សប្បុរសជនផ្តល់អំណោយដល់ស្ត្រីផ្ទុកមេរោគអេដស៍ក្រលំបាក
ដោយ ៖ អប្សរា
ថ្ងៃអាទិត្យ ទី២៩ ខែសីហា ឆ្នាំ២០១០ ម៉ោង ១៦:៣៥
សារ៉ាយ
អំណោយទាំងអស់នេះត្រូវបាន អ្នកយកព័ត៌មានកោះសន្តិភាព នាំយកទៅប្រគល់ឱ្យស្រ្តីដែលគួរឱ្យអាណិតនោះដល់លំនៅឋានតែ ម្តង
ខេត្តកណ្តាល ៖ ក្រោយពីកាសែតកោះសន្តិភាពចុះផ្សាយអត្ថបទ អំពីស្ត្រីម្នាក់ផ្ទុកមេរោគអេដស៍ និងកំពុងរស់នៅយ៉ាងលំបាកវេទនា ជាមួយកូនស្រីក្នុងភូមិកោះផុសដីឥដ្ឋ ឃុំដីឥដ្ឋ ស្រុកកៀនស្វាយ ខេត្តកណ្តាល បានធ្វើឱ្យមានការចាប់អារម្មណ៍ និងទទួលបានការអាណិតអាសូរ ពីសប្បុរសជនផ្តល់ជាថវិកា និងសំភារបន្តបន្ទាប់ ។ អំណោយដែលសប្បុរសជនផ្តល់ជូនស្ត្រីផ្ទុកមេរោគអេដស៍នោះរួមមាន ទឹកប្រាក់ចំនួន១០ម៉ឺនរៀល ជាប្រាក់អំណោយតាមរយៈលោកវ៉ាន់ សឿន អនុប្រធានក្រុមការងារស្រុកសំរោង ខេត្តតាកែវ, កុមារាសេង សុខវឌ្ឍនៈ ថវិកា២០.០០០រៀល មី២កេស ទឹកស៊ីអ៊ីវ២យួរ ទឹកត្រី២យួរ ។ អំណោយទាំងអស់នេះត្រូវបាន អ្នកយកព័ត៌មានកោះសន្តិភាព នាំយកទៅប្រគល់ឱ្យស្រ្តីដែលគួរឱ្យអាណិតនោះដល់លំនៅឋានតែម្តង ។
អ្នកស្រី គោ សុភី អ្នកផ្ទុកមេរោគអេដស៍រួមទាំងកូនស្រីបានថ្លែងអំណរគុណយ៉ាងជ្រាលជ្រៅជាទីបំផុត ដល់សប្បុរសជនដែលបានផ្តល់ថវិកា និងសំភារដល់រូបគាត់ ដែលកាយវិការដ៏សប្បុរសធម៌នោះអ្នកស្រី និងកូនស្រីមិនអាចបំភ្លេចបានឡើយ ។ អ្នកស្រីបានបួងសួងសុំឱ្យវត្ថុស័ក្តិសិទ្ធិក្នុងលោកតាមជួយបីបាច់ថែរក្សាដល់សប្បុរសជនទាំងអស់ឱ្យជួបប្រទះតែសេចក្តីសុខចំរើន រកស៊ីមានបាន និងមានអាយុយឺនយូរកុំបីអាក់ខានឡើយ ។ គួររំលឹកថា អ្នកស្រីគោ សុភី មានអាយុ៣៣ឆ្នាំ បានចម្លងមេរោគអេដស៍ពីប្តីអ្នកស្រីអស់រយៈពេលជាយូរឆ្នាំមកហើយ ហើយក្រោយពេលដែលប្តីស្លាប់ទៅអ្នកស្រីរស់នៅយ៉ាងលំបាកវេទនាជាមួយកូនស្រីអាយុ១២ឆ្នាំ ។ ទោះបីជាមានជំងឺក្នុងខ្លួនធ្ងន់ធ្ងរយ៉ាងណាក៏ដោយ ក៏អ្នកស្រីខិតខំតស៊ូក្នុងជីវិត ដោយដើរស៊ីឈ្នួលគេដើម្បីយកកំរៃចិញ្ចឹមជីវិត និងផ្គត់ផ្គង់កូនដែលកំពុងសិក្សា ។
អ្នកស្រីនិយាយថា តាំងពីផ្ទុកមេរោគអេដស៍មក អ្នកស្រីមិនបានទៅទទួលថ្នាំដើម្បីពន្យារជីវិតនោះទេ ពីព្រោះអ្នកស្រីមានការអៀនខ្មាសខ្លាំងណាស់ និងម៉្យាងទៀតដោយសារជីវភាពមានការលំបាកខ្លាំងពេក ទើបគ្មានសោហ៊ុយធ្វើដំណើរទៅរកសេវាថែទាំសុខភាព ។ អ្នកស្រី គោ សុភី បានថ្លែងអំណរគុណផងដែរ ចំពោះសហការីកាសែតកោះសន្តិភាពដែលបានណែនាំ និងបានចុះផ្សាយក្នុងកាសែតអំពីទុក្ខលំបាករបស់អ្នកស្រី រួមទាំងកូនស្រីបានដឹងឮដល់សប្បុរសជន ។ ជាថ្មីម្តងទៀត អ្នកស្រីបានថ្លែងអំណរគុណចំពោះសប្បុរសជន និងបានអំពាវនាវដល់សប្បុរសជនដទៃទៀត មេត្តាសន្តោសប្រណី និងជួយចែករំលែកការលំបាករបស់អ្នកស្រី និងកូនដ៏កំសត់នេះផង ហើយអ្នកស្រីសូមសន្យាថា នឹងយកអំណោយរបស់សប្បុរសជនទៅប្រើប្រាស់សំរាប់ការសិក្សា និងអនាគតកូនស្រី ៕
