រដ្ឋមន្ត្រីការបរទេសរុស្ស៊ី លោកស័រហ្គេយ ឡាវរ៉ូវ ថ្លែងនាថ្ងៃទី១ កញ្ញា ថា ប្រទេសរបស់លោកនឹងមិនធ្វើអន្តរាគមន៍ខាងយោធាចូលក្នុងវិបត្តិបច្ចុប្បន្ននៅអ៊ុយក្រែនឡើយ ដោយលោកស្នើដល់សហរដ្ឋអាមេរិក និងសហភាពអឺរ៉ុប ឱ្យជួយរារាំងក្រុងគៀវកុំឱ្យប្រើប្រាស់អាវុធធុនធ្ងន់ ។
ក្នុងសុន្ទរកថាមួយ ឯវិទ្យាស្ថានទំនាក់ទំនងអន្តរជាតិរបស់រដ្ឋនៅក្រុងមូស្គូ លោក ឡាវរ៉ូវ មានប្រសាសន៍ថា នឹងពុំមានអន្តរាគមន៍យោធាឡើយ ។ យើងគ្រាន់តែចង់ឱ្យមានដំណោះស្រាយដោយសន្តិវិធីមួយចំពោះវិបត្តិដ៏ធ្ងន់ធ្ងរ និងប្រកបដោយសោកនាដកម្មនោះ ។
លោក ឡាវរ៉ូវ ក៏រិះគន់ផងដែរចំពោះការសម្រេចកាលពីថ្ងៃទី៣១ សីហា របស់សហភាពអឺរ៉ុប បន្ថែមទណ្ឌកម្មថ្មីៗលើរុស្ស៊ីរយៈពេល១សប្តាហ៍ទៀត ប្រសិនបើក្រុងមូស្គូបន្តបង្កើនជម្លោះនៅអ៊ុយក្រែន ។យោងតាមលោក ឡាវរ៉ូវ ថា សហរដ្ឋអាមេរិក និងសហភាពអឺរ៉ុប ត្រូវបោះបង់ចោលនយោបាយដាក់ឱសានវាទ គំរាមកំហែង និងដាក់ទណ្ឌកម្មដែលពិតជាគ្មានសង្ឃឹម ប្រសិនបើពួកគេចង់ឱ្យមានកិច្ចសហប្រតិបត្តិការឡើងវិញជាមួយក្រុងមូស្គូ ។
ពេលនិស្សិតម្នាក់នៃវិទ្យាស្ថានខាងលើសួរលោកថា តើរុស្ស៊ីអាចដកខ្លួនថយចេញពីអង្គការពាណិជ្ជកម្មពិភពលោក WTO ដែរទេ ? លោក ឡាវរ៉ូវ ឆ្លើយថា ពិតជាផ្ទុយពីនេះ ។ យើងត្រៀមទុកយន្តការទាំងឡាយរបស់ WTO ពិសេសសម្រាប់ការពារទស្សនៈរបស់យើងលើការហាមឃាត់ការអនុវត្តប្រតិសកម្មនៃបណ្តាបទដ្ឋានដែលហៅថា កញ្ចប់ថាមពលទី៣របស់សហភាពអឺរ៉ុប ។ កញ្ចប់ថាមពលទី៣ របស់សហភាពអឺរ៉ុប ហាមឃាត់់ពួកអ្នកផលិតឧស្ម័ន មិនឱ្យក្លាយខ្លួនផងដែរជាម្ចាស់របស់បណ្តាបំពង់បង្ហូរប្រេង ឬឧស្ម័ន ៕
ចែករំលែកព័តមាននេះ