រាជធានីភ្នំពេញ ៖ នៅសណ្ឋាគារកាំបូឌីយ៉ាណា កាលពីព្រឹកថ្ងៃទី៤ កញ្ញា កន្លងទៅនេះ មានរៀបចំបើកសិក្ខាសាលាថ្នាក់ជាតិមួយស្តីពីការពិគ្រោះយោបល់នៃការបញ្ចូលជាតិដែក ក្នុងស្តង់សម្រាប់ផលិតផលទឹកស៊ីអីុវ និងទឹកត្រី ។ នៅក្នុងឱកាសនោះដែរ លោកវេជ្ជបណ្ឌិត ចាន់ ពង្សវឌ្ឍនា ប្រធានក្រុមការងារ បច្ចេកទេសត្រួតពិនិត្យគុណភាព នៃអនុកម្មការបញ្ចូលមីក្រូសារជាតិក្នុងចំណីអាហារ បានលើកទ្បើងអំពីសារប្រយោជន៍នៃជីវជាតិ A ផងដែរ ។ លោកថ្លែងថា ជីវជាតិAគឺជាសារជាតិចិញ្ចឹមយ៉ាងសំខាន់មួយប្រភេទ ដែលមាននៅក្នុងអាហារ ហើយរលាយនៅក្នុងប្រេង ឬខ្លាញ់ ។ ជីវជាតិ A បានផ្តល់សារប្រយោជន៍ជាច្រើនដូចជា៖
-ជួយដល់ការរស់រានរបស់កុមារ
-បង្កើតភាពស៊ាំប្រឆាំងទៅនឹងជំងឺផ្សេងៗ
-ជួយដល់ការលូតលាស់ ទាំងផ្នែករាងកាយ និងសតិបញ្ញា
-ជួយដល់គំហើញ និងការពារកុំឱ្យកើតមានជំងឺខ្វាក់មាន់
-ធ្វើឱ្យឃ្លានអាហារ ។
បើសិនជាលោកអ្នកកង្វះជីវជាតិ A អាចប្រឈមនឹងផលប៉ះពាល់មួយចំនួនដូចជា៖
-ប្រព័ន្ធរាងកាយសម្រាប់ទប់ទល់នឹងជំងឺ ផ្សេងៗត្រូវចុះខ្សោយ
-ការលូតលាស់ផ្នែករាងកាយ និងសតិបញ្ញាចុះខ្សោយ
-បាត់បង់ការឃ្លានអាហារ
-គំហើញចុះអន់ថយ(ខ្វាក់មាន់)
-ប៉ះពាល់ដល់អាយុជីវិតកុមារ
ក្រុមប្រឈមមុខ និងក្រុមងាយរងគ្រោះដោយសារបញ្ហាកង្វះជីវជាតិ A មានដូចជា៖
ក-ក្រុមប្រឈមមុខ៖
-កុមារអាយុពី៦ខែទៅ១១ខែ
-កុមារអាយុចាប់ពី១២ខែទៅ៥៩ខែ
-ស្ត្រីក្រោយសម្រាលកូនក្នុងអំទ្បុង៦សប្តាហ៍
-ស្ត្រីមានផ្ទៃពោះ
-ទារកអាយុក្នុងអំទ្បុង៦ខែ ដែលពុំបានបៅដោះម្តាយ ។
ខ-ក្រុមងាយរងគ្រោះដូចជា៖
-កុមារដែលមានជំងឺរាកជាប់បន្ត(លើសពី១៤ថ្ងៃ)
-កុមារដែលមានជំងឺកង្វះអាហារូបត្ថម្ភធ្ងន់ធ្ងរ
-កុមារដែលមានជំងឺកញ្ជ្រឹល
-កុមារដែលមានជំងឺខ្វាក់មាន់ ឬមានចេញរោគសញ្ញណាមួយនៃជំងឺស្ងួតភ្នែក ។
ក្រុមទាំងនេះ ត្រូវការបំពេញបន្ថែមដោយការទទួលទានគ្រាប់ជីវជាតិ A ឬបរិភោគចំណីអាហារដែលមានជីវជាតិ A ស្រាប់ដូចជា បន្លែ ត្រី និងសាច់ជាដើម បូករួមទាំងមានអនាម័យផងដែរ ៕
ចែករំលែកព័តមាននេះ