មន្ទីរពេទ្យដែលព្យាបាលបណ្តាអ្នករបួសដោយសារការបាញ់ប្រហារមួយដែលបណ្តាលឱ្យមនុស្សស្លាប់២នាក់ ក្នុងនោះមានខ្មាន់កាំភ្លើងផង កាលពីថ្ងៃទី២៤ តុលា កន្លងមកនេះ ក្នុងវិទ្យាល័យមួយជិតទីក្រុង SEATTLE អាមេរិក កាលពីថ្ងៃទី២៥ តុលា បានសម្តែងពីការព្រួយបារម្ភខ្លាំងចំពោះការជួយសង្គ្រោះសិស្ស២នាក់ដែលស្ថិតក្នុងស្ថានភាពដុនដាបបំផុត ព្រោះតែត្រូវគ្រាប់កាំភ្លើងចំក្បាលដូចគ្នា ។
យោងតាមលោក JOANNE ROBERTS គ្រូពេទ្យនៃមន្ទីរពេទ្យ PROVIDENCE REGIONAL MEDICAL CENTER ស្ថិតនៅចម្ងាយ៥០គ.មពីក្រុង SEATTLE ជាកន្លែងទទួលសង្គ្រោះសិស្សស្រី២នាក់ ដែលត្រូវគ្រាប់កាំភ្លើងចំក្បាលដូចគ្នា និយាយថាពួកគេកំពុងស្ថិតក្នុងស្ថានភាពរស់ក៏ដូចស្លាប់ ។ ពួកគេទទួលការវះកាត់ ហើយយើងចាំមើលស្ថានភាពរបស់ពួកគេ៣ថ្ងៃ ។
ចំណែកសិស្សវិទ្យាល័យម្នាក់ទៀត ដែលទទួលការព្យាបាលនៅមន្ទីរពេទ្យមួយទៀត ត្រូវគ្រាប់កាំភ្លើងត្រង់ក្បាលដែរ ក៏ស្ថិតក្នុងស្ថានភាពធ្ងន់ធ្ងរ ។ ចំណែកអ្នករបួសទី៤ត្រូវគ្រាប់ត្រង់ថ្គាម ក៏មានស្ថានភាពដុនដាប ។ អ្នករបួសទាំងពីរនាក់នេះ ត្រូវជាបងប្អូនជីដូនមួយរបស់ខ្មាន់កាំភ្លើង ។
កាលពីថ្ងៃទី២៤ តុលា ពេលម៉ោងសម្រាកទទួលទានអាហារថ្ងៃត្រង់ សិស្សម្នាក់ឈ្មោះ JAYLEN RAY PRYBERG បានចូលទៅកាន់កន្លែងស្រស់ស្រូបអាហារ នៃវិទ្យាល័យ MARYSVILLE PILCHYCK ហើយបានយកកាំភ្លើងដែលគេលួចយកពីឪពុករបស់គេបាញ់ប្រហារនៅទីនោះ ។ យោងតាមទូរទស្សន៍ CNN ថា ការបាញ់ប្រហារនេះ សម្លាប់សិស្សស្រីម្នាក់ ហើយសិស្សច្រើននាក់ទៀតត្រូវរបួស មុនពេលខ្មាន់កាំភ្លើងបាញ់សម្លាប់ខ្លួនឯង ។
មូលហេតុនៃការបាញ់ប្រហារនេះ នៅពុំទាន់ដឹងច្បាស់នៅឡើយ ក៏ប៉ុន្តែមុនពេលធ្វើសកម្មភាពខ្មាន់កាំភ្លើងរូបនេះបានបង្ហោះសារគួរឱ្យបារម្ភជាច្រើនតាម TWITTER ដោយក្នុងសារទាំងនោះគេយល់ថា រូបគេមានទម្លាប់លេងកាំភ្លើងរួច ដោយសារស្នេហាខកចិត្តដែលអាចជាប្រភពនៃការបាញ់ប្រហារនោះ ។ ក្នុងសារតាម TWITTER ចុងក្រោយកាលពីថ្ងៃទី២៣ តុលា យុវជននោះសរសេរថា «រឿងនោះនឹងមិនអាចរង់ចាំយូរទៀតទេ» ។ រួចកាលពីខែសីហា រូបគេបានធ្វើការគំរាមកំហែងប្រឆាំងអ្នកដែលជាគូប្រជែងស្នេហារបស់ខ្លួន ។ រូបគេសរសេរសារថា «អ្នកផងនឹងឃើញពីអ្វីដែលនឹងកើតឡើង»។ ប៉ូលិសនៅពុំទាន់ធ្វើអត្ថាធិប្បាយពីព័ត៌មានទាំងនោះនៅឡើយ ។
ខ្មាន់កាំភ្លើងយុវជន JAYLEN BAY FRYBERG ត្រូវបានគេចាត់ទុកថា ជាមនុស្សរួសរាយរាក់ទាក់ និងមានប្រជាប្រិយទៀតផង ពិសេសរូបគេជាតារាមួយក្នុងក្រុមបាល់ទាត់របស់សាលាវិទ្យាល័យ ដែលមានសិស្ស២៥០០នាក់នោះ ៕
ចែករំលែកព័តមាននេះ