ADផ្ទាំងផ្សព្វផ្សាយពាណិជ្ជកម្ម

មើលឱ្យច្បាស់ ! ប្រយ័ត្នកូនកើតជំងឺធ្លាក់ទឹកចិត្តដោយមិនដឹងខ្លួន

7 ខែ មុន

០២ ខែ ឧសភា ឆ្នាំ ២០២៥ ម៉ោង ១៣:២៦

រាជធានីភ្នំពេញ ៖ វាជារឿងធម្មតាទេដែលកូនក្មេងមានអារម្មណ៍សោកសៅ ធ្វើកាយវិការមិនសមរម្យ ឬមានអារម្មណ៍មិនល្អនៅពេលខ្លះ ។ ប៉ុន្តែនៅពេលដែលអារម្មណ៍សោកសៅ ឬអាក្រក់ទាំងនេះមានក្នុងរយៈពេលជាច្រើនសប្តាហ៍ យូរជាងនេះ ឬនៅពេលដែលមានការផ្លាស់ប្តូរអាកប្បកិរិយាខុសឆ្គងផ្សេងទៀត វាអាចជាជំងឺធ្លាក់ទឹកចិត្ត ។ ការព្យាបាលអាចជួយកុមារដែលឆ្លងកាត់ភាពសោកសៅ ឬបាក់ទឹកចិត្តបានយ៉ាងមានប្រសិទ្ធភាព ហើយក៏មានរឿងជាច្រើនផងដែរដែលឪពុកម្តាយអាចធ្វើបាន ដើម្បីជួយកូនៗឱ្យត្រឡប់មករកសភាពធម្មតាវិញ ។ ការទទួលបានការថែទាំត្រឹមត្រូវអាចការពារកុំឱ្យអ្វីៗកាន់តែអាក្រក់ទៅៗ និងជួយឱ្យកុមារមានអារម្មណ៍ធូរស្រាល ។

ប្រសិនបើភាពសោកសៅមានរយៈពេលជាច្រើនសប្តាហ៍ ឬយូរជាងនេះ សូមពិភាក្សាជាមួយគ្រូពេទ្យរបស់កូនអ្នក ។ ហើយបើកូនមានជំងឺធ្លាក់ទឹកចិត្ត ឪពុកម្តាយអាចសម្គាល់ឃើញនូវសញ្ញាមួយចំនួននេះ ៖

១. សោកសៅ ឬមានអារម្មណ៍មិនល្អ ៖ កុមារអាចហាក់ដូចជាសោកសៅ ឯកោ មិនសប្បាយចិត្ត ។ វាអាចមានរយៈពេលជាច្រើនសប្តាហ៍ ឬច្រើនខែ ។ ក្មេងអាចងាយនឹងយំ ហើយពួកគេក៏អាចឆាប់ខឹងច្រើនជាងមុនផងដែរ ។

២. ការរិះគន់ ការមើលងាយខ្លួនឯង ៖ កុមារដែលឆ្លងកាត់រោគធ្លាក់ទឹកចិត្តអាចនិយាយត្អូញត្អែរច្រើនជាងធម្មតា ។ ពួកគេអាចនិយាយរិះគន់ខ្លួនឯងដូចជា “ខ្ញុំមិនអាចធ្វើអ្វីបានត្រឹមត្រូវទេ” “ខ្ញុំមិនមានមិត្តទេ” “ខ្ញុំមិនអាចធ្វើរឿងនេះបានទេ” “វាពិបាកពេកសម្រាប់ខ្ញុំ”។

៣. កង្វះថាមពល និងការខិតខំ ៖ ការធ្លាក់ទឹកចិត្តអាចស្រូបយកថាមពលរបស់កុមារ ពួកគេអាចនឹងលែងសូវប្រឹងប្រែងជាងមុន ។ សូម្បីតែធ្វើកិច្ចការតិចតួចក៏អាចមានអារម្មណ៍ថាដូចជាការប្រឹងប្រែងខ្លាំងពេក ។ កុមារអាចហាក់ដូចជាហត់នឿយ បោះបង់ដោយងាយ ឬមិនព្យាយាមសោះ ។

៤. មិនរីករាយនឹងអ្វីទាល់តែសោះ ៖ ក្មេងៗមិនសូវសប្បាយជាមួយមិត្តភ័ក្តិ ឬចូលចិត្តលេងដូចពីមុនទេ ពួកគេប្រហែលជាមិនមានអារម្មណ៍ចង់ធ្វើរឿងដែលពួកគេធ្លាប់រីករាយនោះទេ ។

៥. ការផ្លាស់ប្តូរដំណេក និងអាហារ ៖ កុមារអាចគេងមិនលក់ស្រួល ឬហាក់ដូចជាអស់កម្លាំង ទោះបីជាពួកគេគេងគ្រប់គ្រាន់ក៏ដោយ ។ អ្នកខ្លះប្រហែលជាមិនមានអារម្មណ៍ចង់ញ៉ាំទេ ខណៈពេលអ្នកផ្សេងទៀតបែរអាចញ៉ាំច្រើនពេកទៅវិញ ។

៦. ឈឺចុកចាប់ ៖ កុមារខ្លះអាចឈឺក្រពះ ឬឈឺអ្វីផ្សេងៗទៀត ។ ក្មេងខ្លះខកខានទៅសាលារៀនដោយសារមិនស្រួលខ្លួន ទោះបីមិនឈឺក៏ដោយ ។

អ្វីដែលធ្វើឱ្យកុមារធ្លាក់ទឹកចិត្ត ? មិនមានមូលហេតុតែមួយទេ មូលហេតុមានច្រើន ហើយខុសៗគ្នាដែលអាចនាំឱ្យកុមារធ្លាក់ទឹកចិត្ត ។ កុមារខ្លះមានហ្សែនដែលធ្វើឱ្យពួកគេងាយនឹងកើតជំងឺធ្លាក់ទឹកចិត្ត ។ ពួកគេអាចមានសមាជិកគ្រួសារផ្សេងទៀតដែលមានជំងឺធ្លាក់ទឹកចិត្ត ។ កុមារខ្លះឆ្លងកាត់រឿងស្ត្រេសច្រើន ។ អ្នកខ្លះធ្លាប់ ឬប្រឈមនឹងបាត់បង់នរណាម្នាក់ រងរបួស ឬជួបប្រទះការលំបាក ។ អ្នកខ្លះឆ្លងកាត់ស្ថានភាពសុខភាពធ្ងន់ធ្ងរ។ ទាំងនេះអាចនាំទៅរកភាពសោកសៅ ឬទុក្ខព្រួយ ហើយជួនកាលទៅជាជំងឺធ្លាក់ទឹកចិត្ត ៕ ប្រភព ៖ kidshealth

អត្ថបទនេះផលិតឡើងក្រោមកិច្ចសហប្រតិបត្តិការជាមួយសាលារៀនវ៉េស្ទឡាញន៍ និងសាលារៀនណត្សឡាញន៍ ។ វគ្គសិក្សាថ្មីចូលរៀនថ្ងៃទី ២៨ ខែមេសា ឆ្នាំ ២០២៥ ។ សាលារៀនផ្តល់ជូនកម្មវិធីចំណេះទូទៅខ្មែរពីថ្នាក់មត្តេយ្យ ដល់ទី ១២ កម្មវិធីភាសាអង់គ្លេសទូទៅ និងកម្មវិធីភាសាចិនទូទៅចាប់ពីកម្រិតមត្តេយ្យ ដល់ទី ១២ ។ សាលារៀនផ្តល់ជូនអាហារូបករណ៍រហូតដល់ ៣០% ការធានារ៉ាប់រងគ្រោះថ្នាក់បុត្រធីតា និងការការពារការសិក្សាបុត្រធីតារហូតដល់ ៥ ឆ្នាំ សម្រាប់ការចុះឈ្មោះត្រឹមថ្ងៃទី ៣០ មេសា ២០២៥ ។ សម្រាប់ព័ត៌មានបន្ថែម សូមទំនាក់ទំនងទូរស័ព្ទលេខ ៖ ០៩២ ៨៨៨ ៤៩៩ / ០១៥ ៨០៥ ១២៣ ៕