សារព័ត៌មានក្នុងស្រុករាយការណ៍ថា មនុស្សយ៉ាងតិច៧នាក់ ក្នុងនោះមានមេធាវីម្នាក់ និងប៉ូលិសម្នាក់បានត្រូវស្លាប់ ហើយមនុស្សច្រើននាក់ទៀត ត្រូវរបួសកាលពីថ្ងៃទី២៣ កក្កដា ដោយសារការបាញ់ប្រហារដាច់ដោយឡែកពីគ្នាទាំងឡាយនៅទីក្រុងកំពង់ផែការ៉ាជី ភាគខាងត្បូងប៉ាគីស្ថាន ។
ទីភ្នាក់ងារសារព័ត៌មានប៉ាគីស្ថាន Ary News រាយការណ៍ថា ពួកជនប្រដាប់អាវុធមិនស្គាល់មុខបានបាញ់ប្រហារលើរថយន្តប៉ូលិស១គ្រឿង ដោយសម្លាប់មេប៉ូលិសម្នាក់ ហើយប៉ូលិស៥នាក់ទៀតត្រូវរបួស ។ ចំណែកបុរសម្នាក់ស្លាប់ ដោយសារការបាញ់ប្រហារមួយ រួចសាកសពបុរសវ័យក្មេងម្នាក់ ត្រូវបានរកឃើញនៅផ្ទះរបស់គេឯសង្កាត់លីយ៉ាកាតាបាដ ។ ចំណែកមេធាវីម្នាក់ ស្លាប់ពេលពួកជនប្រដាប់អាវុធមិនស្គាល់អត្តសញ្ញាណ បាញ់ប្រហារលើរថយន្ត១គ្រឿងនៅតំបន់ហ្គុលសាន អុី អុីនបាល់ ក្រុងការ៉ាជី ។ រីឯបុរសម្នាក់ស្លាប់នៅអូរ៉ាន់ហ្ស៊ី ហើយនារីម្នាក់ត្រូវគេធ្វើឃាតនៅប៊ីឡាល់ កូឡូនី ។
កងកម្លាំងប៉ូលិសបានចាប់ខ្លួនមនុស្ស១២នាក់ ក្នុងប្រតិបត្តិការតាមរុករកពួកខ្មាន់កាំភ្លើង ។ មុននេះ ប្រមុខប៉ូលិសក្រុងការ៉ាជី លោក Ghulam Qadir ថ្លែងថាមនុស្ស៤០នាក់ជាសមាជិកអង្គការហាមឃាត់មួយ គឺអង្គការ Tehreeh -E- Taliban Pakistan (TTP) ជាអ្នកចូលរួមក្នុងការសម្លាប់ប៉ូលិសទាំងឡាយក្នុងទីក្រុងការ៉ាជី ៕
ចែករំលែកព័តមាននេះ