ទីបញ្ជាការកណ្តាលកងទ័ពអាមេរិក ប្រកាសថាសហរដ្ឋអាមេរិក និងសម្ព័ន្ធមិត្តនៃក្រុមចម្រុះអន្តរជាតិ កាលពីថ្ងៃទី២៤ និង២៥ តុលា បានធ្វើការវាយប្រហារតាមអាកាស២២លើកនៅអីុរ៉ាក់ ប្រឆាំងក្រុមរដ្ឋអ៊ិស្លាម ។
ការវាយប្រហារទាំងនោះសំដៅជាពិសេសលើបណ្តាតំបន់ ស្ថិតនៅជិតទំនប់ទឹកនៃទីក្រុងម៉ូសស៊ុល ព្រមទាំងនៅទីក្រុងហ្វាល់លូចា និងក្រុងបាអីុដហ្ស៊ី ដែលមានរោងចក្រចម្រាញ់ប្រេងកាតមួយ ។ ការវាយប្រហារទាំងនោះត្រូវចំបណ្តាកងឯកភាពរបស់ក្រុមរដ្ឋអ៊ិស្លាម អគារសំខាន់ៗមួយចំនួន បណ្តារថយន្ត និងបណ្តាទីតាំង ដែលេមានការប្រយុទ្ធគ្នា ។ បណ្តាយន្តហោះទម្លាក់គ្រាប់បែក យន្តហោះប្រដេញ និងយន្តហោះគ្មានមនុស្សបើកត្រូវបានប្រើប្រាស់ក្នុងការវាយប្រហារទាំងនោះដោយយន្តហោះទាំងអស់អាចវិលមកកាន់មូលដ្ឋានរបស់ខ្លួនវិញ ។
សេនាធិការយោធាបារាំងគូសបញ្ជាក់ថា កងយន្តហោះបារាំងបានចូលរួមក្នុងការវាយប្រហារតាមអាកាសជាមួយក្រុមចម្រុះនៅក្បែរជាយក្រុងមូ៉សស៊ុល ភាគខាងជើងអីុរ៉ាក់ ។
ក្នុងសេចក្តីប្រកាសមួយ សេនាធិការយោធាបារាំងគូសបញ្ជាក់ថា ប្រតិបត្តិការនេះសំដៅកម្ទេចជំរំយោធាមួយកន្លែងដែលប្រើប្រាស់ដោយអង្គការរដ្ឋអ៊ិស្លាម ដើម្បីព្យាបាលបណ្តាយុទ្ធជនរបស់គេដែលត្រូវរបួស ។ នាវេលាម៉ោង២១ម៉ោងនៅអីុរ៉ាក់ យន្តហោះប្រយុទ្ធធុន RAFALE ២គ្រឿងរបស់បារាំង បានទម្លាក់គ្រាប់បែកកម្ទេចអគារជាច្រើននៃជំរំនោះ ។
ចំណែកប្រភពព័ត៌មានខាងសន្តិសុខអីុរ៉ាក់វិញ គូសបញ្ជាក់ថា កងកម្លាំងសន្តិសុខអីុរា៉ក់ និងពួកយុទ្ធជនឃើតអីុរ៉ាក់ កាលពីថ្ងៃទី២៥ តុលា វាយរំដោះបានទីក្រុង២ ស្ថិតនៅភាគខាងជើង និងភាគកណ្តាលប្រទេស បន្ទាប់ពីការប្រយុទ្ធគ្នាយា៉ងសាហាវជាមួយពួកជីហាដនៃក្រុមរដ្ឋអ៊ិស្លាម ។
លោក HALKURD HIKMAT ប្រមុខផ្នែកសារព័ត៌មានរបស់ពួកយុទ្ធជនឃើតគូសបញ្ជាក់ប្រាប់ក្រុមអ្នកកាសែតថា មុនពេលព្រឹកព្រហាមពួកយុទ្ធជនឃើត ទ្រទ្រង់ដោយបណ្តារថពាសដែក និងកងកាំភ្លើងធំ ព្រមទាំងពីសំណាក់កងយន្តហោះរបស់ក្រុមចម្រុះនាំមុខដោយសហរដ្ឋអាមេរិក បានវាយលុកចូលទីក្រុង ZOUMAR ស្ថិតនៅចម្ងាយប្រមាណជា៧០គ.ម ភាគពាយ័ព្យក្រុងម៉ូសស៊ុល ទីប្រជុំជនខេត្តនីនីវ ហើយបានប៉ះទង្គិចគ្នាយ៉ាងខ្លាំងជាមួយពួកជីហាដ ក្រុមរដ្ឋអ៊ិស្លាម ។ កងកម្លាំងឃើតអាចលុកចូលទីក្រុងនោះ ក្រោយពីដណ្តើមយកបានភូមិ៥នៅជុំវិញក្រុង ។
នៅភាគកណ្តាលអីុរ៉ាក់ កងកម្លាំងសន្តិសុខគាំទ្រដោយពួកជីវពលស៊ីអីុតប្រមាណជា៦០០០នាក់ ព្រមទាំងកងយន្តហោះអីុរ៉ាក់ អាចវាយរំដោះទីក្រុង JOURF AL-SAK ស្ថិតនៅចម្ងាយប្រមាណជា៦០គ.ម ខាងត្បូងក្រុងបាដាដ បន្ទាប់ពីការប្រយុទ្ធគ្នាយ៉ាងសាហាវរយៈពេល៦ម៉ោងជាមួយពួកជីហាដក្រុមរដ្ឋអ៊ិស្លាម ៕
ចែករំលែកព័តមាននេះ