រាជធានីភ្នំពេញ ៖ ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី ២៦ ខែកញ្ញា ឆ្នាំ ២០២៤ នេះបានអំពាវនាវ និងលើកទឹកចិត្តឱ្យបងប្អូនកម្មករនិយោជិតទាំងអស់ដែលកំពុងធ្វើការនៅរាជធានីភ្នំពេញសូមប្រើប្រាស់រថយន្តក្រុងឥតគិតថ្លៃរបស់រដ្ឋ ដើម្បីធ្វើដំណើរទៅលេងស្រុកកំណើតអំឡុងពេលពិធីបុណ្យ ភ្ជុំបិណ្ឌ នាសប្តាហ៍ក្រោយ ។
ឯកឧត្តមរដ្ឋលេខាធិការមានប្រសាសន៍បន្ថែមថា ការប្រើប្រាស់រថយន្តក្រុងដោយឥតគិតថ្លៃរបស់រដ្ឋ នេះគឺដើម្បីជួយកាត់បន្ថយថ្លៃចំណាយរបស់បងប្អូនកម្មករនិយោជិតចំពោះថ្លៃធ្វើដំណើរដោយរថយន្តតាក់ស៊ី ។ ជាងនេះទៅទៀតការធ្វើដំណើរតាមរថយន្តក្រុង ដោយឥតគិតថ្លៃដែលរៀបចំដោយរាជរដ្ឋាភិបាលនេះគឺមានភាពងាយស្រួលធ្វើដំណើរ មិនចង្អៀតណែន ហើយមានសុវត្ថិភាពខ្ពស់ ។
ឯកឧត្តមរដ្ឋលេខាធិការបន្ថែមថា ការរៀបចំឱ្យមានរថយន្តក្រុងឥតគិតថ្លៃសម្រាប់បងប្អូនប្រជាពលរដ្ឋធ្វើដំណើរទៅលេងស្រុកកំណើត អំឡុងពេលភ្ជុំបិណ្ឌនេះធ្វើឡើងរៀងរាល់ឆ្នាំ និងបង្ហាញពីការយកចិត្តទុកដាក់បន្ថែមទៀតរបស់ថ្នាក់ដឹកនាំនៃរាជរដ្ឋាភិបាលកម្ពុជាដល់បងប្អូនប្រជាពលរដ្ឋ ក៏ដូចជាកម្មករនិយោជិតទាំងអស់ ក្នុងការជួយកាត់បន្ថយចំណាយលើថ្លៃរថយន្តធ្វើតំណើរទៅលេងស្រុកកំណើតនាឱកាសពិធីបុណ្យភ្ជុំបិណ្ឌ ។
ឯកឧត្តមរដ្ឋលេខាធិការក៏បានអំពាវនាវដល់កម្មករ-និយោជិត ដែលត្រូវធ្វើដំណើរទៅស្រុកកំណើត ចូលរួមក្នុងពិធីបុណ្យភ្ជុំបិណ្ឌ ខាងមុខត្រូវយកចិត្តទុកដាក់ថែទាំសុខភាពឱ្យបានល្អ ពិសេសបើកបរ ត្រូវគោរពច្បាប់ចរាចរណ៍ ដើម្បីធានាបានសុខសុវត្ថិភាពទាំងទៅ និងត្រឡប់មកធ្វើការងារវិញ ។
គួរបញ្ជាក់ផងដែរថា ក្នុងឱកាសពិធីបុណ្យ ភ្ជុំបិណ្ឌ ខាងមុខនេះក្រសួងការងារ និងបណ្ដុះបណ្ដាលវិជ្ជាជីវៈ ប្រកាសឱ្យកម្មករ- និយោជិតទាំងអស់ទទួបានការឈប់សម្រាកដោយមានប្រាក់ឈ្នួល រយៈពេល ៣ថ្ងៃ គឺចាប់ពី ថ្ងៃទី ១ ដល់ ថ្ងៃទី ៣ ខែតុលា ឆ្នាំ ២០២៤ ។ ក្នុងនោះរាជរដ្ឋាភិបាលកម្ពុជាបានត្រៀមរថយន្តក្រុងប្រមាណជាង ៤០០ គ្រឿងសម្រាប់ដឹកជញ្ជូនកម្មករនិយោជិតដោយឥតគិតថ្លៃ ពីរាជធានីភ្នំពេញ ទៅតាមបណ្តាខេត្តនានា និងពីតាមបណ្តាខេត្តនានាត្រឡប់មករាជធានីភ្នំពេញវិញ៕ អត្ថបទសហការ
ចែករំលែកព័តមាននេះ