ក្រុងប៉ោយប៉ែត ៖ រថយន្តធុនយក្សដឹកធ្ងន់ហួសកំណត់គេនៅតែសង្កេតឃើញបើកបំផ្លាញផ្លូវលំមួយចំនួននៅតំបន់ជាយដែនកម្ពុជា-ថៃ ក្រុងប៉ោយប៉ែត តែអាជ្ញាធរ មានសមត្ថកិច្ចដែលឈរជើងនៅក្នុងតំបន់ គ្មានវិធានការទប់ស្កាត់ឡើយ ។ ជាក់ស្តែងកាលពីព្រឹកថ្ងៃទី១៦ កញ្ញា ឆ្នាំ២០១៤ កន្លងមកនេះ គេសង្កេតឃើញមាន
ក្រុងប៉ោយប៉ែត ៖ រថយន្តធុនយក្សដឹកធ្ងន់ហួសកំណត់គេនៅតែសង្កេតឃើញបើកបំផ្លាញផ្លូវលំមួយចំនួននៅតំបន់ជាយដែនកម្ពុជា-ថៃ ក្រុងប៉ោយប៉ែត តែអាជ្ញាធរ មានសមត្ថកិច្ចដែលឈរជើងនៅក្នុងតំបន់ គ្មានវិធានការទប់ស្កាត់ឡើយ ។ ជាក់ស្តែងកាលពីព្រឹកថ្ងៃទី១៦ កញ្ញា ឆ្នាំ២០១៤ កន្លងមកនេះ គេសង្កេតឃើញមានរថយន្តធន់ធំប្រភេទ យីឌុប មួយគ្រឿងដឹកស៊ីម៉ង់ត៍ពេញទ្រុងមានចំនួនរាប់សិបតោនរបស់ក្រុមហ៊ុនឯកជនមួយបានបើកពីផ្លូវជាតិលេខ៥ ចូលមកតាមផ្លូវកែង ធនាគារអេស៊ីលីដា ឆ្លងកាត់មុខសាលាសង្កាត់ប៉ោយប៉ែត រហូតមកចំណុចភូមិសាមគ្គីមានជ័យ សង្កាត់ផ្សារកណ្តាល ក្រុងប៉ោយប៉ែត រថយន្តនោះបានជាប់ផុងទៅមុខលែងរួចនៅចំពាក់ណ្តាលផ្លូវ ខណះពេលដែលផ្លូវនៅចំណុចនោះ នារដូវវស្សានេះ ពោពេញទៅដោយភក់ និងមានជង្ហុកជ្រៅ ហើយដីមានសភាពរអិល ស្អិតរមួតដូចជាស្កតាំងម៉ែយ៉ាងអញ្ចឹង ។
សូមបញ្ជាក់ថា បន្ទាប់ពីរថយន្តធុនយក្សដឹកធ្ងន់ហួសកំណត់បានជាប់ផុងនាពេលនោះ បានធ្វើឱ្យរថយន្តប្រជាពរដ្ឋមួយចំនួនទៀតដែលបើកបរឆ្លងកាត់តាមផ្លូវលំនោះមិនអាចធ្វើដំណើរឆ្លងកាត់ដើម្បីយកចង្ហាន់ទៅវត្តក្នុងថ្ងៃបុណ្យកាន់បិណ្ឌបានឡើយ ហើយសម្រាប់ផ្លូវវាងក៏គ្មានដែរ ដោយផ្លូវលំមួយចំនួនទៀតគឺមិនអាចឱ្យពួកគាត់ធ្វើដំណើរបានឡើយនារដូវវស្សានេះ ។ប្រជាពលរដ្ឋរស់នៅតំបន់ជាយដែនកម្ពុជា-ថៃក្រុងប៉ោយប៉ែតបាននាំគ្នាត្អូញត្អែថា ពួកគាត់មានការលំបាកក្នុងការធ្វើដំណើរខ្លាំងណាស់នៅ ពេលរដូវវស្សាបានចូលមកដល់ម្តងៗ សម្រាប់ពួកគាត់ប្រកបមុខរបរប្រចាំថ្ងៃដើម្បីចិញ្ចឹមជិវិតក្នុងក្រុមគ្រួសារ ។
ប្រភពដដែលបានបន្តថា ជាច្រើនឆ្នាំមកហើយសម្រាប់នៅក្រុងប៉ោយប៉ែតនេះហាក់គ្មានអាជ្ញាធរ មានសមត្ថកិច្ចណាមួយយកចិត្តទុកដាក់ក្នុងអភិវឌ្ឍន៍ហេដ្ឋារចនាសម្ព័ននៅក្នុងមូលដ្ឋានឱ្យបានល្អប្រសើរនោះទេ ជាពិសេសនៅពេលដែលលោក ង៉ោ ម៉េងជ្រួន បានឡើងកាន់តំណែងជាអភិបាលក្រុងប៉ោយប៉ែត នាពេលបច្ចុប្បន្ននេះតែម្តង មើលទៅហាក់គ្មានអ្វីគួឱ្យកត់សម្គាល់ឡើយ ។ប្រជាពលរដ្ឋបានបន្តថា តាមកំណែទម្រង់របស់ប្រមុខរាជរដ្ឋាភិបាលការអភិវឌ្ឍន៏ផ្លូវបេតុងផ្សេងៗនៅតាមទីប្រជុំជនទូទាំងប្រទេសគឺរវាងអាជ្ញាធរ និងប្រជាពលរដ្ឋ ត្រូវចូលរួមចំណែកកសាងផ្លូវ៥០+៥០ រវាងប្រជាពលរដ្ឋ និងអាជ្ញាធរ ។ តែសម្រាប់នៅក្នុងតំបន់ជាយដែនកម្ពុជា-ថៃ ក្រុងប៉ោយប៉ែតនេះវិញ ប្រជាពលរដ្ឋបានបង្ហើបឱ្យដឹងថាការអភិវឌ្ឍន៏ផ្លូវបេតុងនានានៅក្នុងតំបន់នេះ គឺ៥០+៥០ រវាងប្រជាពលរដ្ឋ និង ប្រជាពលរដ្ឋដែលរស់នៅសងខាងផ្លូវទាំងស្រុងតែម្តង ។
ប្រជាពលរដ្ឋបានបញ្ជាក់ឱ្យដឹងទៀតថា ប្រសិនបើអាជ្ញាធរ មានសមត្ថកិច្ចបានជួយកសាងផ្លូវបេតុងរួចហើយនោះអស់លោកគួរតែជួយទប់ស្កាត់នូវរថយន្តធុនយក្សដឹកទំនិញហួសកំណត់ទាំងនេះ កុំឱ្យបើកចូលមកបំផ្លាញទាំងនោះតទៅទៀតដើម្បីភាពងាយស្រួលដល់ពួកគាត់ក្នុងការធ្វើដំណើរនារដូវវស្សាផង ។ ជាចុងក្រោយពួកគាត់បានអំពាវនាវដល់ថ្នាក់ដឹកនាំខេត្តក៏ដូចជាប្រមុខរាជរដ្ឋាភិបាលមេត្តាជួយ ក្រាលគ្រួសក្រហមលើផ្លូវលំមួយចំនួននៅក្នុងតំបន់ប៉ោយប៉ែតនេះសម្រាប់ឱ្យពួកគាត់បានធ្វើដំណើរផង ប្រសិនបើមិនអាចទាន់ មានលទ្ឋភាព ធ្វើផ្លូវចាក់ជាបេតុងនោះ ។
ជុំវិញបញ្ហាទាំងអស់នេះលោកង៉ោ ម៉េងជ្រួន អភិបាលក្រុងប៉ោយប៉ែត មិនអាចសុំការបំភ្លឺបានទេនៅរសៀលថ្ងៃទី១៧ កញ្ញានេះដោយទូរសព្ទ័របស់លោកមិនអាចទាក់់ទងបាន ។
ចែករំលែកព័តមាននេះ