មន្រ្តីអង្គការក្រៅរដ្ឋាភិបាលត្រូវប៉ូលិសចាប់ខ្លួន ជាប់ចោទរំលោភសេពសន្ថវៈក្មេងស្រី
ដោយ ៖ អប្សរា
ថ្ងៃព្រហស្បត្ត៏ ទី២៩ ខែកក្កដា ឆ្នាំ២០១០ ម៉ោង ១៧:៥២
សំណាង
ជនសង្ស័យដែលអះអាងថា ខ្លួនជាអនុប្រធានអង្គការ “ការពារធនធានធម្មជាតិ និងអភិរក្សជីវសាស្ដ្រចំរុះ”
ខេត្ដសៀមរាប ៖ បុរសអាយុ៣០ឆ្នាំម្នាក់ ដែលអះអាងថា ខ្លួនជាអនុប្រធានអង្គការ “ការពារធនធានធម្មជាតិ និងអភិរក្សជីវសាស្ដ្រចំរុះ” ត្រូវបានកំលាំងកងរាជអាវុធហត្ថខេត្ដធ្វើការ ចាប់ឃាត់ខ្លួន កាលពីព្រឹកថ្ងៃទី២៧ ខែកក្កដា ឆ្នាំ២០១០ នៅក្នុងទីស្នាក់ការរបស់ខ្លួនភូមិជ្រៃ ឃុំកណ្ដែក ស្រុកប្រាសាទបាគង បន្ទាប់ពីមានបណ្ដឹងចោទប្រកាន់ទៅលើបុរសរូបនេះថា បានចាប់រំលោភសេពសន្ថវៈទៅលើក្មេងស្រីអាយុ១៤ម្នាក់ រហូតបានសម្រេចចំនួនពីរដងផ្ទួនៗគ្នា នៅក្នុងបន្ទប់ផ្ទះសំណាក់ ។
មន្ដ្រីកងរាជអាវុធហត្ថម្នាក់បានឱ្យដឹងថា ជនសង្ស័យដែលត្រូវសមត្ថកិច្ចចាប់ខ្លួននោះមានឈ្មោះ ម៉ាត់ រ៉ានី ភេទប្រុស អាយុ៣០ឆ្នាំ ស្រុកកំណើត នៅភូមិត្រញំងឈូក ឃុំបឹង ស្រុកបារាយណ៍ ខេត្ដកំពង់ធំ ជាអនុប្រធានអង្គការ “ការពារធនធានធម្មជាតិ និងអភិរក្សជីវសាស្ដ្រចំរុះ ”ប្រចាំខេត្ដសៀមរាប ។ ការចាប់ខ្លួននោះ គឺយោងទៅតាមបណ្ដឹងរបស់ក្រុមគ្រួសារក្មេងស្រីរងគ្រោះអាយុ១៤ឆ្នាំ នៅស្រុកអង្គរធំ ខេត្ដសៀមរាប ដោយចោទប្រកាន់ទៅលើបុរសនេះ ថាបានចាប់រំលោកក្មេងស្រីរងគ្រោះបានសម្រេចពីរដង នៅក្នុងបន្ទប់ផ្ទះសំណាក់យីហោ ស្ពាននាគ កាលពីយប់ថ្ងៃទី២៦ ខែកក្កដា កន្លងទៅថ្មីៗនេះ ។
លោកអនុសេនីយ៍ទោ លន់ ស៊ីន មន្ដ្រីការិយាល័យស្រាវជ្រាវប្រឆាំងការជួញដូរមនុស្ស និងការពារអនីតិជន នៃបញ្ជាការដ្ឋានកងរាជអាវុធហត្ថខេត្ដសៀមរាប បានឱ្យដឹង តាមការស្រាវជ្រាវថា មុននឹងឈានទៅដល់ការចាប់រំលោភទៅលើក្មេងស្រីរងគ្រោះនោះ គឺជនសង្ស័យ និងជនរងគ្រោះបានស្គាល់គ្នា តែរយៈពេលពីរថ្ងៃប៉ុណ្ណោះ តាមរយៈឈ្មោះ គី គៀន ជាចាងហា្វងកាសែតសំដីរាស្ដ្រ ដែលត្រូវជាបងធម៌របស់ក្មេងស្រីរងគ្រោះ ។ នៅថ្ងៃទី២៦ កក្កដា ឈ្មោះ គី គៀន ឈ្មោះ រ៉ា និងឈ្មោះ ម៉ាត់ រ៉ានី បានទៅលេងផ្ទះក្មេងស្រីរងគ្រោះ ហើយបានសុំម្ដាយរបស់នាង និងបងស្រីនាងម្នាក់ទៀត ទៅដើរលេងឯទីរួមខេត្ដសៀមរាប ។
លោកបានបន្ដថា ពេលនោះម្ដាយក្មេងស្រីរងគ្រោះក៏បានយល់ព្រម ហើយពួកគេបានដើរលេងនៅអង្គរ និងផ្លូវ៦០ម៉ែត្រ ហើយចុងក្រោយពួកគេបានចូលទៅស៊ីផឹកនៅក្នុងហាង រាត្រីជួបជុំ ។ លុះបន្ដិចក្រោយមកឈ្មោះ ម៉ាត់ រ៉ានី បានបើករថយន្ដម៉ាក CR-V ពណ៌ទឹកប្រាក់ ពាក់ស្លាកលេខភ្នំពេញ 2G-2940 មួយគ្រឿងចេញទៅដោយនាំទាំងក្មេងស្រីរងគ្រោះ និងបងស្រីរបស់នាងទៅដេកក្នុងផ្ទះសំណាក់មួយនៅក្បែរនោះ ដែលមានយីហោ ស្ពាននាគ ក្នុងបន្ទប់លេខ២០៩ ជាន់ទីពីរ ។
លោកលន់ ស៊ីន បានបន្ដថា តាមការសាកសួរឃើញថា មុនដំបូងអ្នកទាំង៣នាក់នោះ បានដេកក្នុងបន្ទប់រួមគ្នាតែមួយ តែដល់យប់ជ្រៅបន្ដិចឈ្មោះ គី គៀន ជាបងធម៌បានឡើង ទៅដល់បន្ទប់នោះ ហើយបងប្អូនស្រីទាំងពីរនាក់ រួមទាំងជនសង្ស័យបានចូលបន្ទប់ទឹក និយាយគ្នាមួយសន្ទុះ បន្ដិចក្រោយមកស្រាប់តែ ឈ្មោះ ម៉ាត់ រ៉ានី ទាញដៃក្មេងស្រីរងគ្រោះ ទៅដេកក្នុងបន្ទប់ផ្សេងមួយទៀតទំនងជាទុក ឱកាសឱ្យបងស្រីនៅជាមួយឈ្មោះ គី គៀន តែពីរនាក់ ។ លោកបន្ថែមថា រយៈពេលប្រមាណកន្លះម៉ោងក្រោយមកទើបបងស្រីជនរងគ្រោះនិងឈ្មោះ គី គៀន ទៅគោះទ្វារបន្ទប់ ពេលនោះពួកគេនិយាយប្រាប់ថា ក្មេងស្រីរងគ្រោះកំពុងដេកស្រាតសំលៀកបំពាក់អស់ហើយ ។
លុះព្រឹកឡើងក្រុមគ្រួសារជនរងគ្រោះ ក៏បានមកប្ដឹងសមត្ថកិច្ចរហូតឈានដល់ការចាប់ខ្លួនជនសង្ស័យឈ្មោះ ម៉ាត់ រ៉ានី នេះតែម្ដង ។ នៅចំពោះមុខសមត្ថកិច្ចកងរាជអាវុធហត្ថ ក្មេងស្រីរងគ្រោះបានចោទប្រកាន់ចំៗ ទៅលើឈ្មោះម៉ាត់ រ៉ានី ថាបានចាប់រំលោភរូបនាងបានសំរេចចំនួន២ដង ។ ចំណែកជនសង្ស័យឈ្មោះ ម៉ាត់ រ៉ានី វិញបានបដិសេធថា ខ្លួនពុំបានប្រព្រឹត្ដដូចការចោទប្រកាន់នោះទេ ខ្លួនគ្រាន់តែដេកលេងធម្មតាប៉ុណ្ណោះបើពុំជឿទេ សូមឱ្យក្រុមគ្រូពេទ្យមកពិនិត្យរាងកាយក្មេងស្រីនោះចុះ នឹងដឹងការពិតហើយ ។
លោកអនុសេនីយ៍ទោ លន់ ស៊ីន បានបញ្ចាក់ថា ទោះបីជាជនសង្ស័យប្រឹងឆ្លើយដោះសា ថាខ្លួនមិនបានរំលោភយ៉ាងណាក៏ដោយ ក៏ប៉ុន្ដែយោងទៅលើពាក្យបណ្ដឹង សាក្សី សកម្មភាព និងសំដីជនរងគ្រោះដែលជាអនីតិជន ខាង លោកត្រូវតែកសាងសំណុំរឿងបញ្ជូនទៅសាលាដំបូង តាមនីតិវិធីមិនអាចយោគយល់បានឡើយ ៕
