រាជធានីភ្នំពេញ ៖ លោក​ជំទាវ​បណ្ឌិត ជា សិរី ទេសាភិបាល ធនាគារជាតិ​នៃ​កម្ពុជា បាន​អនុញ្ញាត​ឱ្យ​គណៈប្រតិភូ​ជាន់ខ្ពស់​ធនាគារ CIMB Group Holding Berhad នៃ​ប្រទេស​ម៉ា​ឡេ​ស៊ី ដឹកនាំ​ដោយ​លោក Tansri Mohd Nasir Ahmad ប្រធាន​ក្រុមប្រឹក្សាភិបាល និង​លោក Muhammad Novan Bin Amirudin ប្រធាន​នាយក​ប្រតិបត្តិ ចូល​ជួប​សម្តែង​ការ​គួរសម និង​ពិភាក្សា​ការងារ នា​រសៀល​ថ្ងៃ​ទី ​២៣ ខែកក្កដា ឆ្នាំ​ ២០២៥ នៅ​ធនាគារជាតិ​នៃ​កម្ពុជា អគារ​វត្ត​ភ្នំ​ ។

ក្នុង​ជំនួប​នេះ លោក Muhammad បាន​ជម្រាប​ជូន​ពី​វឌ្ឍនភាព​ប្រតិបត្តិការ​របស់​ធនាគារ CIMB Group Holding Berhad និង​បាន​បញ្ជាក់​ពី​សារៈសំខាន់​នៃ​ទីផ្សារ​កម្ពុជា​តាម​រយៈ​ប្រតិបត្តិការ​ធនាគារ​បុត្រ​សម្ព័ន្ធ CIMB Plc ព្រមទាំង​បញ្ជាក់​ពី​ការ​តាំងចិត្ត​ពង្រីក​អាជីវកម្ម​នៅ​កម្ពុជា​ឱ្យ​កាន់តែ​ទូលំទូលាយ​ថែម​ទៀត​។ បន្ថែម​លើ​នេះ លោក​ក៏​បាន​លើក​ស​សើរ​ពី​ការ​អភិវឌ្ឍ​យ៉ាង​ឆាប់រហ័ស​នៃ​ប្រព័ន្ធ​ទូទាត់​ឌី​ជី​ថ​ល​នៅ​កម្ពុជា និង​បាន​ជម្រាប​ជូន​ពី​គម្រោង​ដាក់​ឱ្យ​ដំណើរការ​ផលិតផល​ហិរញ្ញវត្ថុ​ឌី​ជី​ថ​ល​ថ្មី​ៗ​នា​ពេល​ខាង​មុខ​ ។

ជា​ការ​ឆ្លើយ​តប លោក​ជំទាវ ទេសាភិបាល បាន​លើកទឹកចិត្ត​ឱ្យ CIMB Group Holding Berhad បន្ត​ការ​គាំទ្រ​ធនាគារ​បុត្រ​សម្ព័ន្ធ​នៅ​កម្ពុជា និង​ពង្រីក​ប្រតិបត្តិការ​ថែម​ទៀត ដោយ​បាន​រំលេច​ពី​សក្តានុពល​នៃ​នវានុវត្តន៍​ហិរញ្ញវត្ថុ​ឌី​ជី​ថ​ល​នៅ​កម្ពុជា ​។ ទន្ទឹម​នេះ លោក​ជំទាវ​ក៏​បាន​ចែករំលែក​ទស្សនាទាន​អំពី​ស្ថានភាព​សេដ្ឋកិច្ច​តំបន់​និង​ពិភពលោក ក៏​ដូច​ជា​បច្ចុប្បន្នភាព​សំខាន់​ៗ​ក្នុង​ប្រព័ន្ធ​ធនាគារ​កម្ពុជា ព្រមទាំង​បាន​ស្នើ​ឱ្យ​មានការ​ចូលរួម​ក្នុង​ការ​ទាក់ទាញ​វិនិយោគិន​សក្តានុពល​មក​កម្ពុជា​ឱ្យ​កាន់តែ​ច្រើន​ថែម​ទៀត​ផង​ដែរ ៕ អត្ថបទសហការ