មន្ទីរប៉ង់តាហ្គោនថ្លែងកាលពីថ្ងៃទី២១ តុលា ថា សភាពការណ៍នៅទីក្រុងកូបានេ របស់ពួកឃើតស៊ីរីនៅតែផុយស្រួយ ក៏ប៉ុន្តែកងកម្លាំងឃើតនៅត្រួតត្រាមួយភាគធំនៃទីក្រុងនោះ រួចការជួយវាយប្រហារតាមអាកាសរបស់ក្រុមចម្រុះអន្តរជាតិប្រឆាំងក្រុមរដ្ឋអ៊ិស្លាម អាចរារាំងមិនឱ្យទីក្រុងនោះធ្លាក់ក្នុងកណ្តាប់ដៃពួកជីហាដ ។
អ្នកនាំពាក្យមន្ទីរប៉ង់តាហ្គោន ឧត្តមនាវី John Kirby ថ្លែងថា ការគាបសង្កត់ខាងអាកាស និងការគាបសង្កត់នៅលើដីរបស់កងកម្លាំងឃើត រួចចំណែកយ៉ាងធំធេងរារាំងក្រុមរដ្ឋអ៊ិស្លាមដណ្តើមយកទីក្រុងនោះទាំងមូលបាន លោកបន្តថា ទោះយ៉ាងណាសភាពការណ៍ក្នុងក្រុងកូបានេនៅតែផុយស្រួយ ។ យើងយល់ថា កងកម្លាំងឃើតនៅត្រួតត្រាមួយផ្នែកធំនៃទីក្រុងនេះ ។
ម្យ៉ាងវិញទៀត មន្ទីរប៉ង់តាហ្គោននិយាយថា តម្លៃនៃ ការប្រយុទ្ធប្រឆាំងក្រុម IS តាំងពីចាប់ផ្តើមវាយប្រហារតាមអាកាសពីថ្ងៃទី៨ សីហា មក អស់ប្រាក់៤២៤លានដុល្លារហើយ ដោយគិតជាមធ្យម៧,៦លានដុល្លារក្នុង១ថ្ងៃ ។
កងទ័ពអាមេរិកកាលពីថ្ងៃទី២០ និង២១ តុលា បានធ្វើការវាយប្រហារតាមអាកាស៤លើក លើទីតាំងទាំងឡាយរបស់ក្រុមរដ្ឋអ៊ិស្លាមនៅស៊ីរី ហើយមានការវាយប្រហារ៣លើកទៀតជាមួយការជួយទ្រទ្រង់របស់សម្ព័ន្ធមិត្តនៅអុីរ៉ាក់ ។ ចំណែកក្រុមអ្នកសង្កេតការណ៍មួយវិញគូសបញ្ជាក់កាលពីថ្ងៃទី២១ តុលា ថា ពួកយុទ្ធជនក្រុមរដ្ឋអ៊ិស្លាមអាចប្រមូលយកបានអាវុធមួយចំនួនដែលអាមេរិកទម្លាក់តាមយន្តហោះមកឱ្យយុទ្ធជនឃើតនៅទីក្រុងកូបានេ ។ អង្គការសិទ្ធិមនុស្សស៊ីរី OSDH គូសបញ្ជាក់ថា អាវុធមួយចំនួនទម្លាក់ឱ្យពួកយុទ្ធជនឃើត បានធ្លាក់ក្នុងតំបន់ត្រួតត្រារបស់ពួករដ្ឋអ៊ិស្លាមនៅក្បែរទីក្រុងកូបានេ ហើយអាវុធទាំងនោះត្រូវពួកនោះប្រមូលយក ៕
ចែករំលែកព័តមាននេះ