យោងតាមលទ្ធផលនៃការសិក្សាស្រាវជ្រាវមួយរបស់អាមេរិកដែលចេញផ្សាយកាលពីពេលកន្លងទៅថ្មីៗនេះឱ្យដឹងថា សភាពឆាប់ជ្រីវជ្រួញនៅលើផ្ទៃមុខរបស់ស្ត្រីអាចឱ្យគេទស្សន៍ទាយបានពីហានិភ័យកើតមានជំងឺផ្សេងៗទៅថ្ងៃខាងមុខ ជាពិសេសគឺហានិភ័យកើតជំងឺពុកឆ្អឹង ។
ក្រុមអ្នកស្រាវជ្រាវនៅសាកលវិទ្យាល័យយេល(Yale University)បាននិយាយថា ការប្រឈមជាពិសេសដោយជំងឺឆ្អឹង ពីព្រោះកម្រិតប្រូតេអុីននៅលើស្បែកនិងឆ្អឹងមានការទាក់ទងគ្នា ។ ដូច្នេះ ប្រសិនជានៅលើផ្ទៃមុខនិងករបស់ស្ត្រីមានសភាពជ្រីវជ្រួញខ្លាំង ពួកគេនឹងប្រឈមយ៉ាងធ្ងន់ធ្ងរពីជំងឺខាងដើម ដែលបញ្ហានេះគឺដោយសារតែពួកគេបានបាត់បង់ដង់ស៊ីតេឆ្អឹង ។
អំឡុងការសិក្សា ក្រុមអ្នកស្រាវជ្រាវបានពិសោធលើស្ត្រីដែលទើបអស់រដូវ១១៤នាក់ ។ ពួកគេបានវាស់១១កន្លែងនៅលើស្បែកមុខនិងស្បែកកដោយប្រើឧបករណ៍ឈ្មោះDurometer ។ ឯទម្ងន់ឆ្អឹងនិងដង់ស៊ីតេឆ្អឹងត្រូវគេវាស់ដោយឧបករណ៍ Ultrasound និង X-ray ។
សាស្ត្រាចារ្យដឹកនាំការសិក្សាLubna Palបាននិយាយថា៖ «យើងរកឃើញថា ក្នុងចំណោមស្ត្រីដែលស្ម័គ្រពិសោធ អ្នកដែលមានស្បែកជ្រីវជ្រួញ ភាគច្រើនសុទ្ធតែមានដង់ស៊ីតេឆ្អឹងទាប ពោលគឺជ្រួញកាន់តែខ្លាំង ដង់ស៊ីតេឆ្អឹងកាន់តែទាប» ។ លោកសាស្ត្រាចារ្យបានបន្ថែមថា ៖ «ការរកឃើញរបស់យើងលើកនេះបានបង្ហាញថា ស្បែកអាចឆ្លុះបញ្ចាំងពីគុណភាពគ្រោងឆ្អឹង ហើយវាពិតជាមានតម្លៃគួរឱ្យកត់សម្គាល់ពីព្រោះ វានឹងបង្កភាពងាយស្រួលដល់គ្រូពេទ្យដែលគ្រាន់តែពិនិត្យមើលស្បែកមុខស្ត្រីអាចវិនិច្ឆ័យរោគពុកឆ្អឹងបាន»៕
ចែករំលែកព័តមាននេះ