ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនភ្លាមៗ បន្ទាប់ពីប្រើកាំបិត និងពូថៅកា.ប់់ប្រពន្ធប៉ងសម្លា.ប់ តែមិនបានសម្រេចគ្រាន់តែរបួសធ្ងន់ កាលពីវេលាម៉ោង១១និង៣០នាទីយប់ថ្ងៃទី១៣ កញ្ញា នៅភូមិរូងអំពិល ឃុំខ្នាចរមាស ស្រុកបវេល ព្រោះតែខឹងប្រពន្ធមិនឱ្យរួមរ័ក ។
ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនភ្លាមៗ បន្ទាប់ពីប្រើកាំបិត និងពូថៅកាប់់ប្រពន្ធប៉ងសម្លាប់ តែមិនបានសម្រេចគ្រាន់តែរបួសធ្ងន់ កាលពីវេលាម៉ោង១១និង៣០នាទីយប់ថ្ងៃទី១៣ កញ្ញា នៅភូមិរូងអំពិល ឃុំខ្នាចរមាស ស្រុកបវេល ព្រោះតែខឹងប្រពន្ធមិនឱ្យរួមរ័ក ។ អធិការនគរបាលស្រុកបវេល លោក អឿម ទិត្យ បានឱ្យដឹងថា ជនដៃដល់ឈ្មោះ ម៉ែ ពៅ អាយុ៤១ឆ្នាំ ឯប្រពន្ធដែលរងរបួសធ្ងន់ឈ្មោះ ញាណ ស៊ីធូន អាយុ៤១ឆ្នាំដូចគ្នា រស់នៅក្នុងភូមិឃុំខាងលើ ។
លោកអធិការបានបន្តថា ជនដៃដល់បានប្រើប្រាស់កាំបិតប្រវែងជិតកន្លះម៉ែត្រចាក់ប្រពន្ធ រួចប្រើពូថៅវាយកញ្ចឹង.កបន្ថែមទៀត បណ្តាលឱ្យរបួសស្ទើរសុសសាច់ ក្នុងបំណងសម្លាប់ តែមិនស្លាប់ គ្រាន់តែរបួសធ្ងន់ ដោយសារខឹងប្រពន្ធមិនឱ្យរួមរ័ក ហើយក៏កើតរោគប្រចណ្ឌ ។ លោកបញ្ជាក់ថា ក្រោយពីបង្កហិង្សាដ៏ធ្ងន់ធ្ងរទៅលើប្រពន្ធ សមត្ថកិច្ចក៏បានចុះអន្តរាគមន៍ឃាត់ខ្លួនជនសង្ស័យភ្លាមៗដែរ ។ សាក្សីនៅកន្លែងកើតហេតុនិយាយថា នៅយប់នោះ គេបានឮសំឡេងគ្រួសារនេះឈ្លោះប្រកែកគ្នា ដែលជាទម្លាប់ដូចសព្វដង ហើយក៏គ្មាននរណាចាប់អារម្មណ៍ដែរ ។
លុះឮសំឡេងប្រពន្ធស្រែកឱ្យជួយ លាយឡំនឹងសំឡេងវាយសំពងផង ទើបអ្នកភូមិនិងសាច់ញាតិរត់ទៅមើល ឃើញស្ត្រីជាប្រពន្ធសន្លប់នៅក្នុងផ្ទះ និងជោកជាំទៅដោយឈាម ពេញរាងកាយទៅហើយ ។ សាក្សីបន្តថា បុរសជាប្ដីដែលមានកាន់កាំបិតក្នុងដៃផង បានដើរចេញពីកន្លែងកើតហេតុ ជាមួយនឹងសម្តីគ្រោតគ្រាតគំរាមប្រពន្ធបន្ថែម ដែលទំនងជាប្រចណ្ឌផង តែបន្តិចក្រោយមកសមត្ថកិច្ចក៏បានឃាត់ខ្លួនប្តីនេះភ្លាមៗដែរ ។ បន្ទាប់ពីត្រូវឃាត់ខ្លួន បុរសនេះហាក់មិនញញើតនឹងឆ្លើយសំណួររបស់សមត្ថកិច្ចទេ អំពីទង្វើរបស់ខ្លួនដែលប្រើហិង្សាដ៏ឃោរឃៅទៅលើប្រពន្ធ ។
ជនសង្ស័យឈ្មោះ ម៉ែ ពៅ បានសារភាពទាំងញញឹមថា ខ្លួនពិតជាបានប្រើកាំបិតចាក់ និងប្រើពូថៅវាយទៅលើប្រពន្ធមែន ដោយសារតែខឹងមិនព្រមឱ្យខ្លួនរួមរ័ក បើទោះជាខ្លួនព្យាយាមលួងលោមជាច្រើនឆ្នាំកន្លងទៅក្ដី ។ ជននេះនិយាយថា ប្រពន្ធខ្លួនហាក់មានចរិតប្លែកក្នុងរយៈពេលជាង៣ឆ្នាំកន្លងទៅនេះ ដែលទំនងជាមានប្រុសថ្មីទៀតផង ព្រោះបានបដិសេធរាល់លើកពេលខ្លួនសុំរួមមេត្រី ។ បុរសនេះបានសារភាពប្រាប់សមត្ថកិច្ចត្រង់ៗថា ខ្លួនមានចេតនាចាក់ និងវាយប្រពន្ធឱ្យស្លាប់ រួចធ្វើអត្តឃាតខ្លួនឯងជាក្រោយ តែពេលខ្លួនយកកាំបិតចាក់ និងយកពូថៅវាយបន្ថែមទៅលើប្រពន្ធនោះមិនទាន់ដឹងស្លាប់ឬរស់ផង ក៏មានអ្នកមកអន្តរាគមន៍ច្រើន ខ្លួនក៏ដើរចេញពីកន្លែងកើតហេតុ ហើយត្រូវសមត្ថកិច្ចមកឃាត់ខ្លួនតែម្តង ។
លោក ជេត វណ្ណនី ស្នងការរងនគរបាលខេត្ត មានប្រសាសន៍ថា ជននេះបានប្រើអំពើហិង្សាដ៏ឃោរឃៅបំផុតទៅលើប្រពន្ធរបស់ខ្លួន ដោយសារភ្លើងប្រចណ្ឌគ្មានហេតុ ផល ។ ពិតមែនតែជនដៃដល់នេះអះអាងថា ខ្លួននឹងសម្លាប់ប្រពន្ធ រួចសម្លាប់ខ្លួនឯងជាក្រោយ តែក្រោយបង្កហិង្សាធ្ងន់ធ្ងរទៅលើប្រពន្ធ ជននេះបានព្យាយាមរត់គេចខ្លួន ហើយលោកស្នងការខេត្តក៏បញ្ជាឱ្យកម្លាំងមូលដ្ឋានតាមចាប់ខ្លួនបានទាំងយប់ភ្លាមៗដែរ ។ លោក ជេត វណ្ណនី បញ្ជាក់ថា ជនដៃដល់ ត្រូវកម្លាំងជំនាញសួរនាំនៅអធិការដ្ឋាននគបាលស្រុកបវេល ដើម្បីកសាងសំណុំរឿងបញ្ជូនទៅសាលាដំបូងខេត្ត ខណៈស្ត្រីជាប្រពន្ធកំពុងសង្គ្រោះបន្ទាន់នៅក្នុងមន្ទីរពេទ្យ ដោយមិនទាន់ដឹងថា អាចមានសង្ឃឹមនៅរស់ ឬយ៉ាងណានោះទេ ៕
ចែករំលែកព័តមាននេះ