រាជធានីភ្នំពេញ ៖ កុមារដែលបានចាប់កំណើតចាប់តាំងពីឆ្នាំ ២០១២ រហូតមកដល់បច្ចុប្បន្ន ត្រូវបានចាត់ទុកថា គឺជាជំពូកមនុស្សស្ថិតនៅក្នុងជំនាន់អាល់ហ្វា ឬភាសាអង់គ្លេសហៅថា Generation Alpha…
រាជធានីភ្នំពេញ ៖ កុមារដែលបានចាប់កំណើតចាប់តាំងពីឆ្នាំ ២០១២ រហូតមកដល់បច្ចុប្បន្ន ត្រូវបានចាត់ទុកថា គឺជាជំពូកមនុស្សស្ថិតនៅក្នុងជំនាន់អាល់ហ្វា ឬភាសាអង់គ្លេសហៅថា Generation Alpha (Gen Alpha) ។ ពួកគេបានកើតមកជាមួយបច្ចេកវិទ្យា ហើយមានភាពចម្រុះផ្សំទាំងអស់នៃជំនាន់មនុស្សមុនៗ ដូច្នេះក្នុងនាមជាអ្នកអប់រំ ក៏ដូចជាឪពុកម្តាយ ត្រូវចេះមើលឥរិយាបទ ហើយបង្កើតបរិកាសរៀនទៅដល់ពួកគេតាមលំនាំ នៃអត្តចរិតរបស់កូន ។
ថ្លែងក្នុងសិក្ខាសាលាស្តីពី “វិធីសាស្ត្រអប់រំកុមារតូចដល់បឋមសិក្សា” កាលពីចុងសប្តាហ៍កន្លងមកនេះ នៅសាលារៀនវ៉េស្ទឡាញន៍ សាខាក្រុងតាខ្មៅ ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានលើកឡើងថា ជាទូទៅចន្លោះ ១០ ទៅ ១៥ ឆ្នាំម្តង គឺតែងតែមានការប្រែប្រួលនៃបរិបទសង្គម ដែលវាធ្វើឱ្យមានការប្រែប្រួលដល់កត្តាចិត្តសាស្ត្ររបស់មនុស្ស ដូច្នេះក្នុងនាមជាគ្រូបង្រៀន ក៏ដូចជាឪពុកម្តាយ អ្នកអាណាព្យាបាលត្រូវតាមឱ្យទាន់នូវបម្រែបម្រួល នៃចិត្តសាស្ត្ររបស់មនុស្សគ្រប់ជំនាន់ទាំងអស់ ។ តាមអ្នកជំនាញអប់រំរូបនេះ កុមារដែលមានអាយុ ៣ ឆ្នាំនៅពេលនេះ មានអត្តចរិត និងការគិត មិនដូចកុមារអាយុ ៣ឆ្នាំ កាលពី ១០ ឬ ២០ឆ្នាំមុននោះទេ ។ លោកបន្តទៀតថា ប្រសិនបើយើងធ្លាប់ជាកូនក្មេង ហើយគិតថា កូនរបស់យើងដូចយើងកាលពីនៅកុមារនោះក៏មិនត្រូវដែរ ព្រោះតែបរិបទសង្គមបច្ចុប្បន្ន គឺស្ថិតក្នុងបរិបទឌីជីថល ដែលវាខុសគ្នាកាលពី ១០ ទៅ ២០ឆ្នាំមុន ។
បើតាមអ្នកជំនាញអប់រំរូបនេះបានសង្កត់ធ្ងន់ថា គ្រូបង្រៀន ក៏ដូចជាឪពុកម្តាយ អ្នកអាណាព្យាបាល គួរឈ្វេងយល់អំពីជំនាន់នៃមនុស្ស ឬ Generation ដើម្បីងាយស្រួលក្នុងការសម្របខ្លួនជាមួយសិស្ស ក៏ដូចជាកូនៗ ។ លោកឧកញ៉ាបានលើកពីលក្ខណៈខ្លះៗរបស់កុមារដែលស្ថិតនៅក្នុង ជំនាន់អាល់ហ្វា ដោយថា កុមារនៅក្នុងជំនាន់នេះ គឺមានលំនាំស្រដៀងទៅនឹង មនុស្សជំនាន់ Z ឬ GenZ ដោយពួកគេមានគំនិតច្នៃប្រឌិត ចង់ធ្វើកិច្ចការងារច្រើន ហ៊ានប្រថុយប្រថានច្រើន ចង់សាកល្បងអ្វីដែលថ្មី មានទិន្នន័យច្រើន មានអារម្មណ៍ប្រែប្រួល ដែលទាមទារឱ្យអ្នកអប់រំ ឪពុកម្តាយ គ្រូបង្រៀន ត្រូវតាមមើលឥរិយាបទរបស់កូននីមួយៗ ។
ក្នុងនាមជាអ្នកជំនាញអប់រំ លោកឧកញ៉ា ប៉ិច បូឡែន ក៏បានផ្តល់ជាដំបូន្មានដល់ឪពុកម្តាយទាំងឡាយដែលកំពុងចិញ្ចឹមកូនក្នុងជំនាន់អាល់ហ្វា ត្រូវបង្កលក្ខណៈឱ្យកូនបញ្ចេញទេពកោសល្យ ច្រើនជាងប្រាប់គាត់ឱ្យធ្វើអ្វីមួយ ត្រូវយល់ពីអារម្មណ៍គាត់ ចំណង់ចំណូលចិត្តគាត់ ហើយត្រូវបង្កើតបរិយាកាសរៀន ទៅតាមលំនាំនៃអត្តចរិតរបស់ពួកគេ ។ «ដោយសារទិដ្ឋភាពនៃការរៀនសូត្រឥឡូវនេះសម្បូរបែបជាងមុន អឭីចឹងគាត់ចង់សាកល្បង គាត់ចង់បង្កើតថ្មី គាត់មានគំនិតច្នៃប្រឌិតច្រើន អ៉ីចឹងបង្កលក្ខណៈឱ្យគាត់ទៅ គាត់នឹងបង្កើតអ្វីដែលថ្មីៗ អ្វីដែលគាត់ចង់សាកល្បងធ្វើ…» ។
បើតាមការស្រាវជ្រាវរបស់ Pew Research Center ដែលជាស្ថាប័នស្រាវជ្រាវដ៏ល្បីល្បាញមួយរបស់សហរដ្ឋអាមេរិក ជំនាន់របស់មនុស្សត្រូវបានបែងចែកជា ៥ គឺ Baby Boomers (កើតក្នុងឆ្នាំ 1946-1964), Generation X (កើតក្នុងឆ្នាំ 1965-1980), Millennials (Gen Y) (កើតក្នុងឆ្នាំ 1981-1996), Generation Z (Gen Z) (កើតក្នុងឆ្នាំ 1997-2012) និង Generation Alpha (កើតក្រោយឆ្នាំ 2013) ៕ អត្ថបទសហការ
ចែករំលែកព័តមាននេះ