រាជធានីភ្នំពេញ ៖ ប្រសិនបើអ្នកជាឪពុកម្តាយ អារម្មណ៍តានតឹងរបស់អ្នក គឺជារឿងធម្មតា ។ ដំណឹងល្អគឺថា អ្នកអាចផ្លាស់ប្តូររបៀបដែលអ្នកនិយាយជាមួយកូន ដោយប្តូរពីការស្រែកជេរកូនទៅជាការសន្ទនាដោយការគោរព ។…
រាជធានីភ្នំពេញ ៖ ប្រសិនបើអ្នកជាឪពុកម្តាយ អារម្មណ៍តានតឹងរបស់អ្នក គឺជារឿងធម្មតា ។ ដំណឹងល្អគឺថា អ្នកអាចផ្លាស់ប្តូររបៀបដែលអ្នកនិយាយជាមួយកូន ដោយប្តូរពីការស្រែកជេរកូនទៅជាការសន្ទនាដោយការគោរព ។
ហេតុអ្វីបានជាឪពុកម្តាយស្រែកជេរកូន ? ចម្លើយដោយខ្លី គឺដោយសារយើងមានអារម្មណ៍មិនល្អ ឬខឹង ដែលធ្វើឱ្យយើងបញ្ចេញសំឡេងធំដាក់កូន ប៉ុន្តែវាកម្រនឹងដោះស្រាយបញ្ហាបានណាស់ ។ វារឹតតែអាចធ្វើឱ្យកុមារស្ងប់ស្ងាត់ និងធ្វើឱ្យពួកគេស្តាប់បង្គាប់មួយរយៈពេលខ្លីប៉ុណ្ណោះ ប៉ុន្តែវានឹងមិនធ្វើឱ្យពួកគេកែតម្រូវអាកប្បកិរិយា ឬបញ្ហារបស់ពួកគេឡើយ ។ សរុបមក វាបង្រៀនពួកគេឱ្យខ្លាចអ្នក ជាជាងយល់ពីផលវិបាកនៃសកម្មភាពរបស់ពួកគេ ។ កុមារពឹងផ្អែកលើឪពុកម្តាយរបស់ពួកគេសម្រាប់ការរៀនសូត្រ ។ ប្រសិនបើកំហឹង និងការឈ្លានពាន ដូចជាការស្រែក ការជេរ គឺជាអ្វីដែលកុមារយល់ថាជា ធម្មតា ក្នុងគ្រួសាររបស់ពួកគេ កូនអ្នកនឹងធ្វើបែបនេះដូចគ្នានៅក្នុងជីវិតរបស់ពួកគេ ។
ដើម្បីធានានូវសុវត្ថិភាពកូនរបស់អ្នក គឺអ្នកត្រូវគ្រប់គ្រងអារម្មណ៍ផ្ទាល់ខ្លួនរបស់អ្នកសិន ។ ផលប៉ះពាល់នៃការស្រែក ប្រសិនបើអ្នកធ្លាប់ត្រូវបានគេស្រែកដាក់ អ្នកដឹងថា សំឡេងខ្លាំងនោះមិនធ្វើឱ្យអ្នកយល់ច្បាស់ពីអ្វីដែលគេចង់និយាយនោះទេ ។ កូនរបស់អ្នកក៏មិនខុសគ្នាដែរ ។ ការស្រែកនឹងធ្វើឱ្យពួកគេឈប់មួយភ្លេត ហើយការប្រៀនប្រដៅកូននឹងកាន់តែពិបាក ព្រោះរាល់ពេលដែលអ្នកបន្លឺសំឡេងរបស់អ្នក កូនកាន់តែទទួលមិនបាន ។ ការស្រែកធ្វើឱ្យកុមារកាន់តែឆេវឆាវ ទាំងផ្លូវកាយ និងពាក្យសំដី ។ ការស្រែកជាទូទៅ មិនថាបរិបទបែបណានោះទេ គឺជាការបញ្ចេញកំហឹង ។ វាធ្វើឱ្យកុមារភ័យខ្លាច និងធ្វើឱ្យពួកគេមានអារម្មណ៍អសន្តិសុខ ។
ផ្ទុយទៅវិញ ភាពស្ងប់ស្ងាត់ គឺជាការដោះស្រាយបញ្ហាឡើងវិញ ដែលធ្វើឱ្យកុមារមានអារម្មណ៍ស្រឡាញ់ និងទទួលយក ទោះបីជាមានអាកប្បកិរិយាមិនល្អក៏ដោយ ។ ការស្រែកដាក់កុមារមិនមែនជារឿងល្អទេ ។ វាអាចបង្កផលប៉ះពាល់រយៈពេលវែង ដូចជាការថប់បារម្ភ ការគោរពខ្លួនឯងទាប និងការកើនឡើងការឈ្លានពាន ។ កុមារដែលមានទំនាក់ទំនងផ្លូវចិត្តខ្លាំងជាមួយឪពុកម្តាយងាយនឹងប្រដៅ ។ នៅពេលដែលកុមារមានអារម្មណ៍ថាមានសុវត្ថិភាព និងស្រឡាញ់ដោយគ្មានលក្ខខណ្ឌ ពួកគេនឹងកាន់តែទទួលយកការសន្ទនា និងស្តាប់ មុនពេលជម្លោះកើនឡើងទៅជាវគ្គនៃការស្រែកខឹង ។
នេះជារបៀបដែលអ្នកអាចប្រើជំនួសឱ្យការស្រែកជេរកូន ៖
១. ទុកពេលឱ្យខ្លួនឯង ៖ ចាប់ខ្លួនឯងសិនមុននឹងខឹងខ្លាំងពេក ដែលអាចធ្វើឱ្យអ្នកបាត់បង់ការគ្រប់គ្រង ហើយបន្លឺសំឡេងស្រែក ។ ផ្តល់ឱកាសឱ្យខ្លួនអ្នកដើម្បីវាយតម្លៃឡើងវិញ និងដកដង្ហើមយ៉ាងជ្រៅ ដែលនឹងជួយអ្នកឱ្យស្ងប់ស្ងាត់ ។
២. និយាយអំពីអារម្មណ៍ ៖ កំហឹង ជាអារម្មណ៍ធម្មតាដែលអ្នកអាចរៀនបានពីការគ្រប់គ្រង។ តាមរយៈការទទួលស្គាល់អារម្មណ៍ទាំងអស់ ចាប់តាំងពីក្ដីរីករាយ និងរំភើបរហូតដល់ទុក្ខព្រួយ កំហឹង ការច្រណែន និងការតានតឹង អ្នកកំពុងបង្រៀនកូនរបស់អ្នកថា វាគឺជាផ្នែកមួយរបស់មនុស្សយើង ។
៣. ដោះស្រាយអាកប្បកិរិយាមិនល្អដោយស្ងប់ស្ងាត់ ប៉ុន្តែរឹងមាំ ៖ កុមារធ្វើខុសម្តងម្កាល នោះជាផ្នែកនៃការធំឡើងរបស់កុមារ ។ និយាយជាមួយកូនក្នុងរបៀបម៉ឺងម៉ាត់ ដែលបន្សល់ទុកនូវសេចក្តីថ្លៃថ្នូររបស់ពួកគេ ប៉ុន្តែបញ្ជាក់ថាអាកប្បកិរិយាមួយចំនួនមិនត្រូវបានអត់ឱននោះឡើយ ។
៤. ប្រើផលវិបាក ៖ ការប្រើប្រាស់ការគំរាមកំហែង និងការដាក់ទណ្ឌកម្ម បង្កើតអារម្មណ៍ខឹងសម្បារ ការអាក់អន់ចិត្ត និងជម្លោះកាន់តែច្រើន ។ ក្នុងរយៈពេលវែង វារារាំងកូនរបស់អ្នកពីការអភិវឌ្ឍវិន័យខាងក្នុង ។ ការគំរាមកំហែង និងការដាក់ទណ្ឌកម្មធ្វើឱ្យកុមារអាម៉ាស់ ហើយធ្វើឱ្យពួកគេមានអារម្មណ៍អសន្តិសុខ ។ ផ្ទុយទៅវិញ ចូរបង្កើតផលវិបាក ដែលនិយាយអំពីអាកប្បកិរិយាជាក់លាក់មួយ ប៉ុន្តែមកជាមួយការព្រមានដោយយុត្តិធម៌ ជួយកុមារឱ្យមានជម្រើសកាន់តែប្រសើរ ៕ ប្រភព ៖ healthline
អត្ថបទនេះផលិតឡើងក្រោមកិច្ចសហប្រតិបត្តិការជាមួយសាលារៀនវ៉េស្ទឡាញន៍ និង សាលារៀនណត្សឡាញន៍ ។ សាលារៀនបើកវគ្គសិក្សាថ្មីចូលរៀនថ្ងៃទី ៤ ខែវិចិ្ឆកា ឆ្នាំ ២០២៤ សម្រាប់កម្មវិធីមត្តេយ្យភាសាខ្មែរ និងអង់គ្លេស កម្មវិធីភាសាអង់គ្លេស និងកម្មវិធីភាសាចិន ។ កម្មវិធីចំណេះទូទៅខ្មែរពីថ្នាក់ទី ១ ដល់ទី ១២ ចាប់ទទួលចុះឈ្មោះ ចូលរៀនរៀងរាល់ថ្ងៃ ។ សាលារៀនផ្តល់ជូនអាហាររូបករណ៍រហូតដល់ ៣០% លើតម្លៃសិក្សា ការធានារ៉ាប់រងគ្រោះ ថ្នាក់បុត្រធីតា និងការការពារការសិក្សាបុត្រធីតារហូតដល់ ៥ ឆ្នាំ ។ សម្រាប់ព័ត៌មានបន្ថែម សូមទំនាក់ទំនងទូរស័ព្ទលេខ ៖ ០៩២ ៨៨៨ ៤៩៩ / ០១៥ ៨០៥ ១២៣ ៕
ចែករំលែកព័តមាននេះ