រាជធានីភ្នំពេញ ៖ ថ្លែងក្នុងពិធីប្រគល់វិញ្ញាបនបត្របញ្ចប់ការសិក្សា និងរង្វាន់ជ័យលាភីក្លឹបសិស្សពូកែនៃសាលារៀនវ៉េស្ទឡាញ សាលារៀនណត្សឡាញន៍ និងសាលាភាសាលីដឺលែនកាលពីចុងសប្តាហ៍នេះ ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ…
រាជធានីភ្នំពេញ ៖ ថ្លែងក្នុងពិធីប្រគល់វិញ្ញាបនបត្របញ្ចប់ការសិក្សា និងរង្វាន់ជ័យលាភីក្លឹបសិស្សពូកែនៃសាលារៀនវ៉េស្ទឡាញ សាលារៀនណត្សឡាញន៍ និងសាលាភាសាលីដឺលែនកាលពីចុងសប្តាហ៍នេះ ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប មានប្រសាសន៍ថា ដើម្បីជោគជ័យក្នុងការសិក្សា គ្រួសារ អាជីពការងារ និងអាជីវកម្ម ក្មួយៗជាយុវជនត្រូវមានចំណេះ ជំនាញ ចំណង់ អត្តចរិត និងចំណងទាក់ទងល្អ ។
លោកបានឧកញ៉ាពន្យល់ថា យុវជនត្រូវមានចំណេះដឹងច្បាស់ និងជំនាញពិតប្រាកដ ព្រមជាមួយនេះចំណង់គឺសំដៅលើគោលដៅច្បាស់នឹងធ្វើឱ្យយុវជនមើលឃើញផ្លូវដែលខ្លួនត្រូវដើរ ហើយទាំង៣ចំណុចនេះ ជាផ្នែកកំពុងឈានទៅរកភាពជោគជ័យ ។
ជាមួយគ្នានេះ អត្តចរិត គឺជារឿងមួយដែលយុវជនត្រូវគិតគូរ, លោកឧកញ៉ាបន្តថា នៅក្នុងប្រព័ន្ធអប់រំ យើងតែងតែអប់រំយុវជនឱ្យមានចរិតសុភាពរាបសា រម្យទម ចេះគោរពចាស់ទុំ ដូច្នេះនៅក្នុងពិភពការងារ សូមយុវជនយើងព្យាយាមអនុវត្តប្រកបដោយបញ្ញា ។
ដោយឡែកចំណងទាក់ទង គឺជាការកសាងមិត្តភាពដែលជាបណ្តាញធនធានសង្គមដ៏សំខាន ព្រោះក្នុងការធ្វើអាជីវកម្ម ក៏ដូចជាក្នុងពិភពការងារ គឺត្រូវការគេគោរពស្រឡាញ់ ដូច្នេះទំនាក់ទំនងល្អ គឺនាំឱ្យឈ្នះ ឈ្នះ ទាំងអស់គ្នា យើងក៏បានផល អ្នកដែលធ្វើការជាមួយក៏បានផល ។
ទន្ទឹមនឹងនោះ លោកឧកញ៉ាបានបញ្ជាក់ថា ជាទិសដៅសេដ្ឋកិច្ចរបស់ប្រទេសកម្ពុជា គឺការជំរុញទៅលើផ្នែក កសិឧស្សាហកម្ម ផ្នែកឧស្សាហកម្មកែច្នៃ ក៏ដូចជាទេសចរណ៍ជាដើម ដូច្នេះសម្រាប់ក្មួយៗទោះជាប់សញ្ញាបត្រ បាក់ឌុប ឬក៏ថ្លោះធ្លោយមិនជាប់ក៏ដោយ សូមគិតទៅលើសញ្ញាបត្របណ្តុះបណ្តាលបច្ចេកទេស និងវិជ្ជាជីវៈ ហើយកុំគិតថា ការរៀនជំនាញបច្ចេកទេស និងវិជ្ជាជីវៈ គឺសម្រាប់តែអ្នកដែលរៀនធ្លាក់ ឬរៀនសូត្រមិនបាន ។ លោកឧកញ៉ាបញ្ជាក់ថា បច្ចុប្បន្នកម្ពុជាកំពុងតែត្រូវការអ្នកដែលមានជំនាញបច្ចេកទេស ដូចជាអ្នកបច្ចេកទេសអគ្គិសនី អ្នកបច្ចេកទេសទឹក ភ្លើង អគារ សំណង់ អ្នកបច្ចេកទេសផ្នែកឧស្សាហកម្ម ក៏ដូចជាការកែច្នៃអាហារជាដើម ខណៈប្រទេសកម្ពុជា កំពុងឈានទៅរកប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០ ។
សូមជម្រាបថា សិស្សដែលទទួលវិញ្ញាបនបត្របញ្ចប់ការសិក្សា និងរង្វាន់ជ័យលាភីនាពេលនោះរួមមាន៖ សិស្សកម្មវិធីចំណេះទូទៅខ្មែរ ថ្នាក់ទី៩ ចំនួន ៤០២ នាក់ សិស្សកម្មវិធីចំណេះទូទៅខ្មែរថ្នាក់ទី១២ ចំនួន៣៥៥នាក់ សិស្សកម្មវិធីភាសាអង់គ្លេសកម្រិត១២ ចំនួន៨៧នាក់ សិស្សកម្មវិធីភាសាចិនកម្រិត១២ ចំនួន១៤នាក់ សិស្សសាលាភាសាលីដឺលែន កម្មវិធីភាសាអង់គ្លេសកម្រិត១២ ចំនួន៧៨នាក់ និងសិស្សជ័យលាភីក្លឹបសិស្សពូកែចំនួន ១៨៥ នាក់ ៕ អត្ថបទសហការ
ចែករំលែកព័តមាននេះ