រាជធានីភ្នំពេញ ៖ ថ្លែងនៅក្នុងសិក្ខាសាលា ស្តីពី “ការលើកកម្ពស់បរិយាបន្នហិរញ្ញវត្ថុ និងការប្រើប្រាស់ប្រាក់រៀល” ដែលត្រូវបានរៀបចំធ្វើទ្បើងនៅ មណ្ឌលសិក្សាបច្ចេកទេសធនាគារ នាថ្ងៃទី ៩…
រាជធានីភ្នំពេញ ៖ ថ្លែងនៅក្នុងសិក្ខាសាលា ស្តីពី “ការលើកកម្ពស់បរិយាបន្នហិរញ្ញវត្ថុ និងការប្រើប្រាស់ប្រាក់រៀល” ដែលត្រូវបានរៀបចំធ្វើទ្បើងនៅ មណ្ឌលសិក្សាបច្ចេកទេសធនាគារ នាថ្ងៃទី ៩ ខែតុលា ឆ្នាំ ២០២៤ ឯកឧត្តម យឹម លាភ ទេសាភិបាលរងធនាគារជាតិ នៃកម្ពុជា បានបញ្ជាក់ថា គោលបំណងនៃការរៀបចំសិក្ខាសាលានេះ គឺដើម្បី ផ្សព្វផ្សាយពីកិច្ចខិតខំប្រឹងប្រែង រួមគ្នារបស់ធនាគារជាតិនៃកម្ពុជា និងក្រសួងពាណិជ្ជកម្ម ក្នុងការលើកកម្ពស់ការយល់ដឹង ពីសារៈសំខាន់ និងគោលនយោបាយលើកកម្ពស់ការប្រើប្រាស់ប្រាក់រៀល និងបរិយាបន្ន ហិរញ្ញវត្ថុរបស់ប្រជាជន ក៏ដូចជាក្រុមហ៊ុន-សហគ្រាសនៅកម្ពុជា ។
ឯកឧត្តម យឹម លាភ បានលើកទ្បើងថា កន្លងមក ធនាគារជាតិនៃកម្ពុជា និងក្រសួង-ស្ថាប័នពាក់ព័ន្ធ បានខិតខំអនុវត្តការងារ ទាំងពីរខាងលើ ហើយសម្រេចបានលទ្ធផលល្អប្រសើរជាបន្តបន្ទាប់ ។ ជាក់ស្តែង ក្នុងការ លើកកម្ពស់ការប្រើប្រាស់ប្រាក់រៀល ធនាគារជាតិនៃកម្ពុជាបានចេញនូវវិធានការនានា ស្របតាមស្ថានភាពទីផ្សារ ការរៀបចំសិក្ខាសាលានិងយុទ្ធនាការផ្សព្វផ្សាយពីប្រាក់រៀល នៅរាជធានីភ្នំពេញនិងតាមបណ្តាខេត្ត ពង្រឹងកិច្ចសហការជាមួយក្រសួង-ស្ថាប័ន និង ភាគីពាក់ព័ន្ធ ដើម្បីបញ្ញាបស្មារតីស្រឡាញ់ប្រាក់រៀល និងលើកកម្ពស់ការចូលរួមរបស់ សាធារណជនឱ្យងាកមកប្រើប្រាស់រូបិយវត្ថុជាតិឱ្យកាន់តែច្រើនជាងមុន ។
ឯកឧត្តម ថា បរិយាបន្ននិងចំណេះដឹងហិរញ្ញវត្ថុ និងកិច្ចការពារអតិថិជន ត្រូវបានលើកកម្ពស់ជាប្រចាំ ដើម្បីឱ្យការប្រើប្រាស់សេវាហិរញ្ញវត្ថុកាន់តែមានប្រសិទ្ធភាព ដែលនឹងរួមចំណែកលើក ស្ទួយជីវភាពរស់នៅរបស់ប្រជាជន និងកាត់បន្ថយភាពក្រីក្រ ។
យ៉ាងណាក៏ដោយលោកទេសាភិបាលរងក៏បានវាយតម្លៃខ្ពស់ចំពោះការអនុវត្តវិធានការជំរុញការប្រើប្រាស់ ប្រាក់រៀលរបស់ក្រសួងពាណិជ្ជកម្ម ដែលបានរួមចំណែកយ៉ាងសំខាន់នៅក្នុងការបង្កើន ការប្រើប្រាស់ប្រាក់រៀលកន្លងមក ជាពិសេស ការដាក់ឱ្យអនុវត្តប្រកាសតម្រូវឱ្យមានការ ដាក់ស្លាកតម្លៃនៅតាមហាងទំនិញនានាជាប្រាក់រៀល។ លោកថា ការដាក់ស្លាកតម្លៃជាប្រាក់រៀល ពិតជាបានផ្តល់ផលប្រយោជន៍ជាច្រើន ដូចជា ៖ ពង្រឹងការយល់ដឹងរបស់សាធារណជន ពីកម្រិតថ្លៃជាប្រាក់រៀល (notional value of local currency) បង្កើនទម្លាប់នៃការប្រើ ប្រាស់ប្រាក់រៀល បណ្តុះស្មារតីស្រឡាញ់ប្រាក់រៀល ជំរុញការប្រើប្រាស់ប្រាក់រៀលយើង ឱ្យកាន់តែទូលំទូលាយ ព្រមទាំងបង្កើនតម្លាភាពសម្រាប់អ្នកប្រើប្រាស់ប្រាក់រៀល តាមរយៈ ការកាត់បន្ថយចំណាយប្រតិបត្តិការប្តូរប្រាក់ជាដើម ។
ឯកឧត្តម បញ្ជាក់បន្ថែមថា ការផ្លាស់ប្តូរផ្នត់គំនិតរបស់ សាធារណជន ឱ្យងាកមកប្រើប្រាស់រូបិយវត្ថុជាតិពិតជាសំខាន់ណាស់ ដូច្នេះនៅពេល សាធារណជន បានឃើញការដាក់តាំងស្លាកតម្លៃជាប្រាក់រៀលកាន់តែច្រើនឡើង សាធារណជននឹងកាន់តែស៊ាំជាមួយការចាយប្រាក់រៀល និងកាន់តែមានទំនុកចិត្តប្រើ ប្រាស់ប្រាក់រៀលបន្ថែមទៀត ។
ឯកឧត្តម យឹម លាភ មានប្រសាសន៍ថា ទន្ទឹមនឹងការងារខាងលើ ធនាគារជាតិនៃកម្ពុជា និងក្រសួងពាណិជ្ជកម្ម ក៏បានលើកកម្ពស់ការ ប្រើប្រាស់ ការទូទាត់ជាប្រាក់រៀលតាមប្រព័ន្ធអេឡិចត្រូនិក ។ ជាក់ស្តែងថ្មីៗនេះ ការប្រើប្រាស់ ប្រាក់រៀលក្នុងទីផ្សារពាណិជ្ជកម្មអេឡិចត្រូនិក Cambodiatrade.com គឺជាការបោះ ជំហានមួយដ៏សំខាន់ក្នុងការជំរុញការទូទាត់ប្រាក់រៀលជាអេឡិចត្រូនិក ។ ផ្តើមពីនោះធនាគារជាតិ នៃកម្ពុជា ក៏បានដាក់ឱ្យប្រើប្រាស់ប្រព័ន្ធបាគងចាប់ តាំងពីឆ្នាំ ២០២០ មកជាមួយនឹងការ គាំទ្រឱ្យគ្រឹះស្ថានធនាគារនិងហិរញ្ញវត្ថុដទៃទៀតអភិវឌ្ឍឧបករណ៍ទូទាត់អេឡិចត្រូនិកផងដែរ ។ ការទូទាត់តាមប្រព័ន្ធអេឡិចត្រូនិក ក៏ជាផ្នែកមួយនៃការចូលរួមសម្រួលការប្រើ ប្រាស់ប្រាក់រៀលផង និងធ្វើឱ្យការទូទាត់នៅក្នុងពាណិជ្ជកម្មជារួមប្រព្រឹត្តទៅដោយ ប្រសិទ្ធភាពផងដែរ ។
ឯកឧត្តម យឹម លាភ អះអាងថា កិច្ចខិតខំប្រឹងប្រែងទាំងអស់នេះ បានជំរុញការទូទាត់ជាប្រាក់រៀលជាលំដាប់ ។ ជាក់ស្តែង ការទូទាត់ជាប្រាក់រៀលតាមប្រព័ន្ធអេឡិចត្រូនិកបានកើនឡើងយ៉ាងឆាប់រហ័ស ដែល ក្នុងឆមាសទី ១ ឆ្នាំ ២០២៤ នេះ មានកំណើន ១,៨ដង ធៀបនឹងគ្រាដូចគ្នាឆ្នាំមុន និង ២,៨ដង ធៀបនឹងឆមាសទី ១ ឆ្នាំ ២០២២ ។ ផ្អែកតាមលទ្ធផលនៃការធ្វើអង្កេតការណ៍ របស់ទីភ្នាក់ងារសហប្រតិបត្តិការអន្តរជាតិជប៉ុន (JICA) កាលពីឆ្នាំ២០២២ ទៅលើការ ប្រើប្រាស់ប្រាក់រៀល បានបង្ហាញថា ហាងលក់ទំនិញស្ទើរទាំងអស់បានបិទស្លាកតម្លៃជា ប្រាក់រៀល ជាមួយនឹងប្រាក់ដុល្លារអាមេរិក ហើយហាងលក់ទំនិញកាន់តែច្រើនឡើង បានទទួលការទូទាត់ប្រាក់រៀលតាមប្រព័ន្ធអេឡិចត្រូនិក ។ ក្នុងចំណោមហាងទំនិញចំនួន ៣៥៩ នៅក្នុងរាជធានីភ្នំពេញ ដែលបានធ្វើអង្កេតឃើញថា មានហាងទំនិញ ៨០%ទទួលការទូទាត់តាមប្រព័ន្ធអេឡិចត្រូនិក ដែលក្នុងនោះមានហាងទំនិញប្រមាណ ៤៧% ទទួលការទូទាត់ជាប្រាក់រៀលផង និងប្រាក់ដុល្លារអាមេរិកផង។ ទោះជាយ៉ាងណាក៏ដោយក៏មាន ហាងទំនិញប្រមាណ ២៨% ទទួលការទូទាត់តែជាប្រាក់ដុល្លារអាមេរិកប៉ុណ្ណោះ ដែលបញ្ហានេះទាមទារឱ្យមានកិច្ចសហការបន្ថែមទៀត ៕ អត្ថបទសហការ
ចែករំលែកព័តមាននេះ