សាន់ហ្វ្រាន់សីុស្កូ ៖ តាមរបាយការណ៍ដែលបានចេញផ្សាយដោយក្រុមហ៊ុនFacebook កាលពីថ្ងៃពុធ បានឱ្យដឹងថា ប្រាក់ចំណេញប្រចាំត្រីមាសទី២ ឆ្នាំ២០១៤ របស់ខ្លួនកើនឡើងទ្វេដង ក្នុងនោះគឺទទួលបានកំណើនដ៏ធំធេងនៅក្នុងចំណូលផ្សព្វផ្សាយពាណិជ្ជកម្មនិងកើនឡើងនៃបរិមាណអ្នកប្រើប្រាស់ ។
បណ្ដាញព័ត៌មានសង្គមធំបំផុតលើពិភពលោកមួយនេះបានបង្ហើបឱ្យដឹងថា ប្រាក់ចំណេញសុទ្ធរបស់ខ្លួនបានលោតផ្លោះរហូតដល់ទៅ៧៩១លានដុល្លារអាមេរិក នៅក្នុងអំឡុងពេល៣ខែគិតត្រឹមដំណាច់ខែមិថុនា កន្លងមកនេះគឺកើនឡើង១៣៨%ពីបរិមាណដែលរកបាន៣៣៣លានដុល្លារ កាលពីអំឡុងពេលដូចគ្នាឆ្នាំ២០១៣ ។
នៅគ្រានោះដែរចំណូលរបស់ក្រុមហ៊ុនឡើងស្រឺតៗដល់ទៅ២,៩១ពាន់លានដុល្លារ ហើយប្រមាណជា៦២% នៃថវិកានោះគឺទទួលបានពីការផ្សាយពាណិជ្ជកម្មបម្រើឱ្យការប្រើប្រាស់លើគ្រឿងទូរស័ព្ទដូចជា ទូរស័ព្ទស្មាតហ្វូនឬកុំព្យូទ័រTablet ជាដើម ។ ចំណែកចំណូលផ្សាយពាណិជ្ជកម្មសរុបបានកើនឡើង៦៧% បរិមាណ២,៦៨ពាន់លានដុល្លារកាលពីឆ្នាំទៅ ។ រីឯបិរមាណអ្នកដែលទៅទស្សនាបណ្ដាញសង្គមមួយនេះតាមប្រព័ន្ធអីុនធើរណេតលោតម្ដងៗយ៉ាងហោចណាស់កើនឡើង១,៣២ពាន់លាននាក់កើនឡើង១៤%ពីអំឡុងពេលដូចគ្នាកាលពីឆ្នាំ២០១៣ ។ បរិមាណនៃអ្នកប្រើប្រាស់សកម្មភាពលើទូរស័ព្ទដៃកើន១,០៧ពាន់លាននាក់។
តាមការព្យាកររបស់ក្រុមហ៊ុនអ្នកតាមដានទីផ្សារeMarketer បានឱ្យដឹងថា ទីផ្សារផ្សាយពាណិជ្ជកម្មលើទូរស័ព្ទចល័តនៅទូទាំងពិភពលោកគួរតែបង្កើនជិត៨៥%នៅឆ្នាំ២០១៤ នេះឬស្មើនឹងតម្លៃទឹកប្រាក់៣២,៧១ពាន់លានដុល្លារ ។ ដោយឡែកក្រុមហ៊ុនFacebookទំនងជាបន្ថយការចំណាយលើការផ្សាយពាណិជ្ជកម្មលើគ្រឿងទូរស័ព្ទសម្រាប់ឆ្នាំនេះ២២,៣%ជាមួយនឹងភាគហ៊ុនរបស់Google ដែលគេរំពឹងថានៅតែមានអត្រា៥០%ដដែល ៕
ចែករំលែកព័តមាននេះ