ខេត្តកំពង់ធំ ៖ ក្រុមគ្រូពេទ្យស្ម័គ្រចិត្តសរុបប្រមាណ ៤២ នាក់ មកពីអង្គការមនុស្សធម៌នៃក្តីស្រលាញ់ ប្រទេសសិង្ហបុរី ចុះពិនិត្យ និងព្យាបាលភ្នែក-ត្រចៀក ដោយឥតគិតថ្លៃ…
ខេត្តកំពង់ធំ ៖ ក្រុមគ្រូពេទ្យស្ម័គ្រចិត្តសរុបប្រមាណ ៤២ នាក់ មកពីអង្គការមនុស្សធម៌នៃក្តីស្រលាញ់ ប្រទេសសិង្ហបុរី ចុះពិនិត្យ និងព្យាបាលភ្នែក-ត្រចៀក ដោយឥតគិតថ្លៃ ជូនប្រជាពលរដ្ឋនៅស្រុកសន្ទុក ខេត្តកំពង់ធំ ក្នុងគោលបំណងពង្រឹងសុខមាលភាពប្រជាពលរដ្ឋ ឆ្ពោះទៅ ការគ្របដណ្តប់សុខភាពជាសកល ។
ឯកឧត្តម ស៊ុំ សន្និសិទ្ធ ទេសាភិបាលរង តំណាងដ៏ខ្ពង់ខ្ពស់ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា លើកឡើងនៅក្នុងកម្មវិធីពិនិត្យ និងព្យាបាល ភ្នែក-ត្រចៀក នៅឃុំកំពង់ថ្ម ស្រុកសន្ទុក ខេត្តកំពង់ធំ នៅថ្ងៃទី ២៧ ខែមិថុនា ឆ្នាំ ២០២៥ នេះថា វិស័យសុខាភិបាល គឺជាវិស័យអាទិភាពមួយក្នុងចំណោមវិស័យអាទិភាពទាំង ៦ របស់រាជរដ្ឋាភិបាល ត្រូវបាននិងកំពុងបន្ត ពង្រឹងទាំងថ្នាក់ជាតិ និងថ្នាក់ក្រោមជាតិ ក្នុងគោលបំណងពង្រឹងសុខមាលភាពប្រជាពលរដ្ឋ ឆ្ពោះទៅការគ្របដណ្តប់សុខភាព ជាសកល ។
បញ្ហានេះគិតចាប់ពីឆ្នាំ ២០១៧ មកដល់បច្ចុប្បន្ននេះ ធនាគារជាតិនៃកម្ពុជា បានសហការជាមួយក្រុមគ្រូពេទ្យស្ម័គ្រចិត្ត ជំនាញខាងភ្នែក-ត្រចៀកជាច្រើន ទាំងក្នុងស្រុក និងបរទេសដូចជា មកពីមូលនិធិចក្ខុខ្មែរ មូលនិធិរក្សាកុមារ អង្គការផ្តល់នូវក្ដីសង្ឃឹម កម្ពុជា ក្រុមគ្រូពេទ្យជំនាញមកពីចក្រភពអង់គ្លេស ប្រទេសអាល្លឺម៉ង់ អង្គការជំនួយមនុស្សធម៌សុខភាពអូស្ត្រាលី និងក្រុមគ្រូពេទ្យ សិង្ហបុរី ដែលបានមកបំពេញបេសកកម្មពិនិត្យ ព្យាបាលភ្នែកនិងត្រចៀក ជូនប្រជាពលរដ្ឋក្នុងខេត្តកំពង់ធំ បានប្រមាណជាង ៧ ពាន់នាក់ ហើយទទួលបានជោគជ័យយ៉ាងត្រចះត្រចង់ ប្រកបដោយភាពរីករាយ និងស្នាមញញឹមប្រកបដោយក្តីសង្ឃឹម ។
ឯកឧត្តម បន្តទៀតថា បញ្ហានេះធនាគារជាតិនៃកម្ពុជា បានប្រឹងប្រែងបន្តបំពេញបេសកកម្មមនុស្សធម៌នេះជាទៀងទាត់ នៅពេល មានឱកាស និងធនធានអំណោយផលដូចពេលកន្លងមក ប៉ុន្តែជាអកុសល នៅពេលមានការរីករាលដាល នៃជំងឺកូវីដ-១៩ បេសកកម្ម នេះត្រូវបានផ្អាកអស់រយៈពេល ២ ឆ្នាំ គឺនៅឆ្នាំ ២០២០ និងឆ្នាំ ២០២១ ។ បន្ទាប់ពីស្ថានភាព ជំងឺកូវីដ-១៩ ត្រូវបានគ្រប់គ្រងបាន ធនាគារជាតិនៃកម្ពុជា ក៏បានប្រឹងប្រែង ធ្វើការទំនាក់ទំនងទៅកាន់បណ្ដាដៃគូជាអង្គការមនុស្សធម៌ឡើងវិញ ដើម្បីបន្តបេសកកម្មនៃការ ផ្តល់ស្នាមញញឹម ជូនប្រជាពលរដ្ឋ នៅក្នុងខេត្តកំពង់ធំ ឡើងវិញចាប់ពីឆ្នាំ ២០២២ ។
ឯកឧត្តម ស៊ុំ សន្និសិទ្ធ បន្ថែមថា ជាក់ស្ដែងថ្ងៃនេះ ក្រុមគ្រូពេទ្យស្ម័គ្រចិត្តសរុបប្រមាណ ៤២ នាក់ មកពីអង្គការមនុស្សធម៌ នៃក្តីស្រលាញ់របស់ប្រទេសសិង្ហបុរី, មូលនិធិចក្ខុខ្មែរ, និងអង្គការផ្ដល់នូវក្តីសង្ឃឹមកម្ពុជា រួមជាមួយក្រុមយុវជនស្ម័គ្រចិត្តធនាគារជាតិ នៃកម្ពុជា ៦០ នាក់ទៀត សរុបប្រមាណជាង ១០០ នាក់បានផ្ដល់ជូនការពិនិត្យ និងព្យាបាលភ្នែក-ត្រចៀក ដោយឥតគិតថ្លៃ ជូនអ៊ំ ពូ មីង និងបងប្អូនប្រជាពលរដ្ឋក្នុងស្រុកសន្ទុក ប្រមាណជាង ១.៤០០ នាក់ ឬច្រើនជាងនេះ ដើម្បីទទួលបានសេវាពិនិត្យ និងព្យាបាល ។
ឯកឧត្តមទេសាភិបាលរង លើកឡើងបន្ថែមទៀតថា រាជរដ្ឋាភិបាលកម្ពុជាក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្តីនៃព្រះរាជាណាចក្រកម្ពុជា និងជាអ្នកបន្តមរតកដឹកនាំក្រោមដំបូលសន្តិភាពពី សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បាននិងកំពុងធ្វើដំណើរទៅមុខយ៉ាងស្វាហាប់ និងបន្តយកចិត្តទុកដាក់យ៉ាងខ្លាំង ទៅលើវិស័យសំខាន់ៗនានា ក្នុងការអភិវឌ្ឍសេដ្ឋកិច្ចជាតិ និងសង្គម ក្នុងនោះមានយុទ្ធសាស្ត្របញ្ចកោណដំណាក់កាលទី១ យុទ្ធសាស្ត្រទី១ ផ្តោតជាសំខាន់ទៅលើ ធនធានមនុស្ស ដែលរួមមានសុខុមាលភាពប្រជាជនជាកត្តាចម្បងផងដែរ ៕ អត្ថបទសហការ
ចែករំលែកព័តមាននេះ