រាជធានីភ្នំពេញ ៖ ក្នុងឱកាសចូលរួមមហាសន្និបាត និងប្រគល់បណ្ណសរសើរដល់នាយក នាយិកាឆ្នើម និងគ្រូឆ្នើមប្រចាំឆ្នាំ២០២៤ នៃសហព័ន្ធសេវាអប់រំនៅកម្ពុជា កាលពីចុងសប្តាហ៍នេះ ឯកឧត្តមបណ្ឌិតសភាចារ្យ ហង់ជួន…
រាជធានីភ្នំពេញ ៖ ក្នុងឱកាសចូលរួមមហាសន្និបាត និងប្រគល់បណ្ណសរសើរដល់នាយក នាយិកាឆ្នើម និងគ្រូឆ្នើមប្រចាំឆ្នាំ២០២៤ នៃសហព័ន្ធសេវាអប់រំនៅកម្ពុជា កាលពីចុងសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានធ្វើការកោតសរសើរ និងវាយតម្លៃខ្ពស់ចំពោះសមិទ្ធផលដែលសហព័ន្ធសេវាអប់រំនៅកម្ពុជាសម្រេចបាននាពេលកន្លងមក ដែលជាកម្លាំងចលករដ៏សំខាន់ក្នុងការជំរុញការអភិវឌ្ឍប្រកបដោយចីភាព។
ឯកឧត្តមបណ្ឌិតសភាចារ្យមានប្រសាសន៍ថា រាជរដ្ឋាភិបាលដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ចង់ដឹកនាំកម្ពុជាឆ្ពោះទៅរកការអភិវឌ្ឍថ្មី ដែលហៅថា គឺជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងចក្ខុវិស័យឆ្នាំ២០៥០។ ក្នុងន័យនេះ ប្រព័ន្ធអប់រំត្រូវតែឆ្លើយតបទៅនឹងចក្ខុវិស័យ ហើយតួនាទី ទាំងវិស័យរដ្ឋ ក៏ដូចជាវិស័យឯកជន គឺការពង្រឹងគុណភាពអប់រំ ដែលធានាបាននូវសិស្សដែលត្រៀមខ្លួនដើម្បីសិក្សា, សាលារៀនដែលមានតួនាទីផ្តល់នូវបរិស្ថានសិក្សាល្អ, គ្រូបង្រៀនល្អ និងមានសមត្ថភាពដើម្បីបង្រៀនមានគុណភាព ហើយមាតាបិតាជួយគាំទ្រ ក៏ដូចជាប្រព័ន្ធអប់រំទាំងមូលដែលផ្តល់ឱកាសឱ្យសិស្សានុសិស្សអាចសិក្សារៀនសូត្របាន។
ឯកឧត្តមរដ្ឋមន្ត្រីបានបញ្ជាក់ថា ដើម្បីសម្រេចបានចក្ខុវិស័យកម្ពុជាឆ្នាំ២០៣០ និងឆ្នាំ២០៥០ ទាំងវិស័យរដ្ឋ ក៏ដូចជាវិស័យឯកជន ត្រូវប្តេជ្ញាបន្តធ្វើកំណែទម្រង់វិស័យអប់រំ បញ្ចូលនូវការប្រើប្រាស់បច្ចេកវិទ្យាអប់រំនៅ ក្នុងការសិក្សារៀនសូត្រ ក៏ដូចជាការលើកកម្ពស់នូវការបង្រៀនខាងផ្នែកវិទ្យាសាស្ត្រ និងបច្ចេកវិទ្យា។
ក្នុងនោះឯកឧត្តមបណ្ឌិតសភាចារ្យ ក៏បានអរគុណដល់វិស័យឯកជន ពិសេសសហព័ន្ធសេវាអប់រំនៅកម្ពុជា ដែលបានសហការជាមួយរដ្ឋ ក្នុងការផ្តល់ឱកាសឱ្យយុវជនកម្ពុជាទទួលបាននូវការអប់រំប្រកបដោយគុណភាព ដែលឆ្លើយតបទៅនឹងតម្រូវការទីផ្សារ ជាពិសេសគឺតម្រូវការនៃការអភិវឌ្ឍសេដ្ឋកិច្ចសង្គមនាពេលបច្ចុប្បន្ន ក៏ដូចជានាពេលអនាគត។
តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ក៏បានចូលរួមអបអរសាទរដល់ឯកឧត្តមបណ្ឌិត ហុង លីម ដែលត្រូវបានតែងតាំងជាប្រធានសហព័ន្ធសេវាអប់រំនៅកម្ពុជាក្នុងអាណត្តិ២០២៥-២០២៧ថ្មី និងអបអរសាទរដល់នាយក នាយិកាឆ្នើម និងគ្រូឆ្នើមប្រចាំឆ្នាំ២០២៤ នៃសហព័ន្ធសេវាអប់រំនៅកម្ពុជា ដែលបានឆ្លុះបញ្ចាំងពីការខិតខំប្រឹងប្រែងរបស់ភាគីពាក់ព័ន្ធទាំងអស់ ក្នុងការលើកកម្ពស់គុណភាពអប់រំនៅកម្ពុជា។
សូមបញ្ជាក់ថា សហព័ន្ធសេវាអប់រំនៅកម្ពុជា គឺជាបណ្តុំនៃវិស័យឯកជនដែលធ្វើការងារផ្តល់សេវាគាំទ្រលើវិស័យអប់រំ ដោយបច្ចុប្បន្ននេះ សហព័ន្ធមានសមាជិក ចំនួន ១៤០ ស្ថាប័ន ដែលរួមមាន សាលារៀនជាតិ និងអន្តរជាតិ ស្ថាប័នបណ្តុះបណ្តាល ក្រុមហ៊ុនបច្ចេកវិទ្យាអប់រំ អង្គការគាំទ្រវិស័យអប់រំ និងក្រុមហ៊ុនមួយចំនួនទៀត។
បើតាមលោក គង់ សំនៀង ប្រធានសហព័ន្ធសេវាអប់រំនៅកម្ពុជា អាណត្តិ២០២៣-២០២៥ និងជាអគ្គនាយករងក្រុមហ៊ុនវេសឡាញ អេឌ្យូខេសិនគ្រុប, សហព័ន្ធសេវាអប់រំនៅកម្ពុជា ត្រូវបានបង្កើតឡើងនាដើមឆ្នាំ២០២០ ក្រោមចក្ខុវិស័យចង់ឃើញធនធានមនុស្សនៅប្រទេសកម្ពុជា មានចំណេះដឹង ជំនាញ និងភាពជាអ្នកដឹកនាំកាន់តែខ្ពស់ដើម្បីអភិវឌ្ឍប្រទេសជាតិ។ ក្នុងនោះបេសកកម្មចំបងៗរបស់សហព័ន្ធសេវាអប់រំនៅកម្ពុជា មានដូចជា ៖ ចូលរួមជាមួយរាជរដ្ឋាភិបាលក្នុងការអភិវឌ្ឍធនធានមនុស្ស ក្នុងវិស័យអប់រំចំណេះទូទៅ ការអប់រំបណ្តុះបណ្តាលបច្ចេកទេសនិងវិជ្ជាជីវះ ចំណេះដឹងសហគ្រិនភាព ចំណេះដឹងហិរញ្ញវត្ថុ ចំណេះដឹងបច្ចេកវិទ្យា និងការអប់រំភាពជាអ្នកដឹកនាំ, ប្រមូលផ្តុំគ្រឹះស្ថានអប់រំបណ្តុះបណ្តាលនិងដៃគូពាក់ព័ន្ធបង្កើតប្រព័ន្ធអេកូឡូស៊ី គាំទ្រសម្រាប់ការ អប់រំ និងបណ្តុះបណ្តាល ដើម្បីការរីកចំរើនលើគុណភាពធនធាន មនុស្សដែលគាំទ្រ និងឆ្លើយ តបល្អតាមតម្រូវការអភិវឌ្ឍសេដ្ឋកិច្ចជាតិ, ស្រាវជ្រាវ និងចែករំលែកចំណេះដឹងអប់រំ ព័ត៌មានទីផ្សារការងារ តម្រូវការចំណេះ ជំនាញនានា ដែលប្រទេសជាតិត្រូវការនាពេលអនាគត ក៏ដូចជា ពង្រឹងចំណេះដឹង និងជំនាញ គ្រូបង្រៀន គ្រូបណ្តុះបណ្តាល និងអ្នកអប់រំទូទៅ ដើម្បីធានាបាននូវលទ្ធផលការសិក្សាខ្ពស់របស់សិស្សានុសិស្ស និស្សិត និងសិក្ខាកាម។
ក្នុងនោះសមិទ្ធផលដែលសហព័ន្ធសេវាអប់រំនៅកម្ពុជាសម្រេចបានក្នុងអាណត្តិ២០២៣-២០២៥ មានដូចជា បង្កើនសមាជិកភាពថ្មីៗ, រៀបចំវគ្គបណ្តុះបណ្តាលសមាជិក និងសាធារណជនសរុបចំនួន១៨វគ្គ, ចូលរួមប្រជុំផ្តល់ធាតុចូលជាមួយក្រសួងអប់រំ យុវជន និងកីឡា ក្នុងការរកដំណោះស្រាយចំពោះបញ្ហាប្រឈមនានាក្នុងវិស័យឯកជន, ចូលរួមផ្តល់ធាតុចូល និងបង្កើតក្រុមការងារគាំទ្រការពង្រឹងគុណភាពគ្រឹះស្ថានសិក្សាឯកជន ជាមួយក្រសួងអប់រំ, ចុះអនុស្សរណៈយោគយល់គ្នាជាមួយក្រសួងការងារ ស្តីពីកិច្ចសហប្រតិបត្តិការលើការហាត់ការ និងចុះកម្មសិក្សាដើម្បីគាំទ្រដល់ការបណ្តុះបណ្តាលជំនាញវិជ្ជាជីវៈ និងបច្ចេកទេស, ចូលរួមជាមួយក្រុមការងារវេទិការាជរដ្ឋាភិបាល និងវិស័យឯកជន ព្រមទាំងសកម្មភាពជាច្រើនទៀត។
ជាមួយគ្នានេះដែរ ឯកឧត្តមបណ្ឌិត ហុង លីម អគ្គនាយកសាលាអន្តរជាតិអាស៊ាន និងជាប្រធានក្រុមប្រឹក្សាភិបាលអាណត្តិថ្មី នៃសហព័ន្ធសេវាអប់រំនៅកម្ពុជា មានប្រសាសន៍ថា សម្រាប់អាណត្តិថ្មី ២០២៥-២០២៧ ឯកឧត្តមនឹងបន្តដឹកនាំសហព័ន្ធស្របតាមទស្សនវិស័យ និងបេសកកម្មដើម្បីចូលរួមចំណែកជាមួយរាជរដ្ឋាភិបាលកម្ពុជា ក្រសួងអប់រំ យុវជន និងកីឡា និងក្រសួងពាក់ព័ន្ធនានាក្នុងការអភិវឌ្ឍន៍ធនធានមនុស្សដែលប្រកបដោយសមត្ថភាពខ្ពស់សម្រាប់អនាគតប្រទេសកម្ពុជា។ ជាមួយគ្នាក៏នឹងបន្តពង្រឹងភាពជាដៃគូរវាងវិស័យសាធារណៈ និងឯកជនលើការងារអប់រំឱ្យមានគុណភាព ដើម្បីបង្កើតមូលធនមនុស្សក្នុងវិស័យឌីជីថលតាមតម្រូវការរបស់ប្រទេសជាតិ ព្រមទាំងពង្រឹងចំណេះដឹង និងជំនាញរបស់គ្រូបង្រៀន គ្រូបណ្តុះបណ្តាល និងអ្នកអប់រំទូទៅ ដើម្បីធានាបាននូវគុណភាពធនធានមនុស្សប្រកបដោយសមត្ថភាពខ្ពស់៕ អត្ថបទសហការ
ចែករំលែកព័តមាននេះ