ខេត្តកំពង់ឆ្នាំង ៖ អគារសាលារៀនមូស្លីមតូចចំនួន ២ ខ្នង ដែលមានសភាពទ្រុឌទ្រោមត្រូវបានជួសជុល និងកែលម្អថ្នាក់រៀនឡើងវិញ ក្រោមជំនួយរបស់ ធនាគារ ABA…
ខេត្តកំពង់ឆ្នាំង ៖ អគារសាលារៀនមូស្លីមតូចចំនួន ២ ខ្នង ដែលមានសភាពទ្រុឌទ្រោមត្រូវបានជួសជុល និងកែលម្អថ្នាក់រៀនឡើងវិញ ក្រោមជំនួយរបស់ ធនាគារ ABA ត្រូវបានសម្ពោធដាក់ឱ្យប្រើប្រាស់កាលពីថ្ងៃទី ១២ ខែសីហា ឆ្នាំ ២០២៤ ដែលមានអ្នកចូលរួមប្រមាណ ២០០ នាក់ រួមមានថ្នាក់ដឹកនាំ និងបុគ្គលិកធនាគារ ABA ក្រុមការងារសមាគម CATA នាយកសាលា លោកគ្រូ អ្នកគ្រូ និងសិស្សានុសិស្ស ក្រោមវត្តមាន ឯកឧត្តម សាន់ យូ អភិបាលរងនៃគណៈអភិបាលខេត្តកំពង់ឆ្នាំង ។
ស្ថិតនៅភូមិ ៤ សង្កាត់ខ្សាម ក្រុងកំពង់ឆ្នាំង សាលារៀនមូស្លីមតូចចំនួន ២ ខ្នង មានសភាពទ្រុឌទ្រោម ដែលមានគ្រូបង្រៀនប្រចាំចំនួន ៤ នាក់ សម្រាប់ជាក្តីសង្ឃឹមដល់សិស្សានុសិស្សប្រមាណជា ១៤០ នាក់ ដើម្បីទទួលបានការអប់រំពីសាលានេះ ។ សាលារៀន អាល់មូវ៉ាត់ទះ វ៉ារ៉ោះម៉ះ និងសាលារៀន ហ្វាហ៊ីម ហាគីមី ដំបូងឡើយមានតែថ្នាក់រៀនមួយប៉ុណ្ណោះ សម្រាប់កុមារៗនៅតំបន់នោះ តែបច្ចុប្បន្នសាលារៀនមាន ២ អគារ ហើយស្ថានភាពប្រសើរជាងមុន ។
សូមរំលឹកផងដែរថា នារដូវវស្សាទឹកភ្លៀងតែងតែហូរចូលតាមដំបូលឈើធ្លុះរបស់អគារសិក្សា បណ្តាលឱ្យលិចថ្នាក់រៀន និងខកម៉ោងសិក្សារបស់សិស្ស ។ សិស្សត្រូវបង្ខំចិត្តចេញពីថ្នាក់មុនម៉ោង ដោយសារតែប៉ះពាល់ដល់ តុ ឥដ្ឋការ៉ូ និងសម្ភារសិក្សាផ្សេងៗ ។ ដំបូលរបស់សាលា រៀន អាល់មូវ៉ាត់ទះ វ៉ារ៉ោះម៉ះ សឹងតែមិនអាចទប់ទឹកភ្លៀងជាប់ រីឯសាលារៀន ហ្វាហ៊ីម ហាគីមី មានការបាក់បែកឥដ្ឋការ៉ូ ដែលអាចបង្កគ្រោះថ្នាក់ដល់សិស្ស ។
ដោយបានមើលឃើញផលវិបាកទាំងនេះ តាមការស្នើរសុំរបស់សមាគមអាម៉ាណះតាកាហ្វុលកម្ពុជា (CATA) ធនាគារ ABA បានបរិច្ចាកទឹកប្រាក់ចំនួន ៣៣ 000 000 រៀល ទៅលើការជួសជុលអគារ ២ ខ្នង និងកែលម្អថ្នាក់រៀន ។ ជាមួយការផ្តួចផ្តើមនេះ ធនាគារ ABA មានបំណងលើកកម្ពស់បរិយាកាសសិក្សា និងបង្កើនគុណភាពអប់រំ ដែលនឹងជំរុញដល់អនាគតភ្លីស្វាងរបស់យុវជន ។ ក្នុងរយៈពេល ២ ខែ អគារទាំង ២ ខ្នង ទទួលបានការកែលម្អគួរជាទីគាប់ចិត្ត ។ ដំបូលឈើ និងពិតានចាស់ៗ ត្រូវបានរុះចេញ និងដំឡើងជាថ្មីវិញ ឥដ្ឋការ៉ូក៏បានក្រាលថ្មី ដើម្បីធានាសុវត្ថិភាពសម្រាប់សិស្សានុសិស្ស ។ បង្អួចថ្នាក់រៀនក៏បានដំឡើង ដើម្បីឱ្យខ្យល់ និងពន្លឺថ្ងៃធម្មជាតិចូលបានគ្រប់គ្រាន់ ។
ជញ្ជាំងខាងក្នុង និងក្រៅអគារ ត្រូវបានលាបពណ៌ថ្មីបង្កើតឱ្យមានបរិយាកាសសិក្សាកាន់តែរស់រវើកសម្រាប់លោកគ្រូ អ្នកគ្រូ និងសិស្សានុសិស្សគ្រប់រូប ។ សមិទ្ធផលពីការជួសជុល និងកែលម្អអគារទាំង ២ ខ្នង ដែលមានថ្នាក់រៀនសរុបចំនួន ៤ បន្ទប់នេះ បានបង្ហាញឱ្យឃើញតាមរយៈក្តីត្រេកអររបស់សិស្ស ដែលបានរៀនក្នុងថ្នាក់មានផាសុកភាព និងមានសុវត្ថិភាពជាងមុន ។
លោក សេន សាម៉ាន នាយកប្រតិបត្តិនៃសមាគម CATA បានឱ្យដឹងថា «យើងខ្ញុំនៅសមាគម CATA ពិតជាមានមោទនភាពណាស់ដែលបានសហការជាមួយ ធនាគារ ABA លើគម្រោងដែលជួយដល់សហគមនេះ ។ ការជួសជុល និងកែលម្អនេះនឹងបង្កើតផ្លូវសម្រាប់ក្មេងៗឆ្ពោះទៅរកបរិយាកាសអប់រំល្អប្រសើរជាងមុន» ។
នៅក្នុងពិធីសម្ពោធអគារសាលារៀនេះលោកស្រី លី វិទ្យា នាយិការធនធានមនុស្សនៃធនាគារ ABA មានប្រសាសន៍ថា «យើងខ្ញុំជឿជាក់យ៉ាងមុតមាំថា ការអប់រំ គឺជាមូលដ្ឋានគ្រឹះនៃការអភិវឌ្ឍន៍ប្រកបដោយនិរន្តភាព ។ ការអប់រំ គឺជាកូនសោជីវិតដ៏សំខាន់ ដើម្បីបើកទ្វារឱ្យ យុវជនទទួលបានអនាគតដ៏ត្រចះត្រចង់ និងជំរុញឱ្យពួកគេក្លាយជាថ្នាក់ដឹកនាំនាថ្ងៃអនាគត ។ ដូចគ្នានេះដែរប្អូនៗដែលដែលទទួលបានសាលារៀននាថ្ងៃនេះ ABA សង្ឃឹមថា ប្អូនៗនឹងបានប្រើប្រាស់អគារទាំងពីរនេះជាការួមចំណែកតូចមួយ ដើម្បីជួយធនធានមនុស្សរបស់កម្ពុជារីកចម្រើនទៅថ្ងៃអនាគត ។
លោកស្រីបន្តថា ជាការប្តេជ្ញារបស់ក្រុមការងារ ធនាគារ ABA ក្នុងការផ្តល់ភាគទានត្រឡប់ទៅកាន់សហគមន៍វិញ គឺជាតម្លៃស្នូលមួយរបស់ធនាគារដែលតែងតែយកចិត្តទុកដាក់តាំងពីដើមរៀងមក ដោយខិតខំធ្វើយ៉ាងណាក្លាយជាក្រុមហ៊ុនដែលទទួលខុសត្រូវសង្គមខ្ពស់ ការចូលរួមចំណែកជាវិជ្ជមានជូនសហគមន៍ដែលយើងប្រតិបត្តិនៅក្នុងអាជីវកម្ម ។ លោកស្រី បញ្ជាក់ថា ការបរិច្ចាគនេះសរុបជាទឹកប្រាក់សម្រាប់អគារសាលារៀនទាំងពីរនេះមានចំនួន ៣៣ 000 000 រៀល ទៅលើការជួសជុល និងសាងសង់អគារ ២ ខ្នង ទាំងនេះជាការឆ្លុះបញ្ចាំង ពីការប្តេជ្ញាចិត្តរបស់យើងក្នុងការគាំទ្រវិស័យអប់រំ ។
ឯកឧត្តម សាន់ យូ អភិបាលរងនៃគណៈអភិបាលខេត្តកំពង់ឆ្នាំង បានកោតសរសើរចំពោះ ធនាគារ ABA ដែលបានជួយចំគោលដៅ ដែលធ្វើឱ្យធនធានមនុស្សរីកចម្រើន ជាគោលដៅដែលយើងចង់បានទៅថ្ងៃអនាគត ។
កុមារា សាគីរីន សិស្សនៃសាលា អាល់មូវ៉ាត់ទះ វ៉ារ៉ោះម៉ះ បាននិយាយថា «កាលពីមុន ពេលមេឃភ្លៀង ថ្នាក់ពួកយើងត្រូវបានលេចទឹក ព្រោះដំបូលធ្លុះ និងធ្វើឱ្យសៀវភៅសើមអស់ ។ យើងត្រូវអង្គុយនៅជ្រុងមួយនៃថ្នាក់ ដើម្បីរៀនបន្ត ។ អរគុណដល់ ធនាគារ ABA ក្រោយពីការជួសជុល យើងអាចអង្គុយរៀននៅតុរៀងៗខ្លួនដោយស្រួល និងរៀនចេះជាងមុន» ។
សូមបញ្ជាក់ផងដែរថា សម្រាប់ថ្ងៃអនាគត ធនាគារ ABA នៅតែបន្តប្រឹងប្រែងបង្កើត ឬសហការទៅលើការងារទំនួលខុសត្រូវសង្គមផ្សេងៗ ដើម្បីលើកកម្ពស់អនាគតរបស់យុវជនខ្មែរគ្រប់រូប និងប្រទេសជាតិទាំងមូល ៕ អត្ថបទសហការ
ចែករំលែកព័តមាននេះ