រាជធានីភ្នំពេញ ៖ នៅថ្ងៃទី ២៣ ខែកក្កដា ឆ្នាំ ២០២៥ ក្រសួងការងារ និងបណ្តុះបណ្តាលវិជ្ជាជីវៈសហការជាមួយ សមាគមសភាពាណិជ្ជកម្មចិននៅកម្ពុជា…
រាជធានីភ្នំពេញ ៖ នៅថ្ងៃទី ២៣ ខែកក្កដា ឆ្នាំ ២០២៥ ក្រសួងការងារ និងបណ្តុះបណ្តាលវិជ្ជាជីវៈសហការជាមួយ សមាគមសភាពាណិជ្ជកម្មចិននៅកម្ពុជា រៀបចំពិព័រណ៍ការងារប្រចាំឆ្នាំ ក្រោមប្រធានបទ «គំនិតយុវជនផ្លូវសូត្រ អភិវឌ្ឍន៍ជំនាញ ឆ្ពោះទៅអនាគត ឆ្នាំ ២០២៥» ក្រោមវត្តមានលោក ជា កុសល រដ្ឋលេខាធិការក្រសួងការងារ និងលោកស្រី ជុង ជា ទីប្រឹក្សានៃការិយាល័យសេដ្ឋកិច្ច និងពាណិជ្ជកម្មប្រចាំស្ថានទូតចិនប្រចាំនៅកម្ពុជា ។
ក្នុងថ្ងៃបើកពិព័រណ៍ការងារនៅវិទ្យាស្ថានបច្ចេកវិទ្យាកម្ពុជា លោក ថាវ គួងយ៉ាវ អនុប្រធានអចិន្ត្រៃយ៍ នៃសមាគមសភាពាណិជ្ជកម្មចិននៅកម្ពុជា បានឱ្យដឹងថា ៖ «ពិព័រណ៍ការងាររបស់សមាគមសភាពាណិជ្ជកម្មចិន នៅកម្ពុជាប្រចាំឆ្នាំ ២០២៥ នេះ គឺជាចំណុចចាប់ផ្តើម សម្រាប់ការសហការ យ៉ាងជ្រាលជ្រៅនាពេលអនាគត ដែលនឹងក្លាយជាព្រឹត្តិការណ៍សំខាន់មួយ របស់សមាគម ដើម្បីផ្សារភ្ជាប់រវាងសហគ្រាស និងអ្នកស្វែងរកការងារ ក៏ដូចជាដើម្បីជួយសហគ្រាសជ្រើសរើសនិយោជិក ដែលមានសមត្ថភាព និងផ្តល់ឱកាសដល់អ្នកស្វែងរកការងារកម្ពុជា ក្នុងការពង្រឹងអាជីពផងដែរ» ។
លោក គួងយ៉ាវ បានបន្តថា សហប្រតិបត្តិការដ៏ល្អឥតខ្ចោះរវាងចិន និងកម្ពុជា បានជួយឱ្យអាជីវកម្ម របស់សមាគមសភាពាណិជ្ជកម្ពុជា-ចិន មានការរីកចម្រើន និងប្រតិបត្តិការយូរអង្វែងនៅកម្ពុជា ។ សមាជិកសហគ្រាសចិននៅកម្ពុជា បានពង្រីកសកម្មភាព ហើយមានតម្រូវការនិយោជិកជំនាញកាន់តែខ្ពស់ ។ ទោះជាយ៉ាងណាក៏ដោយ សហគ្រាស បានជួបការលំបាកមួយចំនួន ក្នុងការជ្រើសរើសនិយោជិក រួមមានដូចជា ៖ កង្វះបណ្តាញប្រកាសការងារ កង្វះនិយោជិកទូទៅ ពិបាកក្នុងការស្វែងរកនិយោជិកជំនាញ និងបញ្ហាការរក្សាបុគ្គលិកឱ្យមានស្ថិរភាព ។
លោក គួងយ៉ាវ ក៏បានបញ្ជាក់ផងដែរថា ចំពោះអនាគតសភាពាណិជ្ជកម្ពុជា-ចិន និងសមាគមរបស់ខ្លួននឹងពិភាក្សា និងអំពាវនាវឱ្យសហគ្រាសចិននៅកម្ពុជា ចូលរួមយ៉ាងសកម្មក្នុងការសហការរវាងសាកលវិទ្យាល័យ និងសហគ្រាស ដើម្បីចែករំលែកចំណេះដឹង និងបទពិសោធន៍ពិតប្រាកដដល់ស្ថាប័នឧត្តមសិក្សាកម្ពុជា និងផ្តល់ឱកាសអនុវត្ត និងការបណ្តុះបណ្តាលដល់និស្សិត និងអ្នកដែលទើបចាប់ផ្តើមអាជីព ដើម្បីជួយឱ្យពួកគេងាយស្រួលក្នុងការបំពេញការងារ ។
ជាមួយគ្នានេះផងដែរ លោក ជា កុសល តាងនាមឱ្យលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ៖ «កន្លងមកក្រសួងការងារ តាមរយៈទីភ្នាក់ងារជាតិមុខរបរ និងការងារ និងភាគីពាក់ព័ន្ធនៅក្នុងទីផ្សារការងារទាំងអស់ បានខិតខំសហការរៀបចំព្រឹត្តិការណ៍ និងពិព័រណ៌ការងារជាច្រើននៅតាមរាជធានី-ខេត្ត ដែលបានក្លាយជាសកម្មភាពរស់វើក កៀរគរក្រុមហ៊ុន និងសហគ្រាសមកពីគ្រប់ទិសទី និងគ្រប់វិស័យ ចូលរួមផ្សព្វផ្សាយអំពីព័ត៌មានជ្រើសរើសកម្លាំងពលកម្ម អំពីតម្រូវការជំនាញ ដែលបើកឱកាសទូលាយដល់យុវជន និងអ្នកស្វែងរកការងារ បានចូលទស្សនា មានជម្រើសការងារ និងអាចដាក់ពាក្យស្នើសុំការងារដែលខ្លួនចង់ធ្វើ» ។
លោករដ្ឋលេខាធិការក្រសួងការងារ បានចាត់ទុកការរៀបចំពិព័រណ៌ការងារនៅពេលនេះ ជាកម្មវិធីឈ្នះឈ្នះ ទាំងអស់គ្នា ដែលមិនត្រឹមតែជាកន្លែងផ្សព្វផ្សាយឱកាសការងារប៉ុណ្ណោះទេ ប៉ុន្តែក៏ជាស្ពានផ្សារភ្ជាប់ទំនាក់ទំនងរវាងអ្នកស្វែងរកការងារធ្វើ បានជួបជាមួយម្ចាស់សហគ្រាស និងក្រុមហ៊ុនដែលមានតម្រូវការផ្ទាល់ ដែលជាបទពិសោធន៍ដ៏មានតម្លៃ ។ លោក បានវាយតម្លៃខ្ពស់ចំពោះសមាគមសភាពាណិជ្ជកម្មចិននៅកម្ពុជា ដែលបានផ្តួចផ្តើមបង្កើតនូវព្រឹត្តិការណ៍មួយនេះ ។
គួរបញ្ជាក់ផងដែរថា សមាគមសភាពាណិជ្ជកម្មចិននៅកម្ពុជា បង្កើតឡើងក្នុងឆ្នាំ ១៩៩៦ គឺជាសមាគមចិនមួយក្នុងចំណោមបីនៅកម្ពុជា ។ បច្ចុប្បន្ននេះ សមាគម មានសមាជិកចំនួនជាង ៥០០ សហគ្រាស ដែលមានសកម្មភាពអាជីវកម្មនៅក្នុងវិស័យជាច្រើន ។
ក្នុងអំឡុងពេល ៣០ឆ្នាំកន្លងមក សមាគមសភាពាណិជ្ជកម្ពុជា-ចិន និងសមាជិករបស់ខ្លួនបានចូលរួមយ៉ាងសកម្ម ដោយនាំយកបទពិសោធន៍ បច្ចេកវិទ្យា និងផលិតផលទំនើបៗចូលមកកម្ពុជា ចូលរួមយ៉ាងសកម្មក្នុងការផ្លាស់ប្តូរពាណិជ្ជកម្មចិន-កម្ពុជា និងរួមចំណែកសំខាន់ក្នុងការសាងសង់ហេដ្ឋារចនាសម្ព័ន្ធគន្លឹះរបស់កម្ពុជា ដូចជា ផ្លូវ ស្ពាន អាកាសយានដ្ឋាន ស្ថានីយ៍អគ្គិសនីជាតិ បណ្តាញផ្គត់ផ្គង់អគ្គិសនី ការផលិតអគ្គិសនីពន្លឺព្រះអាទិត្យ និងបច្ចេកវិទ្យា ព័ត៌មានវិទ្យាជាដើម ។
កម្មវិធីពិព័រណ៌ការងារកម្ពុជា-ចិន ប្រចាំឆ្នាំ ២០២៥ នេះ មានក្រុមហ៊ុនចំនួន ៥០ បាននាំឱកាសការងារប្រមាណជិត ១០០០ពាន់កន្លែង សម្រាប់អ្នកដែលស្វែងរកការងារធ្វើ ៕ អត្ថបទសហការ
ចែករំលែកព័តមាននេះ