រាជធានីភ្នំពេញ៖ កាលពីថ្ងៃទី២៣ ខែកញ្ញា ឆ្នាំ២០២៤ កន្លងមកនេះ និយ័តករមូលបត្រកម្ពុជា (ន.ម.ក.) និងសាលារៀនវ៉េស្ទឡាញន៍ បានសហការរៀបចំសិក្ខាសាលាផ្សព្វផ្សាយ ស្ដីពី…
រាជធានីភ្នំពេញ៖ កាលពីថ្ងៃទី២៣ ខែកញ្ញា ឆ្នាំ២០២៤ កន្លងមកនេះ និយ័តករមូលបត្រកម្ពុជា (ន.ម.ក.) និងសាលារៀនវ៉េស្ទឡាញន៍ បានសហការរៀបចំសិក្ខាសាលាផ្សព្វផ្សាយ ស្ដីពី “ការលើកកម្ពស់ការយល់ដឹងអក្ខរកម្មហិរញ្ញវត្ថុ នៃវិស័យមូលបត្រ” ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុក ជាអគ្គនាយក នៃ ន.ម.ក. និងឧកញ៉ា ប៉ិច បូឡែន អគ្គនាយកបណ្តាញគ្រឹះអប់រំ វេសឡាញ អេឌ្យូខេសិន គ្រុប នៅសាលារៀនវ៉េស្ទឡាញន៍ សាខាចំការដូង ។
សិក្ខាសាលានេះ ត្រូវបានរៀបចំឡើង ដើម្បីបញ្ជ្រាបនូវចំណេះដឹង ពាក់ព័ន្ធនឹងអក្ខរកម្មហិរញ្ញវត្ថុសម្រាប់ប្អូនៗ សិស្សានុសិស្ស នៃសាលារៀន វ៉េស្ទឡាញន៍ ដែលជាទំពាំងស្នងឫស្សី ឱ្យចេះរៀបចំផែនការហិរញ្ញវត្ថុផ្ទាល់ខ្លួន សម្រាប់អនាគត និងការគ្រប់គ្រងហិរញ្ញវត្ថុរបស់ខ្លួនឱ្យបានជោគជ័យ និងចាប់ផ្តើមបណ្តុះទម្លាប់សន្សំ កត់ត្រា គ្រប់គ្រងការចំណាយឱ្យបានច្បាស់លាស់ និងវិនិយោគ ក្នុងវ័យសិក្សា ជាពិសេសផ្តល់សញ្ញាណ ដែលជាមូលដ្ឋានគ្រឹះ នៃវិស័យមូលបត្រ និងអត្ថប្រយោជន៍ក្នុងការចូលរួមវិនិយោគ ក្នុងវិស័យនេះ ។
ថ្លែងក្នុងកម្មវិធីនេះ ឯកឧត្តមប្រតិភូ បានគូសបញ្ជាក់ថា៖ «ខ្ញុំសូមលើកទឹកចិត្តឱ្យប្អូនៗសិស្សានុសិស្សទាំងអស់ ចាប់ផ្តើមបណ្តុះគំនិត និងបង្កើតទម្លាប់សន្សំ ក៏ដូចជារៀនវិនិយោគពីវ័យក្មេងទៅ ដើម្បីអភិវឌ្ឍចំណេះដឹងផ្នែកហិរញវត្ថុរបស់ខ្លួនឱ្យបានល្អ ជាពិសេសចូលរួមវិនិយោគក្នុងវិស័យមូលបត្រ ដែលជាចំណែកមួយនៃការចូលរួមអភិវឌ្ឍវិស័យមូលបត្រ និងការលើកកម្ពស់សេដ្ឋកិច្ចកម្ពុជាឱ្យកាន់តែរីកចម្រើន ឡើងបន្ថែមទៀត» ។
ជាមួយគ្នានេះ ឧកញ៉ា ប៉ិច បូឡែន បានលើកឡើងថា៖ «ក្រៅពីអនុវត្តតាមកម្មវិធីសិក្សាគោលរបស់ក្រសួងអប់រំ យុវជន និងកីឡា បណ្តាញសាលារៀនរបស់យើង បានបន្ថែមកម្មវិធីគាំទ្រ និងកម្មវិធីសិក្សាអមដែលនាំមកពីក្រៅប្រទេស ដែលផ្តោតសំខាន់លើការអភិវឌ្ឍបុគ្គលលក្ខណៈ ការប្រាស្រ័យទាក់ទង បំណិន ជីវិត វប្បធម៌ចម្រុះ ដើម្បីប្រាកដប្រជាថាសិស្ស អាចសម្របសម្រួលខ្លួនរស់នៅប្រកបអាជីវកម្ម និងបំពេញការងារក្នុងមជ្ឈដ្ឋានប្រទេសកម្ពុជា និងអន្តរជាតិ» ។
លោកឧញ៉ា មានប្រសាសន៍បន្ថែមទៀត៖ «ក្នុងកម្មវិធីសិក្សាអមនោះ ក៏មានកម្មវិធីបណ្តុះបណ្តាលចំណេះដឹងផ្នែកហិរញ្ញវត្ថុ សេដ្ឋកិច្ច និងសហគ្រិន សម្រាប់សិស្សចាប់ពីថ្នាក់ទី១ ដល់ទី១២ ដែលជួយជំរុញសិស្សចេះសន្សំប្រាក់ ទប់ទល់សម្ពាធសម្ភារនិយម ចេះគិតពិចារណាលើវត្ថុណាគួទិញនិងវត្ថុណាមិនគួរទិញ រៀនដេញថ្លៃសម្ភារ រៀនឈ្វេងយល់ពីប្រព័ន្ធធនាគារ និងការនិយោគក្នុងទីផ្សារភាគហ៊ុន ការចុះទស្សនកិច្ចសិក្សា តាមបណ្តាសហគ្រាសអាជីវកម្ម ព្រមទាំងរៀនពីរបៀបអនុវត្តគម្រោងអាជីវកម្មផងដែរ» ។
សិក្ខាសាលាខាងលើនេះ ត្រូវបានរៀបចំឡើង ក្នុងទម្រង់ជាលក្ខណៈកូនកាត់ ដោយមានអ្នកចូលរួមសរុបចំនួន ២៥០០ នាក់ដែលជាលោកគ្រូ-អ្នកគ្រូ និងសិស្សានុសិស្សនៃសាលារៀន វ៉េស្ទឡាញន៍ និងមានការចូលរួមធ្វើបទបង្ហាញ ពីវាគ្មិនមកពី ន.ម.ក., បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប និងក្រុមហ៊ុនមូលបត្រ អេស៊ីលីដា ម.ក ផងដែរ ៕ អត្ថបទសហការ
ចែករំលែកព័តមាននេះ