រាជធានីភ្នំពេញ ៖ កាលពីថ្ងៃទី ៦ ខែមិថុនា ឆ្នាំ ២០២៥ កន្លងទៅនេះ លោកគ្រូអ្នកគ្រូ និងថ្នាក់ដឹកនាំជាន់ខ្ពស់…
រាជធានីភ្នំពេញ ៖ កាលពីថ្ងៃទី ៦ ខែមិថុនា ឆ្នាំ ២០២៥ កន្លងទៅនេះ លោកគ្រូអ្នកគ្រូ និងថ្នាក់ដឹកនាំជាន់ខ្ពស់ នៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប និងសាលារៀនបានទទួលការបណ្តុះបណ្តាលស្តីពីបញ្ញាសិប្បនិម្មិត (AI) ក្នុងវិស័យអប់រំពីក្រុមហ៊ុន CodingGate ។ ក្នុងកម្មវិធីបើកនោះ ឧកញ៉ា ប៉ិច បូឡែន អគ្គនាយក Westline Education Group បានស្នើដល់លោកគ្រូអ្នកគ្រូ ក៏ដូចជាថ្នាក់ដឹកនាំទាំងអស់ យកចិត្តទុកដាក់ទទួលយកការបណ្តុះបណ្តាល អភិវឌ្ឍចំណេះជំនាញនេះ ដោយថា បច្ចេកវិទ្យា AI នឹងជួយបង្កើនផលិតភាពការងារ និងវិស័យអប់រំឱ្យមានប្រសិទ្ធភាពខ្ពស់ និងលឿនជាងមុន ស្របតាមបរិបទសង្គមឌីជីថលនាពេលបច្ចុប្បន្ន ។
បើតាមប្រសាសន៍របស់លោកឧកញ៉ា ប៉ិច បូឡែន បច្ចេកវិទ្យា AI អាចធ្វើឱ្យមនុស្សម្នាក់ ពូកែជាងមនុស្សម្នាក់ទៀត, លោកថា បច្ចេកវិទ្យានេះ មិនអាចបំបាត់ការងារមនុស្សទាំងស្រុងនោះទេ ប៉ុន្តែបច្ចេកវិទ្យានេះ នឹងជួយមនុស្សម្នាក់ទៀត ឬក្រុមហ៊ុនមួយ ឱ្យពូកែជាងក្រុមហ៊ុនមួយទៀត។ ដូច្នេះ លោកស្នើដល់លោកគ្រូអ្នកគ្រូ បុគ្គលិកថ្នាក់ដឹកនាំទាំងអស់ ត្រូវអភិវឌ្ឍចំណេះជំនាញរបស់ខ្លួន ដើម្បីបង្កើនផលិតភាពឱ្យកាន់តែប្រសើរជាងមុន។ “អ៉ីចឹងផលិតភាពរបស់យើងដែលរត់មិនទាន់ មិនមែនប្រណាំងជាមួយ AI ទេ តែប្រឡងប្រណាំងជាមួយក្រុមដែលមានបច្ចេកវិទ្យាខ្ពស់ជាងយើង” ។
លោកឧកញ៉ាបានបន្ថែមទៀតថា AI នឹងផ្តល់ជាជំនួយបន្ថែម ដល់ការសិក្សាស្រាវជ្រាវរបស់គ្រូបង្រៀន រៀបចំកម្មវិធីសិក្សា មេរៀននិងលំហាត់សម្រាប់សិស្សកាន់តែលឿនជាងមុន កាត់បន្ថយបន្ទុកការងាររដ្ឋបាល ព្រមទាំងផ្តល់ពេលវេលាឱ្យគ្រូបង្រៀនបានច្រើនជាងមុនក្នុងការផ្តោតលើការបង្រៀន និងការផ្តល់ការគាំទ្រផ្ទាល់ដល់សិស្ស ។
ទោះជា AI វានឹងជួយឱ្យមនុស្សពូកែជាងមុនក្តី តែលោកឧកញ៉ា ប៉ិច បូឡែន ស្នើដល់លោកគ្រូអ្នកគ្រូ បុគ្គលិកទាំងអស់ សូមប្រើដោយទំនួលខុសត្រូវ ប្រើដោយប្រយ័ត្នប្រយ៉ែង ហើយប្រើជាប្រយោជន៍ តាមរយៈការសិក្សាស្រាវជ្រាវ ។
ក្នុងឱកាសនោះ លោក សុខ សុភមង្គល នាយកប្រតិបត្តិ នៃក្រុមហ៊ុន Codingate Technology មានប្រសាសន៍ថា WEG នឹងឈានជើងចូលទៅទីផ្សារអន្តរជាតិ ដូច្នេះការអភិវឌ្ឍសមត្ថភាព គឺជារឿងសំខាន់។ យ៉ាងណាលោកថា បច្ចេកវិទ្យា AI មិនមែនចូលមកជំនួសយើងនោះទេ ប៉ុន្តែវាមកបង្កើនប្រសិទ្ធភាព ដើម្បីឱ្យក្រុមហ៊ុនកាន់តែមានការប្រកួតប្រជែង ។ “ពេលដែលបច្ចេកវិទ្យាចូលមក គឺផលគុណនៃប្រសិទ្ធភាពគឺ ២ ទៅ៤ដង មានន័យថា យើងបំពាក់បច្ចេកវិទ្យាប្រព័ន្ធគ្រប់គ្រង ឬបច្ចេកវិទ្យាណាមួយចូលទៅក្នុងដំណើរការប្រតិបត្តិការប្រចាំថ្ងៃរបស់យើង វាអាចជួយយើង២ ទៅ៤ដង” ។
សូមជំរាបជូនថា សម្រាប់វគ្គបណ្តុះបណ្តាលបញ្ញាសិប្បនិម្មិត ក្នុងវិស័យអប់រំនេះ លោកគ្រូអ្នកគ្រូ ក៏ដូចជាថ្នាក់ដឹកនាំជាន់ខ្ពស់ នៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ទទួលបានការបណ្តុះបណ្តាលពី ការប្រើប្រាស់ AI ក្នុងការសរសេរលិខិតរដ្ឋបាល, ការប្រើប្រាស់ AI សរសេរគោលការណ៍ និងរៀបចំអត្ថាធិប្បាយការងារបុរគ្គលិក, ការប្រើប្រាស់ AI សម្រាប់ការរៀបចំកម្មវិធីសិក្សា, ក៏ដូចជាការប្រើប្រាស់ AI សម្រាប់ផ្នែកលក់ និងទីផ្សារជាដើម ៕ អត្ថបទសហការ
ចែករំលែកព័តមាននេះ