សាលារៀនវ៉េស្ទឡាញន៍ និងណត្សឡាញន៍ រៀបចំកម្មវិធីប្រកួតប្រជែងស្ទីម (STEAM) ដើម្បីជំរុញគំនិតច្នៃប្រឌិត និងនវានុវត្តន៍
រាជធានីភ្នំពេញ ៖ កាលពីថ្ងៃទី ២៩ ខែមិថុនា ឆ្នាំ ២០២៥ កន្លងទៅនេះ សាលារៀនវ៉េស្ទឡាញន៍ និងសាលារៀនណត្សឡាញន៍…
រាជធានីភ្នំពេញ ៖ កាលពីថ្ងៃទី ២៩ ខែមិថុនា ឆ្នាំ ២០២៥ កន្លងទៅនេះ សាលារៀនវ៉េស្ទឡាញន៍ និងសាលារៀនណត្សឡាញន៍ បានរៀបចំកម្មវិធីប្រកួតប្រជែងស្ទីម ជ្រើសរើសសិស្សជ័យលាភី និងជំរុញប្អូនៗសិស្សានុសិស្សបង្ហាញទេពកោសល្យ សមត្ថភាពដោះស្រាយបញ្ហា ការសហការក្រុម នវានុវត្តន៍ និងគំនិតច្នៃប្រឌិតដ៏អស្ចារ្យរបស់ខ្លួន ។
លោក តែ ឡាញ ប្រធាននាយកអប់រំនៃបណ្តាញគ្រឹះស្ថានអប់រំ របស់វេសឡាញ អេឌ្យូខេសិន គ្រុប បានលើកឡើងថា ការប្រកួតប្រជែងនេះ គឺជាផ្នែកមួយនៃស្ទីម (STEAM) ដែលរួមមានការសិក្សាផ្នែកវិទ្យាសាស្ត្រ បច្ចេកវិទ្យា វិស្វកម្ម សិល្បៈ និងគណិតវិទ្យា ។ កម្មវិធីស្ទីមនេះនឹងជំរុញការអភិវឌ្ឍបំណិនសតវត្សទី២១របស់សិស្សដូចជា ការងារជាក្រុម និងទំនាក់ទំនង រវាងសិស្សានុសិស្ស បណ្ដុះសិស្សឱ្យមានភាពជាអ្នកដឹកនាំ គំនិតច្នៃប្រឌិត និងការដោះស្រាយបញ្ហាជំនាញសំខាន់ៗសម្រាប់អនាគត ផ្សារភ្ជាប់ការសិក្សាទ្រឹស្តីមេរៀនទៅនឹងការអនុវត្តជាក់ស្តែងដូចជាការបង្កើតឧបករណ៍ សម្ភារៈផ្សេងៗក្នុងការដោះស្រាយបញ្ហា ព្រមទាំងបង្ហាញពីការប្រើប្រាស់ជាក់ស្ដែងនៃចំណេះដឹងស្ទីមក្នុងជីវភាពប្រចាំថ្ងៃ ។
គួរបញ្ជាក់ថា ក្រៅពីអនុវត្តកម្មវិធីសិក្សាគោលស្របតាមក្រសួងអប់រំ យុវជន និងកីឡា បណ្តាញសាលារៀនវ៉េស្ទឡាញន៍ និងសាលារៀនណត្សឡាញន៍ បានរៀបចំបញ្ចូលកម្មវិធីដែលនាំមកពីក្រៅប្រទេស ដោយផ្តោតទៅលើជំនាញបំណិនសតវត្សរ៍ទី ២១ ពោលគឺដើម្បីជួយឱ្យសិស្សអាចសម្របខ្លួនទៅនឹងបម្រែបម្រួលបរិបទសង្គម សេដ្ឋកិច្ច ក៏ដូចជាសម្រាប់ទីផ្សារការងារនៅពេលអនាគតដូចជា កម្មវិធីបណ្តុះបណ្តាលទម្លាប់ល្អទាំង ៧ សម្រាប់បុគ្គលឆ្នើម ដែលផ្តោតសំខាន់លើការអភិវឌ្ឍអត្តចរិត និងភាពជាអ្នកដឹកនាំ កម្មវិធីចំណេះដឹងហិរញ្ញវត្ថុ ដែលជួយជំរុញនិងបណ្តុះបណ្តាលចំណេះដឹងសេដ្ឋកិច្ច ចំណេះដឹងហិរញ្ញវត្ថុ និងសហគ្រិនភាព ព្រមទាំងកម្មវិធីបណ្តុះបណ្តាលជំនាញកុំព្យូទ័រ បច្ចេកវិទ្យា និងឌីជីថល ។
លើសពីនេះ ដើម្បីជួយបង្កើនគុណភាពសិក្សារបស់សិស្សានុសិស្សឱ្យកាន់តែប្រសើរឡើង សាលារៀនបានបន្ថែមបច្ចេកវិទ្យាអប់រំ រៀននិងបង្រៀនតាមប្រព័ន្ធអនឡាញ ដូចជា៖ សង្កប្បៈ ( Sangapac) សម្រាប់សិស្សថ្នាក់ទី ១ ដល់ទី ៤, E-school សម្រាប់សិស្សថ្នាក់ទី ៩ ដល់ទី ១២ និង Desdopi សម្រាប់សិស្សថ្នាក់ទី ៧ ដល់ទី ១២។
សូមជម្រាបថា សាលារៀនវ៉េស្ទឡាញន៍ និងសាលារៀនណត្សឡាញន៍ គឺជាបណ្តាញគ្រឹះស្ថានអប់រំ របស់វេសឡាញ អេឌ្យូខេសិន គ្រុប ដែលបានបង្កើតឡើងក្នុងឆ្នាំ ២០០៨ រហូតមកដល់ពេលបច្ចុប្បន្ននេះ មានសាខាចំនួន ១៧ ក្នុងរាជធានីភ្នំពេញ ខេត្តបាត់ដំបង និងខេត្តបាត់ដំបង និងមានសិស្សសរុប ១៧ ៥០០នាក់ ។ ចំពោះទីតាំងសាលារៀនវ៉េស្ទឡាញន៍មាន៖ សាខាសន្ធរម៉ុក សាខាទួលទំពូង សាខាច្បារអំពៅ សាខាទួលស្វាយព្រៃ សាខាទួលសង្កែ សាខាភ្នំពេញថ្មី សាខាដូនពេញ សាខាចំការដូង សាខាព្រែកលៀប សាខាបាត់ដំបង សាខាតាខ្មៅ សាខាក្រុងច្បារមន សាខាឈូកមាស សាខាឫស្សីកែវ (ផ្លូ៥៩៨) សាខាពោធិ៍ចិនតុច (ផ្លូវ ២០០៤) និងសាលារៀនណត្សឡាញន៍ សាខាស្ទឹងមានជ័យ និងសាខាចំការដូង ៕ អត្ថបទសហការ
ចែករំលែកព័តមាននេះ