ក្រុមហ៊ុន SM Entertainment បាននិយាយជាផ្លូវការអំពីក្រុមចំរៀងបុរសខ្មែរដែលបានចំលងស្លាកយីហោក្រុមហ៊ុនកូរ៉េ SHINee ទាក់ទងទៅនឹងខ្សែអាត់វីដេអូ KH Stars-Ring Ding Dong ត្រូវបានគេដាក់បញ្ចូលក្នុងវ៉េបសាយ Youtube នាពេលថ្មីៗនេះ ។ ក្នុងវីដេអូនេះ មានក្រុមអ្នកចំរៀង និងរាំបទល្បីរបស់ក្រុមចំរៀងបុរសកូរ៉េ SHINee គឺបទ Ring Ding Dong ។ បើទោះបីជាក្រុមនេះ ព្យាយាមធ្វើតាមលំនាំបទចំរៀង និងក្បាច់រាំក្តី តែគុណភាពនៃការសំដែងរបស់គេខុសពីក្រុម SHINee ។ ក្រុមហ៊ុន SM Entertainment បានប្រកាសកាលពីថ្ងៃទី៧ កញ្ញា កន្លងមកថា យើងមិនទាន់បានដំណឹងអ្វីពីនរណាម្នាក់ទេ នៅក្នុងប្រទេសកម្ពុជា អំពីការប្រើប្រាស់បទ Ring Ding Dong ។ ពេលនេះយើងកំពុងស្ថិតក្នុងដំណាក់កាលនៃការទាក់ទងពីបញ្ហាផ្លូវច្បាប់របស់កម្ពុជា និងការអះអាងបន្ថែម បន្ទាប់មកយើងនឹងចាត់វិធានការតាមផ្លូវច្បាប់ផងដែរ ។ ជាងនេះទៅទៀត ក្រុម SHINee នឹងមកសំដែងក្នុងប្រទេសកម្ពុជា នៅខែកុម្ភៈ ឆ្នាំក្រោយនេះ ។
ក្រោយពីលេចឮព័ត៌មានដែលថា ក្រុមហ៊ុនមួយរបស់ប្រទេសកូរ៉េឈ្មោះ SM Entertain-ment មានគំរោងចាត់វិធានការ តាមផ្លូវច្បាប់ ចំពោះក្រុមហ៊ុនផលិតបទចំរៀងនៅកម្ពុជា ដែលបានលួចចំលងបទចំរៀង និងស្ទីលទាំងស្រុងពីក្រុម SHINee ម្ចាស់បទ Ring Ding Dong នោះ លោកគឹម ហេង នាយកផលិតកម្ម KH ដែលផលិតបទចំរៀងល្បីគ្រាន់បើនៅកម្ពុជា បានសំដែងនូវការព្រួយបារម្ភចំពោះវិធានការតាមផ្លូវច្បាប់ ដែលអាចនឹងកើតមានឡើង ។ លោកគឹម ហេង បានបញ្ជាក់ថា ព័ត៌មាននៃការគំរាមប្តឹងនោះ គឺក្រុមហ៊ុនដែលជាម្ចាស់បទ Ring Ding Dong របស់កូរ៉េខាងត្បូង ហើយបទចំរៀង និងស្ទីលរាំត្រូវបានផលិតកម្ម KH និងផលិតកម្មខ្មែរ មួយចំនួនទៀតចំលងយកមកធ្វើជារបស់ក្រុមហ៊ុនខ្លួនឯង ។ ប៉ុន្តែលោកបញ្ជាក់ថា ទោះបីជាមានការចំលងយ៉ាងណាក៏ដោយចុះ ក៏កំរិតនៃបទភ្លេង និងចំរៀងរបស់យើង គឺមិនអាចប្រៀបឬដូចទាំងស្រុងទៅនឹងបទចំរៀងដើមរបស់ផលិតកម្មកូរ៉េនោះទេ ។
លោកបន្តថា ធម្មតាការប្តឹងផ្តល់តាមផ្លូវច្បាប់អ្នកណាក៏មានការព្រួយបារម្ភដែរ ប៉ុន្តែលោកគិតថា យើងរង់ចាំទទួលនូវបណ្តឹង ប្រសិនបើមាន ព្រោះថា បើចង់គេចក៏គេចមិនបានដែរ ។ ម្យ៉ាងទៀត ការលួចចម្លងទាំងបទចំរៀង និងស្ទីលរាំពីបរទេសនោះ គឺមិនមែនតែផលិតកម្ម KH មួយនោះទេ គឺស្ទើរតែទាំងអស់ទៅហើយ សំរាប់ផលិតកម្មនៅស្រុកខ្មែរ ដូចជាការចម្លងតាមបទ ថៃ កូរ៉េ ចិន អង់គ្លេសជាដើម ។ ទន្ទឹមនោះ ការចម្លងបទចំរៀង ចម្លងស្ទីល គឺអាចមាននៅគ្រប់ប្រទេសមិនថាតែប្រទេសយើងមួយទេ តែបញ្ហានៅពីក្រោយការចម្លងនោះខុសគ្នាយ៉ាងណាលោកក៏មិនបានដឹងដែរ ។ លោកបន្តទៀតថា ចំពោះទីផ្សារស្រុកខ្មែរវាលំបាកណាស់សំរាប់ការនិពន្ធបទភ្លេងដោយខ្លួនឯង ហើយលោកគិតថា បើសិនជាគេមិនប្តឹងក៏វានឹងរលំដោយខ្លួនឯង ដោយសារក្ស័យធនដែរ ។ ទោះបីជាយ៉ាងណាក៏ដោយ លោកគឹម ហេង បានសំណូមពរដល់ក្រុមហ៊ុនកូរ៉េដែលត្រៀមប្តឹងផលិតកម្ម KH រួមទាំងផលិតកម្មផ្សេងទៀតឱ្យពិចារណាឡើងវិញ ព្រោះថា កម្ពុជាកំពុងស្ថិតលើផ្លូវអភិវឌ្ឍន៍ដូចនេះ មិនអាចចៀសផុតឡើយ ពីការទទួលវប្បធម៌បរទេស ហើយការខិតខំប្រឹងប្រែងផលិតបទចំរៀងបំរើអារម្មណ៍ទស្សនិកជនក៏នៅមានកំរិត ។ ប៉ុន្តែលោកក៏មិនបានឃាត់ថា មិនឱ្យប្តឹងនោះដែរ ព្រោះជាសិទ្ធិរបស់ក្រុមហ៊ុនកូរ៉េ ។
គួររំលឹកថា ថ្មីៗនេះលេចឮព័ត៌មានថា ក្រុមហ៊ុន SM Entertainment នៅប្រទេសកូរ៉េខាងត្បូង នឹងចាត់វិធានការតាមផ្លូវច្បាប់ ចំពោះក្រុមហ៊ុនផលិតបទចំរៀងនៅកម្ពុជា ដែលបានចម្លងស្ទីលទាំងស្រុងពីក្រុម SHINee ម្ចាស់បទ Ring Ding Dong ។ ដំបូងបង្អស់ក្រុមហ៊ុនរបស់កូរ៉េខាងត្បូងនេះចាប់អារម្មណ៍ផលិតកម្ម KH ដែលបានចម្លងបទ Ring Ding Dong មកច្រៀង និងសំដែងដោយក្រុមតារា៤រូប គឺលោកម៉ៃ សុគន្ធ, អាន់ដា, ហមចំណាប់ និងអេវីតា ។ បទ Ring Ding Dong របស់ផលិតកម្ម KH បានចេញលក់ជាវីស៊ីឌី នៅលើទីផ្សារកាលពីថ្ងៃទី២៦ កក្កដា ឆ្នាំ២០១០ ។
កន្លងមក អ្នកនិយមចូលចិត្តបទចំរៀងនៅកម្ពុជា បានធ្វើការរិះគន់យ៉ាងចាស់ដៃផងដែរ ចំពោះម្ចាស់ផលិតកម្មនៅកម្ពុជា ដែលតែងតែចំលងបទពីគេទាំងដុលដោយគ្មានការកែច្នៃអ្វីទាំំងអស់ ទាំងបទភ្លេង និងទំនុកច្រៀង រួមទាំងស្ទីល ។ អ្វីដែលធ្ងន់ធ្ងរជាងគេនោះ គឺបទចំរៀងដែលចម្លងពីគេហើយនោះអ្នកខ្លះយកមកដាក់ឈ្មោះខ្លួនឯងថែមទៀត ។ យ៉ាងណាក៏ដោយចុះ អ្នកផលិតបទចំរៀងគួរតែចេះប្រើប្រាស់ខួរក្បាលខ្លួនឯង ដើម្បីបង្ហាញស្នាដៃខ្លួនឯង និងចៀសវាងការចម្លងបទចំរៀងគេទាំងដុលដែលជាការបង្ហាញនូវភាពទន់ខ្សោយនៃការអភិវឌ្ឍវិស័យសិល្បៈនៅកម្ពុជា ៕
ចែករំលែកព័តមាននេះ