រាជធានីភ្នំពេញ ៖ ម៉ូតូធុនធំម៉ាក DUKE ដែលជិះដោយនារីម្នាក់ឈ្មោះលីន ដា ជាតារាសម្តែងល្បីឈ្មោះនិងជាតួឯកក្នុងរឿងទេវតាធ្លាក់ពីលើមេឃ ត្រូវបានរថយន្តRAV4 បើកបុកនិងកិនពីលើរងការខូចខាតយ៉ាងដំណំ ខណៈនារីរូបនេះបើកម៉ូតូស្របទិសគ្នាជាមួយរថយន្តបង្កតែសំណាងល្អអ្នកបើកមិនមានរងគ្រោះថ្នាក់ ។ ហេតុការណ៍នេះកើតឡើងនៅវេលាម៉ោង ៤ និង ១០នាទីភ្លឺ ថ្ងៃទី១៥ តុលា ២០១៤ នៅចំណុចក្បែរវិទ្យាល័យ សន្ធម៉ុក តាមផ្លូវកម្ពុជាក្រោម ស្ថិតក្នុងសង្កាត់ទឹកល្អក់ទី១ ខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថានៅមុនពេលកើតហេតុគេឃើញម៉ូតូធុនធំម៉ាក DUKE មួយគ្រឿង ពណ៌ទឹកក្រូចលាយ ខ្មៅ ពាក់ស្លាកលេខភ្នំពេញ1CQ-9998 ជិះដោយនារីម្នាក់រួមដំណើរដោយនារីម្នាក់ទៀតដោយធ្វើដំណើរតាមផ្លូវកម្ពុជាក្រោម ក្នុងទិសដៅពី លិចទៅកើត ខណៈមកដល់ចំណុចកើតក៏ត្រូវរថយន្តម៉ាកRAV4 មួយគ្រឿង ពណ៌ខ្មៅពាក់ស្លាកលេខភ្នំពេញ 2Q-9321 បើកតាមផ្លូវកម្ពុជាក្រោមក្នុងទិសដៅស្របគ្នា បុកនិងកិនពីលើបណ្តាលឱ្យរងការខូចខាតយ៉ាងដំណំ ប៉ុន្តែសំណាងល្អអ្នកជិះលោតចេញទាន់មិនមានរងរបួសនោះទេ ។
ក្រោយពេលកើតហេតុតៃកុងរថយន្តបានចុះពីលើរថយន្តរត់គេចខ្លួនបាត់ស្រមោលដោយបន្សល់ទុករថយន្តនៅកន្លែងកើតហេតុ ។ សមត្ថកិច្ចបានយកទាំងម៉ូតូនិងរថយន្តទៅកាន់ការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នាតាមនិតិវិធីច្បាប់ ។
ចែករំលែកព័តមាននេះ