ប្រធានាធិបតីចិន លោក ស៊ី ជីនពីង បានទៅដល់ក្រុងអាហ៍មេដាបាដ អតីតរដ្ឋធានីរដ្ឋ ហ្គូហ្សារ៉ាត ជារដ្ឋកំណើតរបស់នាយករដ្ឋមន្ត្រីឥណ្ឌា លោក ណារេនដ្រា ម៉ូឌី កាលពីថ្ងៃទី១៧ កញ្ញា ដើម្បីបំពេញទស្សនកិច្ចផ្លូវរដ្ឋរយៈពេល៣ថ្ងៃនៅឥណ្ឌា ។
ប្រធានាធិបតីចិន លោក ស៊ី ជីនពីង បានទៅដល់ក្រុងអាហ៍មេដាបាដ អតីតរដ្ឋធានីរដ្ឋ ហ្គូហ្សារ៉ាត ជារដ្ឋកំណើតរបស់នាយករដ្ឋមន្ត្រីឥណ្ឌា លោក ណារេនដ្រា ម៉ូឌី កាលពីថ្ងៃទី១៧ កញ្ញា ដើម្បីបំពេញទស្សនកិច្ចផ្លូវរដ្ឋរយៈពេល៣ថ្ងៃនៅឥណ្ឌា ។
នេះជាទស្សនកិច្ចលើកដំបូងរបស់លោក ស៊ី នៅឥណ្ឌា ចាប់តាំងពីលោកឡើងកាន់អំណាចពីខែមីនា ឆ្នាំ២០១៣ មកហើយ ក៏ជាទស្សនកិច្ចផ្លូវរដ្ឋលើកដំបូងរបស់ប្រធានាធិបតីចិនមួយរូបនៅឥណ្ឌា ចាប់តាំងពី៨ឆ្នាំមកហើយដែរ ។
លោកស៊ី នារសៀលថ្ងៃទី១៧ កញ្ញា នោះបានអញ្ជើញចូលរួមក្នុងព្រឹត្តិការណ៍រួមជាច្រើនជាមួយលោក ម៉ូឌី នៅទីក្រុងអាហ៍មេដាបាដ មុនពេលលោកធ្វើដំណើរមកកាន់រដ្ឋធានីញូវដែល្លី ។
ថ្ងៃដែលលោក ស៊ី មកដល់ប្រទេសឥណ្ឌា គឺជួនពេលគ្នានឹងថ្ងៃខួបកំណើតគំរប់៦៤ឆ្នាំ របស់លោក ម៉ូឌី ផងដែរ ។ ពេលស្នាក់អាស្រ័យក្នុងប្រទេសឥណ្ឌា ប្រធានាធិបតីចិន នឹងជួបពិភាក្សាផងដែរជាមួយប្រធានាធិបតីឥណ្ឌា លោក PRANAB MUKHERJEE ព្រមទាំងមេដឹកនាំនយោបាយឥណ្ឌាដទៃៗទៀត ។ លោកត្រូវថ្លែងសុន្ទរកថាមួយនៅទីក្រុងញូវដែល្លី ស្តីពីទំនាក់ទំនងចិន-ឥណ្ឌា និងស្តីពីនយោបាយរបស់ចិនចំពោះអាស៊ីខាងត្បូង ។
ចិនគឺជាដៃគូពាណិជ្ជកម្មធំបំផុតរបស់ឥណ្ឌា ចំណែកឥណ្ឌា ក៏ជាដៃគូពាណិជ្ជកម្មធំបំផុតរបស់ចិននៅអាស៊ីខាងត្បូងដែរ ជាមួយទំហំនៃការផ្លាស់ប្តូរទ្វេភាគីសរុបប្រមាណជា៦៥,៦ពាន់លានដុល្លារក្នុងឆ្នាំ២០១៣ ។
មហាប្រទេសកំពុងមានសេដ្ឋកិច្ចហក់ឡើងខ្លាំងទាំង២កំណត់ទិសដៅបង្កើនទំហំនៃការផ្លាស់ប្តូរពាណិជ្ជកម្មប្រចាំឆ្នាំឱ្យដល់១០០ពាន់លានដុល្លារក្នុងឆ្នាំ២០១៥ ។
ប្រទេសឥណ្ឌាជាដំណាក់កាលចុងក្រោយនៃដំណើរទស្សនកិច្ចនៅអាស៊ីរបស់លោក ស៊ី ដែលបាននាំលោកទៅកាន់ប្រទេសតាហ្ស៊ីគីស្ថាន ម៉ាល់ឌីវ និងស្រីលង្ការួចហើយ ។ នៅតាហ្ស៊ីគីស្ថាន លោកចូលរួមក្នុងកិច្ចប្រជុំកំពូលរបស់អង្គការកិច្ចសហប្រតិបត្តិការសៀងហៃ ៕
ចែករំលែកព័តមាននេះ