ជម្លោះរវាងអុីស្រាអែល និងក្រុមហាម៉ាស់ប៉ាឡេស្ទីន នាថ្ងៃទី២៩ កក្កដា មានការកើនកម្តៅខ្លាំងជាថ្មី ជាមួយការវាយប្រហារពេលយប់មិនឈប់ឈរលើជ្រោយហ្គាហ្សាទោះជាផ្ទះរបស់មេដឹកនាំក្រុមហាម៉ាស់ លោក អុីស្មាអែល ហានីយេ ដែលគ្មានមនុស្សនៅក៏រងការវាយប្រហារដែរ ។
ការទម្លាក់់គ្រាប់បែក និងការបាញ់កាំភ្លើងធំរបស់អុីស្រាអែល កាលពីព្រឹកថ្ងៃទី២៩ កក្កដា មានសភាពខ្លាំងក្លាបំផុតប្រឆាំងចលនាហាម៉ាស់ ខណៈទាហានអុីស្រាអែល១០នាក់ ត្រូវសម្លាប់កាលពីថ្ងៃទី២៨ កក្កដា ។អ្នកកាសែតម្នាក់របស់ AFP និយាយថា ការវាយប្រហារលើកនេះរបស់អុីស្រាអែល គឺខ្លាំងក្លាបំផុតពុំធ្លាប់មានចាប់តាំងពីច្រើនថ្ងៃមកហើយ បណ្តាលឱ្យមនុស្សស្លាប់២៦នាក់ ក្នុងនោះមាននារីយ៉ាងតិច៩នាក់ និងកុមារ៤នាក់ ។
នាព្រឹកថ្ងៃទី២៩ កក្កដា នោះ គ្រាប់រ៉ុក្កែត ប្រមាណជា១០គ្រាប់ ក៏បាញ់ដាក់អុីស្រាអែលដែរ ក្នុងនោះ២គ្រាប់ស្ទាក់កម្ទេចដោយមីសុីល Iron Dôme ។ការបាត់បង់របស់កងទ័ពអុីស្រាអែល គឺធ្ងន់ធ្ងរបំផុតកាលពីថ្ងៃទី២៨ កក្កដា ជាមួយទាហានស្លាប់១០នាក់ រយៈពេលមិនដល់២៤ម៉ោងផង គឺ៤នាក់ស្លាប់ដោយសារការបាញ់គ្រាប់កាំភ្លើងត្បាល់របស់ប៉ាឡេស្ទីន នៅភាគខាងត្បូងអុីស្រាអែល ចំណែក៥នាក់ស្លាប់ក្នុងការប្រយុទ្ធគ្នាជាមួយកងកុំម៉ង់ដូប៉ាឡេស្ទីនមួយ ដែលជ្រៀតចូលតាមរូងក្រោមដីមួយនៅ Nahal Oz ហើយទាហានអុីស្រាអែលម្នាក់ទៀតស្លាប់ក្នុងការប្រយុទ្ធនៅភាគខាងត្បូងជ្រោយហ្គាហ្សា ។
យោងតាមតុល្យការថ្មីរបស់អ.ស.ប ថា ការវាយលុករបស់អុីស្រាអែល បណ្តាលឱ្យជនប៉ាឡេស្ទីនស្លាប់ប្រមាណ១.១១៣នាក់ ក្នុងនោះជាង៣/៤ ជាជនស៊ីវិល ហើយជនប៉ាឡេស្ទីនជាង៦.២០០នាក់ទៀត ត្រូវរបួសនៅជ្រោយហ្គាហ្សា ដែលនៅទីនោះ ការបំផ្លាញមានលក្ខណៈធំធេងបំផុត ។ ខាងអុីស្រាអែល មានជនស៊ីវិលស្លាប់៣នាក់ និងស្លាប់ទាហាន៥៣នាក់ ៕
ចែករំលែកព័តមាននេះ