ខេត្តកំពង់ឆ្នាំង ៖ កុមារាអាយុ១៣ឆ្នាំម្នាក់បានលង់ទឹកស្ទឹងស្លាប់ ខណៈទៅកម្សាន្តជាមួយឪពុកម្តាយ ក្រោយពេលត្រឡប់ពីបុណ្យភ្ជុំបិណ្ឌនៅវត្តវិញ ។ ហេតុការណ៍នេះបានកើតឡើងនៅវេលាម៉ោង១និង៣០នាទីរសៀលថ្ងៃទី២៣ កញ្ញា ជាថ្ងៃបុណ្យភ្ជុំបិណ្ឌ នៅទឹកស្ទឹងប៉មប៉ា ដែលជាកន្លែងប្រជាពលរដ្ឋទៅកម្សាន្តជារៀងរាល់ឆ្នាំ ក្នុងឱកាសបុណ្យភ្ជុំបិណ្ឌ ស្ថិតក្នុងភូមិស្រែតាជ័យ ឃុំអភិវឌ្ឍន៏ ស្រុកទឹកផុស ខេត្តកំពង់ឆ្នាំង ។
លោក លីវ ប៊ុនសុង អធិការងស្រុកទឹកផុសឱ្យដឹងថា កុមារារងគ្រោះមានឈ្មោះសឿ រតនៈ អាយុ១៣ឆ្នាំ មានឪពុកឈ្មោះ ផាន់ នី និងម្តាយ ឈ្មោះ មុំ ។ គ្រួសារនេះមានទីលំនៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ។ បន្ទាប់ពីរាប់បាត្រក្នុងឱកាសបុណ្យភ្ជុំបិណ្ឌនៅវត្តមួយ ក្នុងស្រុកទឹកផុសរួចមក ឪពុកម្តាយកុមារារងគ្រោះ បានទៅកម្សាន្តនៅទឹកស្ទឹងប៉មប៉ា ដូចប្រជាពលរដ្ឋជាច្រើនទៀត និងបានងូតទឹកស្ទឹងកម្សាន្តផងដែរ ។
លោកបន្តថា នៅពេលនោះកុមារារងគ្រោះបានងូតទឹកនៅកន្លែងទឹករាក់មានដីខ្សាច់ជាមួយក្មេងដទៃទៀតជាធម្មតា ប៉ុន្តែក្រោយមកក្មេងនោះត្រូវបានទឹកហូរអណ្តែតទៅទឹកជ្រៅ ហើយក៏បានលង់ទឹកតែម្តង ។ ខណៈនោះដែរ មានប្រជាពលរដ្ឋដែលបានទៅកម្សាន្តបានឃើញក្មេងប្រុសនោះលង់ទឹក ក៏បានស្រែកហៅឱ្យគេជួយ ហើយក៏មានមនុស្សប្រុស៤-៥នាក់ បានហក់ទឹកមុជរាវរកក្មេងប្រុសរងគ្រោះ ប្រហែល១០នាទីទើបរកក្មេងនោះឃើញ និងបានស្រង់យកមកលើគោកជួយសង្គ្រោះតាមដែលអាចធ្វើបាន តែគ្មានជំនាញក្នុងការសង្គ្រោះមនុស្សលង់ទឹកឡើយ ។ បន្ទាប់មកម្តាយបានមកទទួលកូននិងបានយកទៅសង្គ្រោះនៅមណ្ឌលសុខភាពស្រុកទឹកផុស តែក្មេងប្រុសនោះបាន ស្លាប់បាត់ទៅហើយ ៕
ចែករំលែកព័តមាននេះ