រាជធានីភ្នំពេញ៖ ប្រជាពលរដ្ឋដែលមានជម្ងឺភ្នែក មកពីស្រុកសន្ទុក ខេត្តកំពង់ធំ ប្រមាណ ៣០០ នាក់ ទទួលបានការវះកាត់ភ្នែកកន្ទុយថ្លែន និង បកភ្នែកឡើងបាយ…
រាជធានីភ្នំពេញ៖ ប្រជាពលរដ្ឋដែលមានជម្ងឺភ្នែក មកពីស្រុកសន្ទុក ខេត្តកំពង់ធំ ប្រមាណ ៣០០ នាក់ ទទួលបានការវះកាត់ភ្នែកកន្ទុយថ្លែន និង បកភ្នែកឡើងបាយ នៅមន្ទីរពេទ្យមិត្តភាពខ្មែរ-សូវៀត ដោយឥតគិតថ្លៃ ពីក្រុមគ្រូពេទ្យមនុស្សធម៌មកពីប្រទេសអូស្ត្រាលី ក្រោមការជួយឧបត្ថម្ភគាំទ្រ ពីលោកជំទាវបណ្ឌិត ជា សិរី ។
ឯកឧត្តម រ័ត្ន សុវណ្ណារៈ ទេសាភិបាលរង តំណាងដ៏ខ្ពង់ខ្ពស់លោកជំទាវ ជា សិរី ទេសាភិបាលធនាគារជាតិនៃកម្ពុជា នៅថ្ងៃទី១៦ ខែសីហា ឆ្នាំ២០២៥ នេះ បានសម្របសម្រួលជូនក្រុមគ្រូពេទ្យស្ម័គ្រចិត្ត នៃអង្គការមនុស្សធម៌សុខភាព (AHHA) របស់ប្រទេស អូស្ត្រាលី និងមូលនិធិចក្ខុខ្មែរ (Khmer Sight Foundation) នៅមន្ទីរពេទ្យមិត្តភាពខ្មែរ-សូវៀត ក្នុងការព្យាបាលជូនប្រជាពលរដ្ឋ ចំនួន ៣០០ នាក់ ដែលពួកគាត់បានពិនិត្យភ្នែក កាលពីខែ មិថុនា កន្លងមក នៅខេត្តកំពង់ធំ ។
ចំពោះការអញ្ជើញមកព្យាបាល វះកាត់កន្ទុយថ្លែន និងបកភ្នែកឡើងបាយ នៅមន្ទីរពេទ្យមិត្តភាពខ្មែរ-សូវៀតនេះ មានរយៈពេល ៣ ថ្ងៃ ចាប់ពីថ្ងៃទី១៦ ដល់ថ្ងៃទី ១៨ ខែសីហា ឆ្នាំ២០២៥ ក្រោមការសម្រួបសម្រួល ពីក្រុមយុវជនស្ម័គ្រចិត្ត របស់ធនាគារជាតិនៃកម្ពុជា និងកិច្ចសហការដោយយកចិត្តទុកដាក់ យ៉ាងសកម្ម ពីក្រុមគ្រូពេទ្យមនុស្សធម៌មកពីប្រទេសអូស្ត្រាលី តាមរយៈអង្គការ AHHA (Australian Health Humanitarian Aid) មូលនិធិចក្ខុខ្មែរ (Khmer Sight Foundation) ក្នុងនោះក៏មានការរួមពី ក្រុមបុគ្គលិករបស់ធនាគារឯកជនជាដៃគូផងដែរ ។
សូមបញ្ជាក់ថា ប្រជាពលរដ្ឋដែលមានបញ្ហាជម្ងឺភ្នែក មកពិនិត្យ និងព្យាបាលជម្ងឺនេះ ទទួលបានសេវាព្យាបាលដោយឥតគិតថ្លៃ ពីក្រុម គ្រូពេទ្យមនុស្សធម៌ មកពីប្រទេសអូស្ត្រាលី ដែលបានមកពិនិត្យ និងព្យាបាលរៀងរាល់មួយឆ្នាំម្តង ជូនដល់ប្រជាពលរដ្ឋកម្ពជា ក្រោមការជួយឧបត្ថម្ភ និងទំនុកបម្រុងលើការធ្វើដំណើរ ការស្នាក់នៅ និងការហូបចុក ពីសំណាក់លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា ៕ អត្ថបទសហការ
ចែករំលែកព័តមាននេះ