កម្ពុជា-ចិន រួមគ្នាបណ្តុះបណ្តាលមូលធនមនុស្ស និងអ្នកជំនាញ ផ្នែកថាមពល តាមរយៈកម្មវិធីប្រកួតជំនាញបច្ចេកទេស
ខេត្តពោធិ៍សាត់ ៖ ឯកឧត្តម ម៉ុល វិបុល អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ…
ខេត្តពោធិ៍សាត់ ៖ ឯកឧត្តម ម៉ុល វិបុល អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញបើក និងបិទកម្មវិធីប្រកួតប្រជែងជំនាញ “ពានរង្វាន់អគ្គិសនីបំភ្លឺផ្លូវពាណិជ្ជកម្ម” ឆ្នាំ២០២៥ ដែលសហការរៀបចំដោយសមាគម នៃសហគ្រាសវិនិយោគ ថាមពលអគ្គិសនីចិននៅកម្ពុជា និងវិទ្យាស្ថានពហុបច្ចេកទេស ខេត្តពោធិ៍សាត់ ពីថ្ងៃទី២៥ ខែកញ្ញា រហូតដល់ថ្ងៃទី២៧ ខែកញ្ញា ឆ្នាំ២០២៥ ។
កម្មវិធីដែលប្រព្រឹត្តទៅនៅវិទ្យាស្ថានពហុបច្ចេកទេសខេត្តពោធិ៍សាត់ មានវត្តមានជាសហអធិបតីពីសំណាក់ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ ព្រមទាំងវត្តមានចូលរួមពីឯកឧត្តមទីប្រឹក្សាក្រសួងរ៉ែ និងថាមពល, ប្រធានមន្ទីរការងារ និងបណ្តុះបណ្តាលវិជ្ជាជីវៈ, តំណាងអគ្គិសនីកម្ពុជា, លោកប្រធានសភាពាណិជ្ជកម្មចិននៅកម្ពុជា, លោកប្រធានសមាគមសហគ្រាសអគ្គិសនី នៃសភាពាណិជ្ជកម្មចិននៅកម្ពុជា, តំណាងវិស័យឯកជន អាជ្ញាធរក្រោមជាតិ និងលោកគ្រូ អ្នកគ្រូ សិស្សានុសិស្ស នៃវិទ្យាស្ថានពហុបច្ចេកទេសខេត្តពោធិ៍សាត់ ។
ការប្រកួតប្រជែងជំនាញបច្ចេកទេសនេះ ធ្វើឡើងបាន ២ លើក រួចមកហើយ ដោយលើកទី១ បានប្រព្រឹត្តទៅនៅខេត្តស្ទឹងត្រែង និងលើកទី២ នៅខេត្តកោះកុង និងលើកទី៣ គឺប្រព្រឹត្តទៅនៅខេត្តពោធិ៍សាត់។ ព្រឹត្តការណ៍នេះ បង្កើតឡើងដើម្បីជាឱកាសជួបជុំគ្នារវាងអ្នកជំនាញផ្នែកថាមពលអគ្គិសនីកម្ពុជា-ចិន ជាការបង្ហាញនូវទេពកោសល្យ ការចែករំលែកបទពិសោធ និងក៏ជាការអនុវត្តជាក់ស្តែង នៃកិច្ចសហប្រតិបត្តិការត្បូងពេជ្រក្នុងវិស័យថាមពលអគ្គិសនី រវាងប្រទេសទាំងពីរ ក្រោមគំនិតផ្តួចផ្តើម “ខ្សែក្រវ៉ាត់និងផ្លូវ” ។
បេក្ខជនដែលបានចូលរួមប្រកួតមាន២ក្រុម៖ ជនជាតិចិន១ក្រុម និងជនជាតិខ្មែរ១ក្រុម និងបានទទួលជ័យលាភីទៅតាមផ្នែកនីមួយៗ នៃវិញ្ញាសាសម្រាប់ការប្រកួតរបស់អ្នកជំនាញបច្ចេកទេសនៃជនជាតិទាំងពីរ។ វិញ្ញសានៃការប្រកួតប្រជែងគឺមានបីធំៗរួមមាន ការប្រឡងទ្រឹស្តី ការអនុវត្តជាក់ស្តែង និងសំណួរចម្លើយ ។
ជាលទ្ធផលនៃការប្រកួត គណៈកម្មការបានរកឃើញម្ចាស់ជ័យលាភី ដែលជាក្រុមប្រកួតរវាងជនជាតិខ្មែរទទួលបានពានរង្វាន់លេខ១ ចំនួន ២រូប, លេខ២ ចំនួន២រូប និងលេខ៣ ចំនួន៤រូប។ រីឯម្ចាស់ជ័យលាភីសម្រាប់ក្រុមប្រកួតរវាងជនជាតិចិន ទទួលបានពានរង្វាន់លេខ១ ចំនួន ១រូប, លេខ២ ចំនួន៣រូប និងលេខ៣ ចំនួន៥រូប ។
ឯកឧត្តមអនុរដ្ឋលេខាធិការថ្លែងថា កម្មវិធីប្រកួតជំនាញបច្ចេកទេសឆ្នាំ២០២៥នេះ គឺជាការធ្វើសមាហរណកម្មឧស្សាហកម្មនិងការអប់រំនៅវិទ្យាស្ថានពហុបច្ចេកទេសខេត្តពោធិ៍សាត់ ដែលទីតាំងនេះនឹងក្លាយជាទីកន្លែងបណ្តុះបណ្តាលយុវជនដែលជាមូលធនមនុស្ស និងអ្នកជំនាញផ្នែកថាមពលកម្ពុជា-ចិន និងសម្រាប់កិច្ចសហការ រវាងសាលាបច្ចេកវិទ្យានៃប្រទេសទាំងពីរ ៕ អត្ថបទសហការ
ចែករំលែកព័តមាននេះ