការ និងអ្នកស្ម័គ្រចិត្ដប្រហែល៤៨.០០០ នាក់បានចេញមកជួយគ្នាប្រមូលព្រិលនៅតាមដងផ្លូវ ។
ចំណែកក្រសួងការពារប្រទេសបានបង្ហើបឱ្យដឹងថា មានទាហានប្រហែល១៩.០០០នាក់ ត្រូវបានកេណ្ឌឱ្យមកជួយប្រមូលព្រិលនៅទូទាំងប្រទេស និងមានបញ្ជូនឧទ្ធម្ភាគចក្រយោធាចេញទៅចែក ចាយឧបករណ៍ សំលៀកបំពាក់ការពារ និង អាហារដល់ប្រជាជននៅតាមភូមិនៅទីឆ្ងាយផងដែរ ។
ក្រុមឧតុនិយមកូរ៉េខាងត្បូងបានផ្សាយថា ព្រិលបានឈប់ធ្លាក់នៅទីក្រុងសេអ៊ូល និងតំបន់នៅជុំវិញកាលពីយប់ថ្ងៃទី៤ មករា ប៉ុន្ដែនៅតំបន់ឆ្នេរខាងលិចឆៀងខាងត្បូងមានព្រិលធ្លាក់យ៉ាងក្រាស់ដល់ទៅ២១សង្ទីម៉ែត្រ កាលពីល្ងាចថ្ងៃទី៤ ដល់ព្រឹកថ្ងៃទី៥ មករា កន្លងទៅ ។
ក្រុមឧតុនិយមបានបង្ហើបឱ្យដឹងថា ព្រិលដែលមានកំរាស់២៨សង្ទីម៉ែត្រ ក្នុងទីក្រុងសេអ៊ូល កាលពីថ្ងៃទី៤ មករា កន្លងមក គឺជាការធ្លាក់ព្រិលយ៉ាងខ្លាំងក្លាបំផុតចាប់តាំងពីឆ្នាំ១៩៣៧ ដែលកាលណោះសីតុណ្ហភាពក្នុងក្រុងសេអ៊ូលធ្លាក់ដល់ទៅដក១០,៤អង្សាសេ និងដល់ទៅដក២០,៤អង្សាសេក្នុងទីក្រុងសូលវ៉ុង ស្ថិតនៅឆ្ងាយពីរាជធានី (សេអ៊ូល) នៅភាគខាងលិចឆៀងខាងជើងប្រហែល៥៨គីឡូម៉ែត្រ ។
តាមទីភ្នាក់ងារយ៉នហាប់ បានផ្សាយឱ្យដឹងថា បុរសម្នាក់អាយុប្រហែល៥០ឆ្នាំ បានស្លាប់ ដោយសារធ្លាក់ពីលើដំបូលផ្ទះ ខណៈ ពេលឡើងទៅបោសព្រិល និងនៅកណ្ដាលក្រុងឈុងជូ មានមាន់ងាប់ប្រហែល៣.០០០ ក្បាល ព្រោះតែរោងនៃកសិដ្ឋានចិញ្ចឹមមាន់នោះបាក់ ដោយសារតែទទួលទំងន់ព្រិលមិនរួច ។
