តាមទីភ្នាក់ងារព័ត៌មានចិនស៊ីនហួថា ប្រទេសចិនបានសម្តែងការព្រួយបារម្ភយ៉ាងខ្លាំងចំពោះការដាក់ពង្រាយប្រព័ន្ធប្រឆាំងមីសុីលនៅតំបន់អាស៊ី-ប៉ាសុីហ្វិក ដោយផ្តោតលើសហរដ្ឋអាមេរិក ដែលដំឡើងរ៉ាដា Bande X នៅក្រុងក្យូតូរបស់ជប៉ុន ។ អ្នកនាំពាក្យក្រសួងការបរទេសចិន លោកស្រី Hua Chunying គូសបញ្ជាក់ថា ការដាក់ពង្រាយនោះធ្វើឱ្យប៉ះពាល់ដល់សន្តិភាព និងស្ថិរភាពក្នុងតំបន់ ។
យោងតាមសារព័ត៌មាននានាថា កងទ័ពអាមេរិកបានបញ្ជូនរ៉ាដា Bande X មកកាន់មូលដ្ឋានយោធាក្យូហ្គាមីសាគី ក្រុងក្យូតូ ។ រ៉ាដានេះដែលត្រូវប្រើប្រាស់ សម្រាប់ចាប់ការបាញ់បណ្តាមីសុីលពីសំណាក់កូរ៉េខាងជើង ត្រូវដំណើរការមុនដំណាច់ឆ្នាំនេះ ។
ក្នុងសន្និសីទសារព័ត៌មានមួយលោកស្រី Hua Chunying ថ្លែងថា ប្រទេសមួយចំនួនបានបង្កើនការដាក់ពង្រាយប្រព័ន្ធការពារប្រឆាំងមីសុីលក្នុងតំបន់អាស៊ីប៉ាសុីហ្វិកសម្រាប់ស្វែករកសន្តិសុខជាឯកតោភាគី ដែលពុំសមស្របទៅនឹងស្ថិរភាពតំបន់ ការជឿទុកចិត្តគ្នាទៅវិញទៅមក សន្តិភាព ព្រមទាំងស្ថិរភាពនៅអាស៊ីភាគឦសាន ។ ការដាក់ពង្រាយនោះកាន់តែគួរឱ្យព្រួយបារម្ភថែមទៀត ក្នុងកាលៈទេសៈនៃសភាពការណ៍ស្មុគស្មាញនិងរសើបក្នុងតំបន់ ។ លោកស្រីអំពាវនាវដល់បណ្តាប្រទេសដែលទាក់ទិន ឱ្យធ្វើសកម្មភាពដោយគិតដល់សន្តិភាព និងស្ថិរភាពតំបន់ ៕
ចែករំលែកព័តមាននេះ