ដោយលែងខ្លួនទទេ ហើយកាន់ព្រួញ និងធ្នូ ពួកជនជាតិដើមឥណ្ឌាដែលពុំធ្លាប់ចេញពីព្រៃអាម៉ាហ្សូនទាល់តែសោះនោះ បានភៀសខ្លួនមកកាន់ប្រទេសប៉េរូ ដែលនៅទីនោះពួកគេអាចរងគ្រោះដោយសារការវាយប្រហារនានា ហើយបានចូលមកប្រាស្រ័យទាក់ទងជាមួយក្រុមជនជាតិដើមឯទៀតៗដូចជា ពួកជនជាតិ ASHANINKA នៅភាគខាងជើងប្រេស៊ីលជាដើម ។
នាយកដ្ឋានកិច្ចការជនជាតិដើមប្រេស៊ីល បានចេញផ្សាយវីដេអូមួយដែលបង្ហាញពីពួកជនជាតិដើមឥណ្ឌាចេញមកកាន់ច្រាំងទន្លេ ENVIRA ក្នុងរដ្ឋ ACRE របស់ប្រេស៊ីលជាប់ព្រំដែនជាមួយប៉េរូ ។ វីដេអូបង្ហាញជនជាតិដើម ASHANINKA ម្នាក់ផ្តល់ចេកទុំដល់ជនជាតិដើមឥណ្ឌា២នាក់ដែលពួកគេស្ថិតក្នុងក្រុមនិយាយភាសាប៉ាណូ PANO ។
លោក CARLOS TRAVASSOS ប្រធាននាយកដ្ឋានខាងលើនេះនិយាយថា វីដេអូគឺជាការថតពេលពួកជនជាតិដើមឥណ្ឌានៅដាច់បែកពីគេចូលមកទាក់ទងជាមួយក្រុម FUNAI និងក្រុម ASHANINKA ។គឺនាថ្ងៃទី២៦ មិថុនា ដែលគេឃើញពួកជនជាតិដើមឥណ្ឌា តែងរស់នៅដាច់ពីគេនៅក្នុងព្រៃអាម៉ាហ្សូននោះចេញមកក្រៅព្រៃជាលើកដំបូង។ ពួកគេបាននាំគ្នាឆ្លងកាត់ទន្លេ ENVIRA មកកាន់ខាងមាត់ទន្លេនេះជាកន្លែងរស់នៅរបស់ពួកឥណ្ឌា ASHANINKA ក្នុងភូមិស៊ីមប៉ាទីយ៉ា ។ ពួកគេហួច ហើយធ្វើសំឡេងសត្វ ។ អ្នកជំនាញការខាងជនជាតិដើមឥណ្ឌាក្នុងព្រៃអាម៉ាហ្សូនខាងលើនោះពន្យល់ថា ការបង្ហាញខ្លួននេះហាក់ដូចជាឆាប់ពេក ដោយពួកគេចេញមកមួយភ្លែត ក៏វិលចូលព្រៃវិញ ។
ពួកអ្នកជំនាញការប្រេស៊ីលយល់ថា ពួកឥណ្ឌាទាំងនោះឆ្លងកាត់ព្រំដែនចូលប៉េរូមកពីមានការគាបសង្កត់ពីសំណាក់ពួកចកាប់ឈើលួចលាក់ និងពួកអ្នករត់ពន្ធគ្រឿងញៀនលើដែនដីពួកគេ ។ ម្យ៉ាងទៀត ប្រហែលពួកគេចេញមករកពូថៅ ឆ្នាំង និងរបស់ប្រើប្រាស់ខ្លះទៀតដែលចាំបាច់ ។ ប្រជាជនដើមនោះ ក៏ហាក់ទៅចាប់អារម្មណ៍ចំពោះបច្ចេកវិទ្យាផងដែរ ព្រោះវាសំខាន់សម្រាប់ការរស់នៅរបស់ពួកគេដោយសារមានសង្គ្រាមផ្ទៃក្នុងមួយរវាងពួកគេ ព្រមទាំងមកពីមានការទាក់ទងជាមួយបណ្តាក្រុម ពុំមែនជនជាតិដើម ។ ពួកគេជួបការវាយប្រហារនៃក្រុមមនុស្សខាងក្រៅ ហើយមួយចំនួនត្រូវស្លាប់ដោយសារជំងឺគ្រុនផ្តាសាយ និងជំងឺខាន់ស្លាក់ ។
តំបន់ព្រៃអាម៉ាហ្សូនប្រេស៊ីលមានពួកកុលសម្ព័ន្ធជាច្រើនរស់នៅដាច់ពីពិភពខាងក្រៅ ។ ក្រុម FUNAI មានប្រមាណជា៧៧ក្រុមដែលមួយក្រុមៗមានមនុស្សប្រមាណជា១០០នាក់ ។
យោងតាមអ្នកជំនាញការថា ឆន្ទៈរបស់ជនជាតិដើមទាំងនេះដែលមិនទាក់ទងជាមួយពួកកុលសម្ព័ន្ធដទៃៗទៀត និងពិភពខាងក្រៅ ពិតណាស់មកពីទំនាក់ទំនងកាលពីមុនធ្លាប់ជួបគ្រោះមហន្តរាយដោយសារការលុកលុយជាបន្តបន្ទាប់លើដែនដីពួកគេ និងការបំផ្លាញបរិស្ថានព្រៃឈើរបស់ពួកគេ ៕
ចែករំលែកព័តមាននេះ