រាជធានីភ្នំពេញ ៖ សាលាបឋមសិក្សា អ្នកឧកញ៉ាមហាភក្តី ហ៊ុន នាង ទួលទំពូងទី ២ បានប្រារព្ធពិធីបើកបវេសនកាលឆ្នាំថ្មី ឆ្នាំសិក្សា…
រាជធានីភ្នំពេញ ៖ សាលាបឋមសិក្សា អ្នកឧកញ៉ាមហាភក្តី ហ៊ុន នាង ទួលទំពូងទី ២ បានប្រារព្ធពិធីបើកបវេសនកាលឆ្នាំថ្មី ឆ្នាំសិក្សា ២០២៤-២០២៥ នៅថ្ងៃទី ១ ខែវិច្ឆិកា ឆ្នាំ ២០២៤ នេះ ដោយមានការចូលរួមពីលោកនាយកសាលា លោកគ្រូ អ្នកគ្រូ សិស្សានុសិស្ស និងអាណាព្យាបាលសិស្សយ៉ាងច្រើនកុះករ ប្រកបដោយទឹកមុខសប្បាយរីករាយ ។
លោក ប៉ែន ពុធតារា នាយកសាលាបឋមសិក្សា អ្នកឧកញ៉ាមហាភក្តី ហ៊ុន នាង ទួលទំពូងទី ២ បានអានរបាយការណ៍បើកបវេសនកាល ឆ្នាំសិក្សា ២០២៤-២០២៥ នេះថា ស្ថានភាពទូទៅរបស់ សាលាបឋមសិក្សា អ្នកឧកញ៉ាមហាភក្តី ហ៊ុន នាង ទួលទំពូងទី ២ ក្នុងឆ្នាំសិក្សា ២០២៣ – ២០២៤ កន្លងមក មានមន្ត្រីបុគ្គលិកសិក្សាមានចំនួន ៣២នាក់, ស្រី ២៦នាក់ ។ មានថ្នាក់រៀនមានចំនួន ២៤ថ្នាក់ក្នុងនោះមានមត្តេយ្យ ០១ថ្នាក់ និងថ្នាក់ទី ១ ដល់ថ្នាក់ទី ៦ មាន ២៣ថ្នាក់ ។ សិស្សមានសរុបចំនួន ៨៥៧នាក់, ស្រី ៤០១នាក់ ។ សិស្សថ្នាក់ទី ១ ដល់ថ្នាក់ទី ៦ បានឡើងថ្នាក់ចំនួន ៧៣៧នាក់ ស្មើ ៩៤,៣៩% និងសិស្សបានឆ្លងភូមិសិក្សាទៅវិទ្យាល័យមានចំនួន ១២៣នាក់ ស្មើ ៩៣.១៨% ។
លោកនាយក បន្តថា សមិទ្ធិផលសម្រេចបានរួមមាន ៖ កែលម្អបន្ទប់ប្រជុំ និងធ្វើពិដានពីម្នាងសិលា តបណ្តាញអគ្គិសនី បំពាក់កង្ហារ សរុបថវិកា ៤,៣០០ដុល្លារ ។ ទិញកៅអីជ័រសរុប ២៣០គ្រឿង សរុបថវិកា ១,១៩៦ដុល្លារ ។ រៀបចំធ្វើសួនជីវចម្រុះអគារ (ក) ចាក់ដីទន្លេ រៀបធ្វើសួន ធ្វើអាងចិញ្ចឹមកង្កែបសរុបថវិកា ១,០៥០ដុល្លារ ។ ការចំណាយលើការទិញ និងដាក់ចំរឹងដែកក្នុងសួនជីវចម្រុះ សរុបថវិកា ៤៥៦ដុល្លារ ។ រៀបចំបន្ទប់កុំព្យូទ័រ និងទិញកុំព្យូទ័រចំនួន ២២គ្រឿង សរុបថវិកា ៣,១០០ដុល្លារ ។ សរុបទឹកប្រាក់ចំណាយទាំងអស់ស្មើនឹង 20,902 ដុល្លារអាមេរិក ។
លោកនាយកសាលា បន្ថែមទៀតថា ទិដៅឆ្នាំសិក្សាថ្មី ២០២៤ – ២០២៥ សាលាបានលើកផែនការដូចតទៅ ៖ សាងសង់កន្លែងអាហារដ្ឋានសម្រាប់លោកគ្រូ អ្នកគ្រូ និងសិស្សានុសិស្សដាក់ដំបូលស័ង្កសីអស់ថវិកា ៦៥០០ដុល្លារ ។ រៀបចំសាងសង់នូវក្រោមអគារ (គ) បន្ទប់ថ្មីបន្ថែមចំនួន ៣បន្ទប់ទៀត ។ បន្តអភិវឌ្ឍន៍សាលារៀន លើកស្ទួយវិស័យអប់រំឱ្យបានប្រសើរឡើងបន្ថែមទៀត ។ បន្តប្រមូលសិស្សចូលរៀនឱ្យបានទាន់ពេលវេលា ។ បន្តប្រមូលសិស្សចូលរៀនពីរវេនព្រឹក ល្ងាច ព្រឹករៀនរដ្ឋ ល្ងាចរៀនបំប៉នបន្ថែមលើមុខវិជ្ជា ភាសាខ្មែរ គណិតវិទ្យា អង់គ្លេស កុំព្យូទ័រ ដោយប្រើប្រាស់មូលនិធិសហគមន៍ ។ កាត់បន្ថយអត្រាសិស្សបោះបង់ និងសិស្សត្រួតថ្នាក់ ។
បន្តជួយលើទឹកចិត្តសិស្សរៀនខ្សោយ និងជួបការលំបាកគ្រប់កម្រិតថ្នាក់ ។ អនុវត្តការប្រជុំបច្ចេកទេសរៀងរាល់ថ្ងៃព្រហស្បតិ៍ សប្តាហ៍ទី ៤ ឱ្យបានទៀងទាត់ ។ ពង្រឹងការងារចុះអធិការកិច្ចគ្រប់កម្រិតថ្នាក់ ។ បង្កើនទំនាក់ទំនងជាមួយមាតាបិតា សហគមន៍ អង្គការនានា និងអាជ្ញាធរដែនដីក្នុងការអភិវឌ្ឍន៍សាលារៀនលើសពីនេះគណៈនាយក ក៏ដូចជាលោកគ្រូ អ្នកគ្រូ មានចក្ខុវិស័យទូលំទូលាយ ដោយខិតខំស្វ័យសិក្សា ពង្រឹងចំណេះដឹងផ្ទាល់ខ្លួន ដើម្បីយកមកបណ្តុះបណ្តាល ដល់សិស្សានុសិស្ស ឱ្យពួកគាត់ទទួលបាននូវចំណេះដឹងពិតប្រាកដទទួលបាននូវគុណសម្បទាសតវត្សរ៍ទី ២១ និងក្លាយជាពលរដ្ឋសកលនាថ្ងៃអនាគត ។
លោក អ៊ុវ ថាវី នាយករងរដ្ឋបាលខណ្ឌចំការមន ដែលចូលរួមក្នុងពិធីបើកបវេសនកាលឆ្នាំថ្មី ឆ្នាំសិក្សា ២០២៤-២០២៥ នេះបានអានសារលិខិត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងក្នុងឱកាសបើកបវេសនកាលឆ្នាំសិក្សា ២០២៤-២០២៥ ដែលមានខ្លឹមសារថា ថ្ងៃទី ១ ខែវិច្ឆិកា ឆ្នាំ២០២៤ ជាថ្ងៃបើកទំព័រថ្មីនៃការចាប់ផ្តើមជីវិតសិក្សាដំបូងរបស់ក្មួយៗ ដែលទើបនឹងដល់អាយុត្រូវចូលសាលារៀន ជាពិសេសកុមារតូចនៅតាមសាលាមត្តេយ្យសិក្សា និងកុមារអាយុ ៦ឆ្នាំនៅតាមសាលាបឋមសិក្សា ព្រមទាំងជាថ្ងៃថ្មីរបស់ក្មួយៗ ដែលបានឡើងពីកម្រិតថ្នាក់មួយទៅកម្រិតថ្នាក់មួយទៀតនៅក្នុងឆ្នាំសិក្សា ២០២៤-២០២៥ ។
ក្នុងគោលបំណងកសាងមូលធនមនុស្សប្រកបដោយចំណេះដឹង ចំណេះធ្វើ គុណធម៌ និងសុខភាពល្អមាំមួន រាជរដ្ឋាភិបាលកម្ពុជា នីតិកាលទី ៧ នៃរដ្ឋសភា បានដាក់ចេញនូវវិធានការគន្លឹះចំនួន ៥ ក្នុងនោះក៏មានវិធានការគន្លឹះក្នុងវិស័យអប់រំដែលមានគោលដៅលើកកម្ពស់គុណភាពអប់រំ ។ ឆ្នាំទី១ នៃនីតិកាលទី ៧ នៃរដ្ឋសភា រាជរដ្ឋាភិបាល តាមរយៈក្រសួងអប់រំ យុវជន និងកីឡា បានយកចិត្តទុកដាក់និងដាក់ចេញនូវកម្មវិធីផ្សេងៗ សំដៅលើកកម្ពស់គុណភាពអប់រំ ដោយផ្តោតលើការពង្រឹងគុណភាពសាលារដ្ឋ ចាប់ពីថ្នាក់មត្តេយ្យសិក្សាដល់មធ្យមសិក្សា តាមរយៈវិធានការ ចំនួន ៤ រួមមាន ៖ ទី ១) ការពង្រឹងអភិបាលកិច្ច ទី ២) ការពិនិត្យកែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា ឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស ទី ៣) ការយកចិត្តទុកលើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី ៤) ការជំរុញនិងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យស្លោក «ភាពជាដៃគូរដ្ឋ និងសហគមន៍ ដើម្បីការអប់រំ» ។
ឆ្លើយតបនឹងស្មារតីខាងលើនេះ ក្រសួងអប់រំ យុវជន និងកីឡា បានបញ្ចូលវិធានការទាំង ៤ខាងលើ ទៅក្នុង «ស្តង់ដាសាលារៀនគំរូ» ដែលមាន ៥ ស្តង់ដា សម្រាប់សាលាមត្តេយ្យសិក្សារហូតដល់មធ្យមសិក្សា និងបានវាយតម្លៃសាលារៀនចំនួន ១២០ ជាប់ស្តង់ដា ក្នុងឆ្នាំសិក្សា២០២២-២០២៣ ។ ជាមួយគ្នានេះ ក្នុងក្របខ័ណ្ឌនៃការអប់រំបឋមសិក្សា រាជរដ្ឋាភិបាលបានអនុវត្តនូវវិធានការ ៣ ក្នុងចំណោមវិធានការទាំង ៤ ខាងលើ តាមរយៈការអនុវត្តសាកល្បងនៅក្នុងសាលាបឋមសិក្សាគោលដៅ ៤២ ក្នុង ៩ រាជធានី-ខេត្ត ដោយប្រើយន្តការគណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ ។ ខ្ញុំសូមគូសបញ្ជាក់នូវកម្មវិធីសំខាន់ៗ ដែលបានដាក់ឱ្យអនុវត្តនៅសាលារៀនមួយចំនួន រួមមាន ៖ ការបន្ថែមម៉ោងសិក្សា (២ម៉ោង ក្នុងមួយថ្ងៃ) ការអប់រំបំណិនជីវិត សីលធម៌ វប្បធម៌ សិល្បៈ ភាសាបរទេស និងកុំព្យូទ័រ ។
ផ្អែកតាមមេរៀនពិសោធន៍ និងឧត្តមានុវត្តន៍នៃការអនុវត្តសាកល្បងនៅក្នុងសាលាបឋមសិក្សាគោលដៅទាំង ៤២ និងសាលារៀនជាប់ស្តង់ដាសាលារៀនគំរូទាំង ១២០ រាជរដ្ឋាភិបាលនឹងធ្វើការបន្ស៊ីគ្នានូវទស្សនាទានការប្រតិបត្តិ និងការគាំទ្រសាលារៀន ដោយប្រើប្រាស់យន្តការរួម ចាប់ពីឆ្នាំសិក្សា ២០២៤-២០២៥ តទៅ ។
ជារួម រាជរដ្ឋាភិបាលកម្ពុជានៅតែបន្តយកចិត្តទុកដាក់ខ្ពស់លើវិស័យអប់រំ តាមរយៈការបន្តរិះរកវិធានការ និងយុទ្ធសាស្ត្របន្ថែមទៀត ដោយធ្វើយ៉ាងណាឱ្យសាលារៀនក្លាយជាអង្គភាពផ្តល់សេវាសាធារណៈ ដែលមានប្រសិទ្ធភាពខ្ពស់ អភិបាលកិច្ចល្អ និងមានគណនេយ្យភាពជាមួយនឹងប្រជាជននិងសហគមន៍ ។ ដូច្នេះហើយសាលារៀនត្រូវអនុវត្តតួនាទីប្រកបដោយការទទួលខុសត្រូវខ្ពស់ ជាពិសេសលើសកម្មភាពបង្រៀន និងរៀន ដែលនឹងនាំទៅរកការប្រែប្រួលជាវិជ្ជមាននៃលទ្ធផលសិក្សារបស់សិស្ស ប្រកបដោយវិន័យ សីលធម៌ គុណធម៌ និង ឥរិយាបថថ្លៃថ្នូរ សក្តិសមជាកុលបុត្រ កុលធីតាខ្មែរ និងជាទំពាំងស្នងឫស្សីរបស់ជាតិ ។
ដើម្បីឱ្យដំណើរការឆ្នាំសិក្សាថ្មី ២០២៤-២០២៥ ទទួលបានលទ្ធផលល្អប្រសើរតាមការគ្រោងទុកទូលព្រះបង្គំ ខ្ញុំព្រះករុណា ខ្ញុំសូមលើកឡើងនូវចំណុចមួយចំនួន ដូចខាងក្រោម ៖
ទី ១- ក្រសួងអប់រំ យុវជន និងកីឡា ត្រូវបន្តអនុវត្តកំណែទម្រង់វិស័យអប់រំ ដូចដែលបានដាក់ចេញរួចហើយជាពិសេសការរៀបចំយន្តការគាំទ្រ និងយន្តការវាយតម្លៃសាលារៀនគំរូ ឆ្ពោះទៅពង្រឹងនិងពង្រីកការអនុវត្តស្តង់ដាសាលារៀនគំរូ ចាប់ពីមត្តេយ្យសិក្សារហូតដល់មធ្យមសិក្សា ដោយធានាថាសាលារៀនជាកន្លែងផ្តល់ការអប់រំប្រកបដោយគុណភាព ប្រសិទ្ធភាព សុខសុវត្ថិភាព និងលទ្ធផលសិក្សារបស់សិស្សបានល្អប្រសើរ ។
ទី ២- គ្រឹះស្ថានសិក្សាគ្រប់កម្រិត ត្រូវអនុវត្តកម្មវិធីសិក្សាផ្លូវការឱ្យបានពេញលេញ និងមានប្រសិទ្ធភាពជាពិសេសត្រូវរិះរកវិធីដើម្បីអនុវត្តកម្មវិធីក្រៅម៉ោងសិក្សា ក្នុងគោលដៅបន្ថែម ២ម៉ោងសិក្សាយ៉ាងតិចក្នុងមួយថ្ងៃ ដោយផ្តោតលើការបន្ថែមម៉ោងសម្រាប់មុខវិជ្ជាសិក្សាគោល និងការពង្រឹងវិន័យ សីលធម៌ និងឥរិយាបថ ។
ទី ៣- គ្រឹះស្ថានសិក្សាគ្រប់កម្រិត ត្រូវរៀបចំបរិស្ថានសាលារៀនស្អាត គ្មានសំរាម សាលារៀនបៃតង ឱ្យសក្តិសមជាទីកន្លែងផ្តល់ការអប់រំ និងបណ្តុះគំនិតស្អាតស្អំ ឥរិយាបថល្អ និងគ្មានការញាំញីផ្លូវចិត្ត និង ផ្លូវកាយ ។ ជាមួយគ្នានេះ ត្រូវចូលរួមលើកកម្ពស់សុខភាព និងអាហារូបត្ថម្ភដល់កុមារ ដើម្បីកាត់បន្ថយជំងឺនិងផលប៉ះពាល់លើសុខភាព និងឈានទៅលើកកម្ពស់លទ្ធផលសិក្សារបស់សិស្ស ។
ទី ៤- លោកគ្រូ អ្នកគ្រូទាំងអស់ សូមបន្តដើរតួនាទីជាបុគ្គលនាំមុខ ជាឪពុកម្តាយទី ២ ជាមគ្គុទ្ទេសក៍ជាអ្នកស្រាវជ្រាវ ជាទីប្រឹក្សា និងជាអ្នកច្នៃប្រឌិត ដោយត្រូវខិតខំប្រឹងប្រែងអភិវឌ្ឍសមត្ថភាពរបស់ខ្លួនជាប្រចាំ ទាំងផ្នែកចំណេះដឹងនិងវិធីសាស្ត្របង្រៀន រួមទាំងការប្រើប្រាស់បច្ចេកវិទ្យាព័ត៌មាន និងភាសាបរទេសផងដែរ ។
ទី ៥- មាតាបិតា អ្នកអាណាព្យាបាល សូមចូលរួមតាមដានលទ្ធផលសិក្សា អត្តចរិត សីលធម៌ និងសុជីវធម៌របស់កូនចៅ ទាំងនៅក្នុងគ្រួសារនិងក្នុងសហគមន៍ ព្រមទាំងជួយបង្រៀនកូនបន្ថែម ឬបង្កលក្ខណៈឱ្យកូនបានសិក្សាបន្ថែមពេលនៅផ្ទះ ជាពិសេសការចូលរួមអានសៀវភៅជាមួយកូនដើម្បីហ្វឹកហាត់ទាំងនៅសាលារៀន និងនៅផ្ទះ ចូលរួមគាំទ្រដល់ការអភិវឌ្ឍសាលារៀន និងគាំទ្រដល់គ្រូបង្រៀនតាមគ្រប់លទ្ធភាព ។
ទី ៦- ក្មួយៗ សិស្សានុសិស្ស យុវជន យុវនារីទាំងអស់ សូមបន្តខិតខំរៀនសូត្រនិងស្រាវជ្រាវឱ្យបានខ្ជាប់ខ្ជួននិងចូលរួមធ្វើអំពើល្អ ដើម្បីការរីកចម្រើននៅក្នុងគ្រួសារ សង្គម និងប្រទេសជាតិយើងទាំងមូល ។ ជាមួយគ្នានេះដែរ សូមក្មួយៗចងចាំជានិច្ចថា បើយើងស្រឡាញ់ខ្លួន ស្រឡាញ់ឪពុកម្តាយ និងចង់បានអនាគតរុងរឿង គឺត្រូវនៅឱ្យឆ្ងាយពីគ្រឿងញៀ.ន និងការប្រព្រឹត្តអំពើអបាយមុខផ្សេងៗ ។
ទី ៧- ក្រសួង ស្ថាប័នពាក់ព័ន្ធ អាជ្ញាធរដែនដី សហគមន៍ និងអ្នកពាក់ព័ន្ធទាំងអស់ សូមបន្តចូលរួមនិងគាំទ្រឱ្យកាន់តែសកម្មថែមទៀតក្នុងការអភិវឌ្ឍសាលារៀន ព្រមទាំងបន្តជួយផ្សព្វផ្សាយឱ្យបានទូលំទូលាយ អំពីកិច្ចការពារកុមារពីអំពើហិ.ង្សា និងពលកម្មកុមារគ្រប់ទម្រង់ ។
ទី ៨- ដៃគូអភិវឌ្ឍ អង្គការមិនមែនរដ្ឋាភិបាលជាតិនិងអន្តរជាតិ និងសប្បុរសជននានា សូមបន្តចូលរួមឱ្យបានកាន់តែសកម្មថែមទៀត ក្នុងការជួយគាំទ្រដល់សកម្មភាពអប់រំនៅគ្រប់ទីកន្លែង និងតាមគ្រប់លទ្ធភាព ។
ទី ៩- គ្រប់ស្ថានីយវិទ្យុ ទូរទស្សន៍របស់រដ្ឋនិងឯកជន និងប្រព័ន្ធផ្សព្វផ្សាយទាំងអស់ សូមបន្តជួយផ្សព្វផ្សាយឱ្យបានទូលំទូលាយ អំពីយុទ្ធនាការប្រមូលកុមារចូលរៀននិងសារៈសំខាន់នៃការអប់រំ ជាពិសេសការផលិតកម្មវិធីអប់រំ និងវីដេអូបង្រៀន ដើម្បីឱ្យសេវាអប់រំកាន់តែគ្របដណ្តប់ទៅគ្រប់ទីកន្លែងគ្រប់ពេលវេលា និងស្របទៅនឹងទស្សនាទាននៃការអប់រំពេញមួយជីវិត ។
ទី ១០- សូមមាតាបិតា អ្នកអាណាព្យាបាលគ្រប់រូបនាំកូនចៅទៅចុះឈ្មោះចូលរៀន និងបន្តផ្តល់ការគាំទ្រការលើកទឹកចិត្ត និងការជួយបង្រៀនបន្ថែមតាមគ្រប់រូបភាព នៅឆ្នាំសិក្សាថ្មី ២០២៤-២០២៥ នេះ ទាំងអស់គ្នា ៕
ចែករំលែកព័តមាននេះ