ក្រុមអ្នកស្រាវជ្រាវអាមេរិកបានអះអាងថា បុគ្គលដែលទទួលទានអាហារសម្បូរទៅដោយប្រូតេអុីន (ប្រមាណជា១០២ក្រាមក្នុង១ថ្ងៃ) អាចជួយឱ្យហានិភ័យកើតមានបញ្ហាលើសឈាម ថយចុះដល់ទៅ៤០%ធៀបនឹងអ្នកដែលទទួលទានតិចជាង ពោលគឺត្រឹម៥៨ក្រាមក្នុង១ថ្ងៃ ។ ចំនួននេះ បើគិតទៅជាអាហារពិតប្រាកដណាមួយ គឺអាចស្មើនឹងសាច់៤បន្ទះស្តើង ទ្រូងមាន់៥ដុំ ឬសណ្តែកហោឡាំតាវ១០កំប៉ុង ។
បញ្ហាលើសឈាមត្រូវគេឱ្យឈ្មោះថា ជាឃាតករលាក់មុខ ដ្បិតវាកម្របង្ហាញនូវរោគសញ្ញាច្បាស់លាស់ណាមួយនោះទេ ។ ទោះបីជាយ៉ាងណា ប្រសិនបើគេព្រងើយកន្តើយ មិនព្រមព្យាបាល វាអាចបង្កើនហានិភ័យ គាំងបេះដូង ឬជំងឺដាច់សរសៃឈាមខួរក្បាល ។ការពិសោធរយៈពេល១១ឆ្នាំ លើបុគ្គលមានសុខភាពល្អ១.៣៦១នាក់ បានបង្ហាញថា ប្រូតេអុីនដែលបានមកពីសាច់សត្វ និងរុក្ខជាតិជាប់ពាក់ព័ន្ធនឹងការធ្វើឱ្យថយចុះនូវលេខសន្ទស្សន៍សម្ពាធឈាម ។
Justin Buendia ជំនួយការស្រាវជ្រាវមកពីសាកលវិទ្យាល័យ Boston University សហរដ្ឋអាមេរិកបានថ្លែងថា «ទទួលទានប្រូតេអុីនកាន់តែច្រើនឡើង នោះមានន័យថា យើងមានអារម្មណ៍ឆាប់ឆ្អែតកាន់តែលឿន។ ដូចនេះ ជាលទ្ធផល ប្រសិនជាយើងទទួលទានតិចតួចនូវក្រុមអាហារមានកាឡូរីខ្ពស់ មានន័យថា របបអាហារជាទូទៅរបស់យើងត្រូវបានធ្វើឱ្យល្អប្រសើរឡើងហើយ ។ វាប្រហែលអាចថា បុគ្គលដែលទទួលទានប្រូតេអុីនច្រើនជាទូទៅ គឺសុទ្ធតែមានរបបអាហារដែលផ្តល់អត្ថប្រយោជន៍សុខភាព ។ ជាមួយវត្តមាននៃការប្រើប្រាស់ប្រូតេអុីនច្រើន អស់លោកអ្នកអាចនឹងទទួលទានអាហារមានកាឡូរីច្រើន ក្នុងកម្រិតតិចតួច» ។
អ្នកស្រាវជ្រាវរូបនេះបានបន្តថា ប្រូតេអុីនខ្លួនវាផ្ទាល់អាចមានគុណភាពមួយ ក្នុងការបញ្ចុះសម្ពាធឈាម ដ្បិតវត្តមានអាមីណូអាស៊ីតអាចជួយពង្រីកបណ្តាសរសៃឈាមបន្ថយ ដំណើរលើសដោយប្រសិទ្ធភាព ។ លោកថា Arginine ជាអាមីណូអាស៊ីតមាននៅក្នុងរុក្ខជាតិនិងសាច់សត្វ តួយ៉ាង ស៊ុតបានដើរតួសំខាន់បំផុត ក្នុងការពង្រីកសរសៃឈាម ។ លោកបានបន្ថែមថា «ការទទួលទានស៊ុតមួយគ្រាប់ ឬទឹកដោះគោ ក្នុងអាហារពេលព្រឹក គឺជាវិធីល្អមួួយចាប់ផ្តើមថ្ងៃថ្មី» ។
សូមបញ្ជាក់ថា អាហារដែលជាប្រភពប្រូតេអុីន មានដូចជា សាច់មាន់ (អត់ខ្លាញ់) ្រតីសូម៉ុង និងធូណា ប្រភេទហ្វ្រូម៉ា មានខ្លាញ់ទាប សាច់គោ (គ្មានខ្លាញ់) សាច់ចំឡក (សាច់ជ្រូក) តៅហ៊ូ សណ្តែកសៀង ស៊ុត ទឹកដោះគោ យ៉ាអួ… ។ ដោយឡែក សារធាតុសរសៃ ក៏ត្រូវបានគេរកឃើញថា ផ្តល់អត្ថប្រយោជន៍ចំពោះសុខភាពផងដែរ ។ ទទួលទានរបបអាហារសម្បូរដោយសារធាតុសរសៃ និងប្រូតេអុីន គឺអាចជួយ កាត់បន្ថយហានិភ័យលើសឈាមបាន៥៩% ៕
ចែករំលែកព័តមាននេះ