រាជធានីភ្នំពេញ ៖ ពលការិនី៤នាក់ក្នុងចំណោម៩នាក់បានចោទប្រកាន់ទៅលើប្រធានក្រុមហ៊ុនមជ្ឈមណ្ឌលបណ្ដុះបណ្ដាលវិជ្ជាជីវៈ (MONEY CENTER) នាំពលករទៅធ្វើការក្រៅប្រទេសថា បានចាក់សោទ្វារបង្ខាំងពួកនាងឱ្យនៅក្នុងទីស្នាក់ការក្រុមហ៊ុនទាំងបំពាន ខណៈពេលដែលពួកនាងទាមទារយកលុយចំនួន៣០០ដុល្លារមកវិញ
រាជធានីភ្នំពេញ ៖ ពលការិនី៤នាក់ក្នុងចំណោម៩នាក់បានចោទប្រកាន់ទៅលើប្រធានក្រុមហ៊ុនមជ្ឈមណ្ឌលបណ្ដុះបណ្ដាលវិជ្ជាជីវៈ (MONEY CENTER) នាំពលករទៅធ្វើការក្រៅប្រទេសថា បានចាក់សោទ្វារបង្ខាំងពួកនាងឱ្យនៅក្នុងទីស្នាក់ការក្រុមហ៊ុនទាំងបំពាន ខណៈពេលដែលពួកនាងទាមទារយកលុយចំនួន៣០០ដុល្លារមកវិញ ដែលពួកនាងបង់ចូលក្រុមហ៊ុនកាលពីពេលកន្លងមក ព្រោះក្រុមហ៊ុនមួយនេះគ្មានច្បាប់ និងមិនគោរពតាមកិច្ចសន្យា ដោយយកពួកនាងទៅលែងចោលនៅក្នុងប្រទេសថៃ ។
ប្រតិកម្មរបស់ពួកនាង ត្រូវបាន ប្រធានក្រុមហ៊ុនខាងលើខឹងសម្បា ក៏បានបញ្ជាឱ្យកូនចៅចាក់សោបង្ខាំងពួកនាងតែម្ដង ។ ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង១០ព្រឹកថ្ងៃទី១៧ កញ្ញា នៅក្នុងបូរីសំបួរមាស ស្ថិតក្នុងភូមិម័ល សង្កាត់ដង្កោ ខណ្ឌដង្កោ ។ ពលការិនីដែលបានអះអាងថា ត្រូវក្រុមហ៊ុនខាងលើចាក់ សោបង្ខាំងនោះមាន ១-ឈ្មោះ ផែន ដាលី អាយុ២៥ឆ្នាំ មានទីលំនៅក្នុងខេត្តកំពង់ចាម ២-ឈ្មោះ និន ចាន់នី អាយុ២២ឆ្នាំ មានទីលំនៅក្នុងខេត្តតាកែវ ៣-ឈ្មោះ អុល គីមឈន អាយុ២៨ឆ្នាំ មានទីលំនៅក្នុងខេត្តកំពង់ចាម និងទី៤-ឈ្មោះ ផាន់ ចាន់ស៊ីដា អាយុ១៧ឆ្នាំ មានទីលំនៅក្នុងខេត្តកំពង់ចាម។ ពួកនាងបានចោទប្រកាន់ប្រធានក្រុមហ៊ុនមុនីសេនធឺ (MC) ឈ្មោះ ឈន មុនីរ័ត្ន ថា បើកក្រុមហ៊ុនអត់ច្បាប់ និងបោកប្រាស់ ព្រមទាំងបានបង្ខាំងពួកនាងនៅក្នុងទីស្នាក់ការក្រុមហ៊ុននោះទាំងបំពាន ។
ពលការិនីរំលឹកថា កាលពីទទួលពួកនាង ក្រុមហ៊ុននេះអះអាងថា ខ្លួនមានច្បាប់ត្រឹមត្រូវ និងធានានាំពួកនាងទៅធ្វើការនៅប្រទេសថៃដោយស្របច្បាប់ ព្រមទាំងរកការងារដែលល្អៗឱ្យធ្វើ និងតម្រូវឱ្យពួកនាងបង់លុយសម្រាប់ថ្លៃសេវារត់ការផ្សេងៗចូលក្រុមហ៊ុនចំនួន៣០០ដុល្លារ ។ នាងនិយាយថា ពេលនោះបន្ទាប់ពីឮថា ក្រុមហ៊ុនមានច្បាប់ត្រឹមត្រូវ ពួកនាងក៏បានចំណាយលុយបង់ឱ្យដោយមិនមានការតវ៉ាអ្វីឡើយ ។ លុះក្រោយមកពួកនាងត្រូវបានបញ្ជូនទៅធ្វើជាពលករនៅប្រទេសថៃមែន ។ ប៉ុន្តែពេលទៅដល់ អ្វីៗមិនដូចជាការសន្យារបស់ក្រុមហ៊ុនមួយនេះឡើយ គឺក្រុមហ៊ុននេះបាននាំពួកនាងទៅបំបរបង់ចោល និងក្លាយទៅជា ជនអន្តោប្រវេសន៍គ្មានច្បាប់ ព្រោះក្រុមហ៊ុនធ្វើលិខិតឆ្លងដែនឱ្យ ដែលពេលនោះពួកនាងមានគ្នា១៤នាក់ ហើយក្រុមហ៊ុនប្រាប់ថា រយៈពេល២ឆ្នាំ ទើបផុតសុពលភាព ប៉ុន្តែជាក់ស្ដែងក្រោយពេលពួកនាងទៅដល់ប្រទេសថៃបានត្រឹម១៤ថ្ងៃប៉ុណ្ណោះ លិខិតឆ្លងដែននោះ ក៏អស់សុពលភាព។
ពួកនាងនិយាយប្រាប់អ្នកកាសែតទៀតថា ពួកនាងបានស្ថិតនៅជាជនអន្តោប្រវេសន៍នៅក្នុងប្រទេសថៃ ខ្លាចមុខខ្លាចក្រោយអស់រយៈពេលជាង១ខែ ទើបមានឱកាសវិលត្រឡប់មកស្រុកកំណើតវិញ ។ ក្រុមពលការិនីនិយាយថា នៅព្រឹកថ្ងៃកើតហេតុនេះ ពួកនាងមានគ្នា៩នាក់បាននាំគ្នាមកទារលុយចំនួន៣០០ដុល្លារពីលោកឈន មុនីរ័ត្ន ដែលជាប្រធានក្រុមហ៊ុននោះវិញ ប៉ុន្តែប្រធានក្រុមហ៊ុនមួយនេះ មិនត្រឹមតែមិនព្រមឱ្យប៉ុណ្ណោះទេ ថែមទាំងប្រើឱ្យបុគ្គលិកចាក់សោបង្ខាំងពួកនាងថែមទៀត ។ នាងថា ខណៈនោះពួកនាង៥នាក់់បានរត់ចេញទាន់ និង៤នាក់រត់មិនទាន់ ក៏ត្រូវជាប់ឃុំនៅក្នុងទីស្នាក់ការក្រុមហ៊ុននោះតែម្ដង ។ ប៉ូលិសមូលដ្ឋានឱ្យដឹងថា នៅពេលទទួលបានបណ្ដឹងថា មានការបង្ខាំងមនុស្សខុសច្បាប់ កម្លាំងក៏បានចុះទៅអន្តរាគមន៍ភ្លាមៗ ហើយពេលទៅដល់ឃើញមានពលការិនីចំនួន៤នាក់កំពុងស្ថិតនៅក្នុងទីស្នាក់ការក្រុមហ៊ុននោះមែន ដោយបិទទ្វារចាក់សោពីខាងក្រៅទៀតផង។ ខណៈនោះកម្លាំងសមត្ថកិច្ច ក៏កាត់ផ្ដាច់រំដោះពលការិនីទាំង៤នាក់ចេញ ទើបឃើញតំណាងក្រុមហ៊ុនម្នាក់ទៅដល់ និងអះអាងថា ពួកគេប្រញាប់ទៅហូបបាយ ហើយឱ្យពលការិនីទាំងនោះចេញសិន តែពួកនាងមិនព្រមចេញ ទើបចាក់សោតែម្ដងទៅ ដើម្បីចេញទៅហូបបាយមួយភ្លែតប៉ុណ្ណោះ ពេលត្រឡប់មកវិញឃើញសុទ្ធតែប៉ូលិសទៅហើយ ។
ទាក់ទិនទៅនឹងហេតុការណ៍នោះ ប្រធានក្រុមហ៊ុនស្របច្បាប់មួយរូបដែលសុំមិនបញ្ចេញឈ្មោះ បានប្រាប់កោះសន្តិភាពតាមទូរស័ព្ទ កាលពីវេលាល្ងាចថ្ងៃទី១៧ កញ្ញាថា លោកនឹងរៀបចំឯកសារពាក់ព័ន្ធមួយចំនួនប្ដឹងក្រុមហ៊ុនមួយនេះ ។ ក្រុមហ៊ុននេះបង្កើតឡើងដោយគ្មានច្បាប់អនុញ្ញាត និងនិយាយប្រាប់គេថា ក្រុមហ៊ុនរបស់ខ្លួន ជាសាខាក្រុមហ៊ុនរបស់លោក ដើម្បីយកប្រជាប្រិយភាព និងជាទំនុកចិត្តសម្រាប់ពលករ ។ ប៉ុន្តែផ្ទុយទៅវិញ នេះជាទង្វើល្មើសច្បាប់មួយដែលមិនអាចអត់ឱនឱ្យបានឡើយ ៕
ចែករំលែកព័តមាននេះ