ក្នុងកាយវិការមួយប្រហែលជាចង់សម្រាលភាពតានតឹង រដ្ឋាភិបាលក្រុងហុងកុងប្រកាសកាលពីថ្ងៃទី២៩ កញ្ញា ពីការដកថយរបស់កងកម្លាំងប៉ូលិសប្រឆាំងកុប្បកម្ម ក្រោយពីរាត្រីនៃការប៉ះទង្គិចគ្នាជាមួយពួកបាតុករស្និទ្ធលទ្ធិប្រជាធិបតេយ្យជាច្រើនពាន់នាក់ដែលរាំងខ្ទប់សង្កាត់ជាច្រើននៃទីក្រុងនេះ ។
ក្នុងសេចក្តីប្រកាសមួយ រដ្ឋាភិបាលក្រុងហុងកុងនិយាយថា ពលរដ្ឋដែលប្រមូលផ្តុំគ្នានៅតាមដងវិថី ស្ថិតក្នុងភាពស្ងៀមស្ងាត់ ហើយបូ៉លិសប្រឆាំងកុប្បកម្មត្រូវបានដកថយ ។ ជាថ្នូរគ្នា ពួកបាតុករត្រូវបានស្នើឱ្យបើកផ្លូវទាំងឡាយ ដែលពួកគេកាន់កាប់ឱ្យបានឆាប់ដើម្បីឱ្យបណ្តារថយន្តសង្គ្រោះអាចចេញចូលបាន ហើយស្តារការដឹកជញ្ជូនសាធារណៈឡើងវិញ ។
ខ្សែរថយន្តក្រុងចំនួនជាង២០០ខ្សែត្រូវផ្អាក ឬត្រូវវាង ហើយការធ្វើចរាចរណ៍របស់ត្រាំវ៉ៃត្រូវស្ទះ ចំណែកបណ្តាស្ថានីយមេត្រូត្រូវបិទទ្វារ។ សាលារៀនជាច្រើនក៏បិទទ្វារ រួចសហគ្រាសជាច្រើនត្រូវស្ទះសកម្មភាពសេដ្ឋកិច្ច ។ បាតុកម្មស្និទ្ធលទ្ធិប្រជាធិបតេយ្យ ចាប់តាំងពីច្រើនសប្តាហ៍មកហើយនៅក្នុងអតីតអាណានិគមអង់គ្លេសនេះ បានបង្កើនសកម្មភាពយ៉ាងខ្លាំងកាលពីចុងសប្តាហ៍កន្លងមកនេះ ហើយក្រុងហុងកុងជួបប្រទះនឹងភាពចលាចលស៊ីវិលយ៉ាងអាក្រក់មួយចាប់តាំងពីវិលមកនៅក្រោមការគ្រប់គ្រងរបស់ចិនពីឆ្នាំ១៩៩៧ មក ។ពួកបាតុករប្តេជ្ញាចិត្តប្រឆាំងការសម្រេចរបស់ក្រុងប៉េកាំង កម្រិតការបោះឆ្នោតជាសាកលក្នុងតំបន់រដ្ឋបាលពិសេសនេះ ៕
ចែករំលែកព័តមាននេះ