រាជធានីភ្នំពេញ ៖ ព្រឹត្តិការណ៍ CAMFood & CAMHotel ជាពិព័រណ៍ពាណិជ្ជកម្មអន្តរជាតិកំពូលរបស់កម្ពុជា ដែលស្ថិតនៅក្នុងវិស័យស្នាក់នៅ និងវិស័យអាហារ និងភេសជ្ជៈ…
រាជធានីភ្នំពេញ ៖ ព្រឹត្តិការណ៍ CAMFood & CAMHotel ជាពិព័រណ៍ពាណិជ្ជកម្មអន្តរជាតិកំពូលរបស់កម្ពុជា ដែលស្ថិតនៅក្នុងវិស័យស្នាក់នៅ និងវិស័យអាហារ និងភេសជ្ជៈ ព្រមទាំងជាវេទិកាជំនួបរវាង អាជីវកម្ម និងអាជីវកម្ម (B2B) សំខាន់បំផុតរបស់ប្រទេស ។
ព្រឹត្តិការណ៍នេះ បានក្លាយជាតំបន់ទីផ្សារសំខាន់ដែលបង្កើតឱកាសឲ្យទីផ្សារអន្តរជាតិ មានជំនួបជាមួយជំនាញក្នុងស្រុកដើម្បីជំរុញកំណើនអាជីវកម្ម និងឱកាសពង្រីកទីផ្សាររបស់ខ្លួនទាំងនៅកម្ពុជា និងទូទាំងអាស៊ីអាគ្នេយ៍ ។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ មានប្រសាសន៍ថា ការរៀបចំពិព័រណ៍នេះនាំមកនូវឱកាសថ្មីៗ សម្រាប់អ្នកផ្គត់ផ្គង់ និងអ្នកចែកចាយក្នុងស្រុក និងអន្តរជាតិ ដើម្បីជួបជាមួយអ្នកជំនាញមកពីឧស្សាហកម្មទេសចរណ៍ និងបដិសណ្ឋារកិច្ច រួមទាំងអ្នកផលិតម្ហូបអាហារ និងភេសជ្ជៈឈានមុខគេលំដាប់អន្តរជាតិ ដែលមានគោលបំណងចូលទៅក្នុងទីផ្សារអាស៊ាន ដែលកំពុងចូលរួមក្នុងពិព័រណ៍នេះ ដូចជា ៖ អ្នកនាំចូល និងអ្នកចែកចាយក្នុងស្រុក ដែលកំពុងស្វែងរកផលិតផលដែលមានគុណភាពខ្ពស់ និងអ្នកផ្គត់ផ្គង់ដែលអាចទុកចិត្តបាន ។ ប្រតិបត្តិករសណ្ឋាគារ និងភោជនីយដ្ឋាន ដែលកំពុងស្វែងរកឧបករណ៍ សម្ភារ និងសេវាកម្ម ដើម្បីគាំទ្រអាជីវកម្មរបស់ពួកគេ ។ អ្នកជំនាញក្នុងឧស្សាហកម្ម ដែលចង់ផ្លាស់ប្តូរបទពិសោធន៍ និងចំណេះដឹង ក៏ដូចជាកសាងបណ្តាញ និងការតភ្ជាប់ថ្មីៗ ។
សូមជម្រាបថា ព្រឹត្តិការណ៍ CAMFood និង CAMHotel2025 ប្រព្រឹត្តទៅរយៈពេលបីថ្ងៃ ចាប់ពីថ្ងៃទី២២ ទី ២៣ និងទី ២៤ ខែតុលា ឆ្នាំ ២០២៥ នៅសាលសន្និសីទ និងពិព័រណ៌កោះពេជ្រ ។
គួររំលឹកផងដែរថា ព្រឹត្តិការណ៍ CAMFood & CAMHotel ឆ្នាំ ២០២៥ ជាព្រឹត្តិការណ៍លើកទី ១១ ក្រោយការរៀបចំដំបូងនៅឆ្នាំ ២០០៩ ដោយក្នុងនោះព្រឹត្តិការណ៍ត្រូវរៀបចំជារៀងរាល់ ២ឆ្នាំម្ដង ។ ព្រឹត្តិការណ៍នេះ ត្រូវបានបង្កើតឡើង ដើម្បីឆ្លើយតបទៅនឹងតម្រូវការកើនឡើង សម្រាប់វេទិកាពាណិជ្ជកម្ម នៅក្នុងវិស័យម្ហូបអាហារ និងសេវាកម្មស្នាក់នៅ ដែលកំពុងរីកចម្រើនយ៉ាងឆាប់រហ័សនៅកម្ពុជា ។
ខណៈវិស័យទេសចរណ៍ កំពុងមានការអភិវឌ្ឍន៍ជាលំដាប់ ការរៀបចំពិព័រណ៍នេះ នឹងផ្តល់ឱកាសដល់អ្នកផ្គត់ផ្គង់អន្តរជាតិ អ្នកចែកចាយក្នុងស្រុក និងអ្នកជំនាញ ឧស្សាហកម្ម បានជួបប្រាស័យទាក់ទងអាជីវកម្ម និងជំរុញជាវេទិកាសំខាន់ៗ ដូចខាងក្រោម ៖
ក្រុមហ៊ុនផលិតអាហារ និងភេសជ្ជៈអន្តរជាតិ ដែលចង់ចូលទីផ្សារអាស៊ីអាគ្នេយ៍ អ្នកនាំចូល និងអ្នកចែកចាយក្នុងស្រុក ដែលកំពុងស្វែងរកផលិតផល និងអ្នកផ្គត់ផ្គង់ មានគុណភាពប្រតិបត្តិករសណ្ឋាគារ និងភោជនីយដ្ឋាន ដែលកំពុងស្វែងរកឧបករណ៍ និងសេវាកម្ម អ្នកជំនាញឧស្សាហកម្ម ដែលចង់ប្ដូរបទពិសោធន៍ចំណេះដឹង និងបង្កើតបណ្តាញទំនាក់ទំនង ៕ អត្ថបទសហការ
ចែករំលែកព័តមាននេះ