អ្នកនាំពាក្យម្នាក់របស់ អ.ស.ប ថ្លែងទៅកាន់ក្រុមអ្នកកាសែតថា ទាហានមួកខៀវនៃកងកម្លាំង អ.ស.ប ទទួលបន្ទុកត្រួតពិនិត្យបទឈប់បាញ់គ្នានៅតំបន់បែងចែកព្រំដែននៅខ្ពង់រាបហ្គោឡង់រវាងស៊ីរី និងអុីស្រាអែលត្រូវបានចាប់ខ្លួនកាលពីព្រឹកថ្ងៃទី២៨ សីហា ដោយពួកជនប្រដាប់អាវុធមួយក្រុមនៅជុំវិញទីក្រុង AL QUNAYTIRAH បន្ទាប់ពីការប្រយុទ្ធគ្នាយ៉ាងសាហាវរវាងកងទ័ពស៊ីរី និងពួកជនប្រដាប់អាវុធទាំងនេះមក ។
អ្នកនាំពាក្យរូបនោះលោក STEPHANE DUJARRIC ថ្លែងទៅកាន់សារព័ត៌មានថា ចំណែកទាហានមួកខៀវ៨១នាក់ទៀតពុំអាចចេញពីទីតាំងរបស់ពួកគេស្ថិតនៅជុំវិញក្រុង AR RUWAYHINAH និងក្រុង BURAYQAH។ លោកបន្តថា អ.ស.ប នឹងធ្វើអ្វីគ្រប់យ៉ាងតាមដែលអាចធ្វើទៅបានដើម្បីឱ្យមានការដោះលែងទាហានមួកខៀវទាំងនោះ ហើយឱ្យមានសេរីភាពឡើងវិញក្នុងការធ្វើសកម្មភាពរបស់កងកម្លាំង អ.ស.ប នៅក្នុងតំបន់ប្រតិបត្តិការរបស់គេ ។
កងទាហានមួកខៀវនៃបេសកកម្ម FNUOD ទទួលបន្ទុកត្រួតពិនិត្យការអនុវត្តកិច្ចព្រមព្រៀងឈប់បាញ់គ្នាឆ្នាំ១៩៧៤ រវាងស៊ីរី និងអុីស្រាអែលក្រោយសង្គ្រាមឆ្នាំ១៩៧៣ ។ កាលពីខែមិថុនាកន្លងមកនេះ ក្រុមប្រឹក្សាសន្តិសុខ អ.ស.ប បានសម្រេចពន្យារពេលអាណត្តិនៃបេសកកម្មនោះរយៈពេល៦ខែទៀតរហូតដល់ថ្ងៃទី៣១ ធ្នូ ២០១៤ ។ កាលពីដំណាច់ខែកក្កដា FNUOD មានទាហានមួកខៀវ១.២២៣នាក់មកពីប្រទេស៦ គឺហ្វីដហ្ស៊ី ឥណ្ឌា អៀរឡង់ នេប៉ាល់ ហូឡង់ និងហ្វ៊ីលីពីន ។
យោងតាមសារព័ត៌មានថា ពួកអ៊ិស្លាមនិយមនៃក្រុមរណសិរ្សអាល់ណូស្ត្រា កាលពីថ្ងៃទី២៧ សីហា ដណ្តើមកាន់កាប់បុ៉ស្តិ៍ AL QUNAYTIRAH ដែលកំណត់ពីបន្ទាត់ពុះចែកគ្នារវាងស៊ីរី និងខ្ពង់រាបហ្គោឡង់កាន់កាប់ដោយអុីស្រាអែល។ កងយន្តហោះស៊ីរីបានទម្លាប់គ្រាប់បែកលើទីតាំងនោះកាលពីថ្ងៃទី២៨ សីហា ។ នាថ្ងៃនោះដែរ ទាហានអុីស្រាអែលម្នាក់ និងជនស៊ីវិលម្នាក់ត្រូវរបួសដោយសារការបាញ់គ្រាប់រ៉ុក្កែតមកពីស៊ីរីលើខ្ពង់រាបនេះ ។
កាលពីខែមីនា និងខែឧសភា ឆ្នាំ២០១៣ បណ្តាទាហានមួកខៀវរបស់ FNUOP ធ្លាប់ចាប់ឃុំទុកដោយពួកជនប្រដាប់អាវុធមុនពេលត្រូវដោះលែងវិញដោយសុខសប្បាយ ៕
ចែករំលែកព័តមាននេះ