លោកឧត្តមសេនីយ៍ប្រាយុទ្ធ ច័ន្ទអូចា នាយករដ្ឋមន្ត្រី និងជាប្រធានក្រុមប្រឹក្សាសន្តិសុខជាតិថៃ បានកំណត់ពេលមកធ្វើទស្សនកិច្ចនៅព្រះរាជាណាចក្រកម្ពុជាជាផ្លូវការនៅថ្ងៃទី៣០ និង៣១ តុលា ។ ក្នុងដំណើរទស្សនកិច្ចនេះ លោកនាយករដ្ឋមន្ត្រី និងគណៈប្រតិភូ នឹងចេញដំណើរពីអាកាសយានដ្ឋានកងទ័ពអាកាស ឆ្ពោះទៅរាជធានីភ្នំពេញ នៅរសៀលថ្ងៃទី៣០ តុលា ដោយមានការទទួលស្វាគមន៍ពីសម្តេចតេជោ ហ៊ុន សែន នៅវិមានសន្តិភាព ។
សម្រាប់ដំណើរទស្សនកិច្ចនេះ នឹងមានការជួបពិភាក្សាជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងចូលរួមជាសាក្សីក្នុងពិធីចុះហត្ថលេខាលើកំណត់ហេតុយោគយល់ចំនួន៣ផងដែរ ។ យោងតាមសេចក្តីជូនព័ត៌មានមុននេះរបស់ក្រសួងការបរទេស និងសហប្រតិបត្តិការអន្តរជាតិឱ្យដឹងថា ក្នុងឱកាសដំណើរទស្សនកិច្ចនេះលោកឧត្តមសេនីយ៍ ប្រាយុទ្ធ ច័ន្ទអូចា នឹងអញ្ជើញគោរពព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ នៅមណ្ឌបព្រះបរមរូប សួនច្បារវិមានឯករាជ្យ ។
បន្ទាប់ពីជំនួបទ្វេភាគី សម្តេចអគ្គមហាសេនាបតីតេជោ ហ៊ុន សែន និងលោកឧត្តមសេនីយ៍ ប្រាយុទ្ធ ច័ន្ទអូចា នឹងធ្វើជាសាក្សីក្នុងពិធីចុះហត្ថលេខាលើឯកសារចំនួន៣ដូចខាងក្រោម៖
១-អនុស្សរណៈនៃការយោគយល់គ្នាស្តីពី កិច្ចសហប្រតិបត្តិការទេសចរណ៍ រវាងរាជរដ្ឋាភិបាលនៃព្រះរាជាណាចក្រកម្ពុជា និងរាជរដ្ឋាភិបាលនៃព្រះរាជាណាចក្រថៃ ។
២-អនុស្សរណៈនៃការយោគយល់គ្នាស្តីពី កិច្ចសហប្រតិបត្តិការទ្វេភាគី ដើម្បីលុបបំបាត់ការជួញដូរមនុស្ស និងជួយដល់ជនរងគ្រោះដោយសារការជួញដូរ រវាងរាជរដ្ឋាភិបាលនៃព្រះរាជាណាចក្រកម្ពុជា និងរាជរដ្ឋាភិបាលនៃព្រះរាជាណាចក្រថៃ ។
៣-អនុស្សរណៈនៃការយោគយល់គ្នាស្តីពី ការតភ្ជាប់ផ្លូវដែក រវាងរាជរដ្ឋាភិបាលនៃព្រះរាជាណាចក្រកម្ពុជា និងរាជរដ្ឋាភិបាលនៃព្រះរាជាណាចក្រថៃ ។ បន្ទាប់ពីពិធីចុះហត្ថលេខា សម្តេចអគ្គមហាសេនាបតីតេជោ ហ៊ុន សែន និងលោកឧត្តមសេនីយ៍ ប្រាយុទ្ធ ច័ន្ទអូចា នឹងធ្វើសន្និសីទកាសែតរួមគ្នា ។ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងរៀបចំពិធីលៀងសាយភោជននៅល្ងាចថ្ងៃទី៣០ តុលា ដើម្បីផ្តល់ជាកិត្តិយសដល់លោកនាយករដ្ឋមន្ត្រីថៃ និងគណៈប្រតិភូ ។
ស្របពេលជាមួយគ្នានេះដែរ លោកជំទាវនរាព័រ ច័ន្ទអូចា ភរិយារបស់លោកនាយករដ្ឋមន្ត្រីថៃ នឹងធ្វើដំណើរទៅចូលរួមបើកមុខវិជ្ជាផ្នែកភាសាថៃ ថ្នាក់បរិញ្ញាបត្រ រួមទាំងប្រគល់សម្ភារសិក្សា និងការបង្រៀនភាសាថៃ នៅសាកលវិទ្យាល័យភូមិន្ទភ្នំពេញ ។
លើសពីនេះ លោកនាយករដ្ឋមន្ត្រីថៃ ក៏មានកំណត់ពេលចូលជួបសម្តែងការគួរសមជាមួយសម្តេចប្រធានរដ្ឋសភានៃព្រះរាជាណាចក្រកម្ពុជាផងដែរ ។ ដោយទ្បែក នៅថ្ងៃទី៣១ តុលា ឆ្នាំ២០១៤ លោកនាយករដ្ឋមន្ត្រីថៃ ចូលគាល់ព្រះមហាក្សត្រ សម្តេចព្រះបរមនាថ នរោត្តម សីហមុនី រួមទាំងទស្សនាព្រះបរមរាជរាំង ព្រះវិហារ ព្រះកែវមរកត និងចូលរួមពិសាភោជនាហារថ្ងៃត្រង់ ជាមួយសមាគមពាណិជ្ជករថៃ នៅព្រះរាជាណាចក្រកម្ពុជា ។ លោកនាយករដ្ឋមន្ត្រីថៃរួមជាមួយគណៈប្រតិភូ នឹងចាកចេញពីអាកាសយានដ្ឋានអន្តរជាតិភ្នំពេញ ឆ្ពោះទៅអាកាសយានដ្ឋានទ័ពអាកាសថៃនៅរសៀលថ្ងៃទី៣១ តុលា ៕
ចែករំលែកព័តមាននេះ