រាជធានីភ្នំពេញ ៖ ដោយមានការគាំទ្រពីបណ្ដាដៃគូនិងអ្នកទស្សនាជាច្រើន លើកម្មវិធី វិថីហិរញ្ញវត្ថុ របស់ក្រុមហ៊ុន អប្សរា មេឌាសឺវីស បានសម្រេចបើកសម្ពោធជាផ្លូវការ នូវកម្មវិធីវិថីហិរញ្ញវត្ថុសម្រាប់រដូវកាលទី…
រាជធានីភ្នំពេញ ៖ ដោយមានការគាំទ្រពីបណ្ដាដៃគូនិងអ្នកទស្សនាជាច្រើន លើកម្មវិធី វិថីហិរញ្ញវត្ថុ របស់ក្រុមហ៊ុន អប្សរា មេឌាសឺវីស បានសម្រេចបើកសម្ពោធជាផ្លូវការ នូវកម្មវិធីវិថីហិរញ្ញវត្ថុសម្រាប់រដូវកាលទី ៣ បន្តទៀត ។ ការបើកសម្ពោធកម្មវិធីហិរញ្ញវត្ថុរដូវកាលទី ៣ នេះ ធ្វើឡើងកាលពីព្រឹកថ្ងៃទី ៣០ ខែកញ្ញា ឆ្នាំ ២០២៥ នៅសណ្ឋាគារ Fairfield by Marriott ដោយមានការចូលរួមពីតំណាងធនាគារជាតិនៃកម្ពុជា ប្រធានសមាគមមីក្រូហិរញ្ញវត្ថុកម្ពុជា តំណាងសមាគមធនាគារនៅកម្ពុជា និងតំណាងធនាគារជាច្រើនទៀត ។
នៅក្នុងឱកាសនេះលោក លឹម ឃុនស្រ៊ុន អគ្គនាយកប្រតិបត្តិនៃក្រុមហ៊ុន អប្សរា មេឌាសឺវីស បានមានប្រសាសន៍ថា កម្មវិធីវិថីហិរញ្ញវត្ថុ ត្រូវបានផ្ដួចផ្ដើម និងរៀបចំឡើងដោយក្រុមហ៊ុនអប្សរា មេឌា សឺវីស ( AMS ) ដោយចាប់ផ្ដើមដំបូងនៅឆ្នាំ ២០២៣ ក្រោមកិច្ចសហការយ៉ាងជិតស្និតជាមួយស្ថាប័នហិរញ្ញវត្ថុនៅកម្ពុជា ដូចជាសមាគមធនាគារនៅកម្ពុជា ( ABC) សមាគមមីក្រូហិរញ្ញវត្ថុកម្ពុជា ( CMA ) និងក្រុមហ៊ុនស៊ីប៊ីស៊ី ព្រមទាំងមានការទទួលស្គាល់ជាផ្លូវការដោយធនាគារជាតិនៃកម្ពុជាផងដែរ ។
លោកបានបង្ហាញពីគោលបំណងជារួមរបស់កម្មវិធី គឺប្រមូលផ្ដុំតួអង្គសំខាន់ៗក្នុងវិស័យហិរញ្ញវត្ថុ ទាំងស្ថាប័នឯកជន និងស្ថាប័នរដ្ឋ ដើម្បីរួមគ្នាជំរុញ និងបញ្ជ្រាបការយល់ដឹងផ្នែកហិរញ្ញវត្ថុដល់ប្រជាជនទូទាំងប្រទេសកម្ពុជា ។ ជាលទ្ធផល គម្មវិធី វិថីហិរញ្ញវត្ថុ រដូវកាលទី ១ និងទី ២ ទទួលបានការគាំទ្រយ៉ាងច្រើនពីសំណាក់ទស្សនិកជន តាមរយៈយុទ្ធនាការផ្សព្វផ្សាយយ៉ាងទូលំទូលាយ នៅលើបណ្ដាញព័ត៌មាន AMS ដោយប្រើប្រាស់បណ្ដាញសង្គម FB , Tik Tok , Youtube , Website រួមទាំងប្រព័ន្ធវិទ្យុ FM97, FM99 និងទូរទស្សន៍អប្សរាផងដែរ ។
លោក ឃុន ស្រ៊ុន បានបន្ថែមថា សម្រាប់មាតិកានារដូវកាលទី ២ កន្លងទៅ យើងបានផលិតនិងផ្សព្វផ្សាយដោយផ្តោតលើប្រធានបទគោលចំនួន ៤ រួមមាន ៖ ការគ្រប់គ្រងបំណុល ការសន្សំ កិច្ចគាំពារអតិថិជន និងសន្តិសុខបច្ចេកវិទ្យាហិរញ្ញវត្ថុ ។ ដោយឡែកក្នុងរដូវកាលទី៣ យើងនឹងពង្រីកកិច្ចពិភាក្សាទៅលើប្រធានបទមួយចំនួនបន្ថែមទៀតដូចជា ការរៀបចំផែនការហិរញ្ញវត្ថុរបស់បុគ្គល និងគ្រួសារ ការគិតគូរអំពីសេវាធានារ៉ាប់រង ដើម្បីរក្សាសុវត្ថិភាពហិរញ្ញវត្ថុគ្រួសារ ការកសាងប្រវត្តិឥណទានផ្ទាល់ខ្លួនជាដើម ។
លោកស្រី ម៉ក់ រស្ម៊ី អគ្គនាយករងបទប្បញ្ញត្តិ និងបរិយាបន្នហិរញ្ញវត្ថុ និងជាប្រធាននាយកដ្ឋានបទប្បញ្ញត្តិ បានមានប្រសាសន៍ថា បរិយាបន្នហិរញ្ញវត្ថុ បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចនិងសង្គម ។ ការទទួលបាន និងប្រើប្រាស់សេវាហិរញ្ញវត្ថុផ្លូវការទាន់ពេលវេលា មានតម្លៃសមរម្យ និងមានកិច្ចការពារតាមផ្លូវច្បាប់ត្រឹមត្រូវ បានចូលរួមជំរុញកំណើនសេដ្ឋកិច្ចគ្រួសារ និងកាត់បន្ថយភាពក្រីក្រ តាមរយៈការផ្សាភ្ជាប់ប្រជាពលរដ្ឋជាមួយសកម្មភាពសេដ្ឋកិច្ច ការត្រៀមខ្លួនចំពោះការចំណាយមិនបានត្រៀមទុក ការទទួលបានការអប់រំប្រសើរជាងមុន ការការពារខ្លួនពីការឆបោកឬការក្លែងបន្លំ និងការកាត់បន្ថយវិសមភាពយេនឌ័រ ។ ឧបសគ្គចម្បងមួយក្នុងចំណោមឧបសគ្គជាច្រើន ដែលបាននិងកំពុងរារាំងបរិយាបន្នហិរញ្ញវត្ថុនៅកម្ពុជា គឺកម្រិតទាបនៃចំណេះដឹងផ្នែកហិរញ្ញវត្ថុរបស់ប្រជាពលរដ្ឋទូទៅ ។
លោកស្រីបន្តថា បរិយាបន្នហិរញ្ញវត្ថុ បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច និងសង្គម ។ ការទទួលបាន និងប្រើប្រាស់សេវាហិរញ្ញវត្ថុផ្លូវការទាន់ពេលវេលា មានតម្លៃសមរម្យ និងមានកិច្ចការពារតាមផ្លូវច្បាប់ត្រឹមត្រូវ បានចូលរួមជំរុញកំណើនសេដ្ឋកិច្ចគ្រួសារ និងកាត់បន្ថយភាពក្រីក្រ តាមរយៈការផ្សាភ្ជាប់ប្រជាពលរដ្ឋជាមួយសកម្មភាពសេដ្ឋកិច្ច ការត្រៀមខ្លួនចំពោះការចំណាយមិនបានត្រៀមទុក ការទទួលបានការអប់រំប្រសើរជាងមុន ការការពារខ្លួនពីការឆបោកឬការក្លែងបន្លំ និងការកាត់បន្ថយវិសមភាពយេនឌ័រ ។ ឧបសគ្គចម្បងមួយក្នុងចំណោមឧបសគ្គជាច្រើន ដែលបាននិងកំពុងរារាំងបរិយាបន្នហិរញ្ញវត្ថុនៅកម្ពុជា គឺកម្រិតទាបនៃចំណេះដឹងផ្នែកហិរញ្ញវត្ថុរបស់ប្រជាពលរដ្ឋទូទៅ ។
ទោះជាយ៉ាងនេះក្តី យើងសង្កេតឃើញថា បញ្ហាកម្ចីក្រៅផ្លូវការ ការក្លែងបន្លំ និងការឆបោកផ្នែកហិរញ្ញវត្ថុ បាននិងកំពុងកើនមានឡើងតាមរូបភាពផ្សេងៗជាច្រើន ដែលនេះសរបញ្ជាក់ឱ្យឃើញថាការផ្សព្វផ្សាយ និងលើកកម្ពស់ចំណេះដឹងផ្នែកហិរញ្ញវត្ថុរបស់យើងនៅមានកម្រិតនៅឡើយ ហើយយើងនៅការងារជាច្រើនទៀតដែលត្រូវបន្តអនុវត្តរួមគ្នា ។ ក្នុងន័យនេះ វត្តមាននៃកម្មវិធី “វិថីហិរញ្ញវត្ថុ” ដែលផ្តួចផ្តើមការផលិតដោយ ក្រុមហ៊ុន អប្សរា មេឌា សឺវីស ក្រោមការគាំទ្រពីសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងក្រុមហ៊ុន ក្រេឌីត ប្យួរ៉ូ (ខេមបូឌា) ខូអិលធីឌី នៅគ្រប់រដូវកាល ពិតជាមានសារៈសំខាន់ក្នុងការចូលរួមលើកកម្ពស់ចំណេះដឹងផ្នែកហិរញ្ញវត្ថុជូនប្រជាពលរដ្ឋបានកាន់តែទូលំទូលាយ ។ កម្មវិធីនេះក៏ជាសក្ខីកម្មមួយនៃកិច្ចខិតខំប្រឹងប្រែងរួមគ្នារវាងវិស័យឯកជននិងសាធារណៈ ស្របតាមគោលនយោបាយរបស់រាជរដ្ឋាភិបាល ក្នុងការជំរុញកម្រិតបរិយាបន្នហិរញ្ញវត្ថុ លើកកម្ពស់ចំណេះដឹងផ្នែកហិរញ្ញវត្ថុ និងការពង្រឹងកិច្ចការពារអតិថិជន ។
លើសពីនេះ ការចូលរួមរបស់ក្រុមហ៊ុន អប្សរា មេឌា សឺវីស ដែលជាក្រុមហ៊ុនសារព័ត៌មានប្រកបដោយប្រជាប្រិយភាព ការច្នៃប្រឌិត និងការទុកចិត្តខ្ពស់ពីសំណាក់សាធារណជនទូទៅ រួមផ្សំនឹងការប្រើប្រាស់បច្ចេកវិទ្យាព័ត៌មាននិងទំនាក់ទំនង (ICT) និងបណ្ដាញសង្គមនានា ពិតជាកំលាំងចលករយ៉ាងសំខាន់ក្នុងការជួយដល់សាធារណជនទទួលបាននូវព័ត៌មានផ្លូវការដែលអាចជឿទុកចិត្តបាន សំដៅធ្វើការសម្រេចចិត្តកាន់តែប្រសើរលើការប្រើប្រាស់ផលិតផលនិងសេវាហិរញ្ញវត្ថុប្រកបដោយសុវត្ថិភាព និងប្រសិទ្ធភាពខ្ពស់ ។
លោកស្រីជឿជាក់យ៉ាងមុតមាំថា កម្មវិធី “វិថីហិរញ្ញវត្ថុ រដូវកាលទី ៣” នឹងក្លាយជាមធ្យោបាយផ្សព្វផ្សាយតាមបែបឌីជីថលដែលមានប្រសិទ្ធភាព ព្រមទាំងនឹងចូលរួមពង្រីកវិសាលភាពនៃការចែករំលែកចំណេះដឹង បទពិសោធន៍ និងសុវត្ថិភាពពាក់ព័ន្ធនឹងការប្រើប្រាស់សេវាហិរញ្ញវត្ថុទៅកាន់ប្រជាពលរដ្ឋគ្រប់ស្រទាប់វណ្ណៈ ៕ អត្ថបទសហការ
ចែករំលែកព័តមាននេះ