រាជធានីភ្នំពេញ ៖ រថយន្តឡិចស៊ីស RX-300 មួយគ្រឿងរបស់តារាសម្តែងពេជ្រ អាវីហ្សា ត្រូវជនសង្ស័យលួចយកទៅបាត់ខណៈចាក់សោ ចតចោលនៅតាមចិញ្ចើមផ្លូវហើយចូលទៅញ៉ាំស៊ុប ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង ៨យប់ ថ្ងៃទី១៣ តុលា ២០១៤ នៅចំណុចមុខហាងស៊ុប << យីហោ ស៊ុបគោ៤០>> ផ្លូវ៦៣ ស្ថិតក្នុងសង្កាត់ផ្សារថ្មី១ ខណ្ឌដូនពេញ ។
ប្រភពព័ត៌មានពីម្ចាស់រថយន្តឈ្មោះពេជ្រ អាវីហ្សាបានឱ្យដឹងថា នៅមុនពេលកើតហេតុប្អូនរបស់នាងបានយករថយន្តរបស់នាងម៉ាកឡិច ស៊ីស RX300 ពណ៌ខ្មៅ ពាក់ស្លាកលេខភ្នំពេញ 2Y-2892 ដឹកក្រុមគ្រួសារទៅញាំស៊ុបនៅកន្លែងកើតហេតុខាងលើ ដោយនាងមិនបានទៅជាមួយទេ។ ខណៈធ្វើដំណើរមកដល់មុខហាងស៊ុបខាងលើប្អូនរបស់នាងបានចតរថយន្តចាក់សោ ចោលនៅចិញ្ចើមផ្លូវទល់មុខហាងស៊ុប ខាងលើរួចក៏នាំគ្នាដើរចូលហាងស៊ុបនោះ។ ពេលដែលក្រុមគ្រួសាររបស់នាងចេញមកពីហូបស៊ុបវិញនោះ ក៏មិនឃើញរថយន្តនៅកន្លែងចតក៏មានការភ្ញាក់ផ្អើលឆោឡោឡើងតែម្តង ។ បន្ទាប់មកប្អូនរបស់នាងបានទូរស័ព្ទថា បាត់រថយន្តមិនឃើញ រូបនាងក៏ប្រញាប់មកកន្លែងកើតហេតុ ក្នុងនោះសមត្ថកិច្ចមូលដ្ឋានក៏បានចុះមកពិនិត្យកន្លែងកើតហេតុដែរ ។
ក្រោយពេលកើតហេតុនារីម្ចាស់រថយន្តបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទី១ ដើម្បីឱ្យសមត្ថកិច្ចជួយស្រាវរករថយន្តខាងលើមកវិញ។
ទាក់ទិននឹងករណីនេះសមត្ថកិច្ចមិនទាន់សន្និដ្ឋានថា ជាករណីអ្វីនៅឡើយទេ ពីព្រោះថារឿងនេះវាអាចជាប់ពាក់ព័ន្ធ និងរឿងរ៉ាវផ្សេងៗទៀត តែទោះជាយ៉ាងណាសមត្ថកិច្ចនិងស្រាវជ្រាវស្វែងរករថយន្តខាងលើនេះ។
ចែករំលែកព័តមាននេះ