រាជធានីភ្នំពេញ ៖ នៅថ្ងៃទី ៧ ខែតុលា ឆ្នាំ ២០២៤ មកនេះ សិស្សានុសិស្សសាលារៀនវ៉េស្ទឡាញន៍ និងសាលារៀនណត្សឡាញន៍ចំនួន…
រាជធានីភ្នំពេញ ៖ នៅថ្ងៃទី ៧ ខែតុលា ឆ្នាំ ២០២៤ មកនេះ សិស្សានុសិស្សសាលារៀនវ៉េស្ទឡាញន៍ និងសាលារៀនណត្សឡាញន៍ចំនួន ១៥ នាក់ ទទួលការតម្រង់ទិសពីសាលាស្ទេប ហ្វរវើដ អន្តរជាតិ សម្រាប់ចូលរួមកម្មវិធីទស្សនកិច្ចសិក្សានៅសាកលវិទ្យាល័យ Qiannan Normal Nationality University ក្នុងខេត្តគួយចូវ នៅសាធារណរដ្ឋប្រជាមានិតចិន រយៈពេល ៨ ថ្ងៃចាប់ពីថ្ងៃទី ១២ ដល់ថ្ងៃទី ១៩ ខែតុលា ឆ្នាំ ២០២៤ ខាងមុខនេះ ។
ក្នុងកម្មវិធីទស្សនកិច្ចសិក្សានេះផ្តោតសំខាន់លើការឈ្វេងយល់ពីវប្បធម៌ប្រពៃណីពីគ្នាទៅវិញទៅមករវាងកម្ពុជា-ចិន ការសិក្សាអំពីអក្សរសាស្ត្រចិន កីឡា ការទស្សនកិច្ចសាកលវិទ្យាល័យ ទីក្រុង សារមន្ទីរ និងតំបន់ប្រវត្តិសាស្ត្រ។ កម្មវិធីនេះផ្តល់ជូនអាហារ កន្លែងស្នាក់នៅ សំបុត្រចូលសារមន្ទីរ ទស្សនកិច្ចក្នុងសាកលវិទ្យាល័យ និងទីក្រុងដោយឥតគិតថ្លៃ ។
សូមជម្រាបថា កម្មវិធីទស្សនកិច្ចសិក្សានេះរៀបចំឡើងក្រោមកិច្ចសហការរវាងសាលាស្ទេប ហ្វរវើដ អន្តរជាតិ និងសាលារៀនវ៉េស្ទឡាញន៍លើការបង្កើនកាផ្សព្វផ្សាយឱកាសទទួលបានអាហារូបករណ៍សិក្សានៅប្រទេសចិន កម្មវិធីប្រឡងភាសាចិន និងកម្មវិធីផ្លាស់ប្តូរការសិក្សា ដែលជួយសិស្សនិស្សិតកម្ពុជាទទួលបានចំណេះដឹង និងបទពិសោធន៍ថ្មី ក៏ដូចជាឈ្វេងយល់ពីការអភិវឌ្ឍនានានៅប្រទេសចិនផងដែរ ។
គួរបញ្ជាក់ថា សាលារៀនវ៉េស្ទឡាញន៍ក៏ជាសមាជិក ISSE (International School to School Experience) ដែលផ្តោតលើការផ្លាស់ប្តូរការរស់នៅរវាងសិស្សនៃប្រទេសមួយទៅប្រទេសមួយទៀតក្នុងរយៈពេលខ្លី ក្នុងគោលបំណងជំរុញសិស្សឈ្វេងយល់ពីវប្បធម៌ប្រពៃណី ការអប់រំ និងបទពិសោធន៍រស់នៅប្រទេសផ្សេង ។ កន្លងមក សាលារៀនបានរៀបចំកម្មវិធីជាមួយសាលារៀននៅសហរដ្ឋអាមេរិក និងប្រទេសអូស្ត្រាលី ៕ អត្ថបទសហការ
ចែករំលែកព័តមាននេះ