រាជធានីភ្នំពេញ៖ «ចំពោះខ្ញុំ ការរៀបចំផែនការរៀន គឺខ្ញុំព្យាយាមរៀនផ្ដោតលើមុខវិជ្ជា ដែលត្រូវប្រឡង និងរៀនគួរបំប៉នបន្ថែម ។ លើសពីនេះ មានកាលវិភាគត្រឹមត្រូវ ដូចជាពេលព្រឹកត្រូវរៀនអ្វី?…
រាជធានីភ្នំពេញ៖ «ចំពោះខ្ញុំ ការរៀបចំផែនការរៀន គឺខ្ញុំព្យាយាមរៀនផ្ដោតលើមុខវិជ្ជា ដែលត្រូវប្រឡង និងរៀនគួរបំប៉នបន្ថែម ។ លើសពីនេះ មានកាលវិភាគត្រឹមត្រូវ ដូចជាពេលព្រឹកត្រូវរៀនអ្វី? ពេលថ្ងៃត្រូវរៀនអ្វី? ទើបធ្វើឱ្យខ្ញុំទទួលបានលទ្ធផលល្អ ក្នុងការសិក្សា» ។ នេះជាការលើកឡើងរបស់យុវសិស្ស សៀន សុវណ្ណ ជាសិស្សសាលាវ៉េស្ទឡាញន៍ សាខាច្បារអំពៅ ដែលទើបប្រឡងជាប់សញ្ញាបត្រមធ្យមសិក្សាទុតិយភូមិ និទ្ទេស A ឆ្នាំ២០២២ ក្នុងលំដាប់ពិន្ទុ ៩៩,៧៦៤ ។
យុវសិស្ស សៀន សុវណ្ណ ជាសិស្សនិទ្ទស A ឆ្នាំ២០២២ និយាយថា រូបគេមិនធ្លាប់គិតថា ប្រឡងជាប់និទ្ទេស A នោះទេ ប៉ុន្តែរូបគេ ខិតខំប្រឡងដោយធ្វើយ៉ាងណា បញ្ចេញឱ្យអស់ពីសមត្ថភាព ។
យុវសិស្ស សៀន សុវណ្ណ បានបន្តថា៖ «ខ្ញុំមិនធ្លាប់រំពឹងថា នឹងទទួលបាននិទ្ទេស A នោះទេ គិតថា បានត្រឹមនិទ្ទេស B ប៉ុន្តែនៅពេលទទួលបាននិទ្ទេស A ខ្ញុំមានអារម្មណ៍ថាសប្បាយរីករាយ ហើយមិនគួរឱ្យជឿថា ខ្លួនឯងអាចធ្វើបានពិតមែន» ។
ជាកូនទី២ ក្នុងគ្រួសារ និងមានបងប្អូនចំនួនបីនាក់ យុវសិស្ស សៀន សុវណ្ណ បន្ថែមថា ចំពោះមុខវិជ្ជា ដែលប្រឡងចំនួន ៧ មុខ រូបគេផ្ទាល់ពូកែលើមុខវិជ្ជារូបវិទ្យាជាងគេ ។ ហើយនៅពេលរៀនត្រៀមប្រឡងបាក់ឌុប រូបគេតែងតែទន្ទេញមេរៀនប្រវត្តិវិទ្យា និងជីវវិទ្យានៅពេលព្រឹក ។ ចំណែកនៅពេលថ្ងៃ គេទៅរៀនគួរបំប៉នបន្ថែមលើមុខវិជ្ជារូបវិទ្យា គណិតវិទ្យា គីមីវិទ្យាជាដើម ហើយនៅពេលយប់ ទើបអនុវត្តធ្វើលំហាត់ទាំងនោះឡើងវិញ ។
សិស្សនិទ្ទេស A ឆ្នាំ២០២២ រូបនេះ និយាយថា សម្រាប់ឧបសគ្គក្នុងការសិក្សា ដំបូងៗគឺរូបគេពិបាកបែងចែកពេលវេលារៀនមិនទាន់បានត្រឹមត្រូវ មិនសូវមានកម្លាំងក្នុងការរៀន ប៉ុន្តែបន្ទាប់ពីបានចាប់ផ្ដើមរៀបចំកាលវិភាគរៀនឱ្យបានត្រឹមត្រូវ ទើបមានពេលវេលាសម្រាកគ្រប់គ្រាន់ មានកម្លាំងរៀនគ្រប់គ្រាន់ និងទទួលបានលទ្ធផលសិក្សាល្អ ។
បន្ថែមពីនេះ យុវសិស្ស សៀន សុវណ្ណ បានថ្លែងអំណរគុណដល់សាលាដូចនេះថា៖ «ខ្ញុំសូមអរគុណដល់សាលារៀនវ៉េស្ទឡាញន៍ ដែលបានយកចិត្តទុកដាក់ ហើយលោកគ្រូ អ្នកគ្រូបានជួយជំរុញ និងមានការបង្រៀនបំប៉នបន្ថែមច្រើនដល់សិស្ស ដើម្បីទទួលបានលទ្ធផលល្អក្នុងការសិក្សា» ។
បន្ទាប់ពីប្រឡងបាក់ឌុបជាប់ និងទទួលបាននិទ្ទេស A យុវសិស្ស សៀន សុវណ្ណ សម្រេចបន្តការសិក្សាជំនាញវិទ្យាសាស្ត្រកុំព្យូទ័រ ដោយប្រឡងចូលរៀននៅសាកលវិទ្យាល័យខេមតិច ។ យុវសិស្សរូបនេះ បន្តថា សម្រាប់ការជ្រើសរើសជំនាញសិក្សា គ្មានការបង្ខិតបង្ខំពីឪពុកម្ដាយនោះឡើយ ព្រោះពួកគាត់សម្រេចទៅតាមអ្វី ដែលកូនៗស្រឡាញ់ ។
យុវសិស្ស សៀន សុវណ្ណ ក៏បានលើកទឹកចិត្ត ទៅដល់សិស្សានុសិស្សជំនាន់ក្រោយ ប្រសិនជាចង់បានលទ្ធផលសិក្សាល្អ ត្រូវខិតខំសិក្សាតាំងពីដើមឆ្នាំ កុំបណ្ដោយច្រើនពេក ត្រូវរៀនផង និងមានពេលសប្បាយផង ប៉ុន្តែបែងចែកពេលវេលាសប្បាយឱ្យបានត្រឹមត្រូវ ដោយកុំលេងច្រើនអំឡុងម៉ោងរៀន ។ ម្យ៉ាងវិញទៀត នៅពាក់កណ្ដាលឆ្នាំសិក្សា ពេលរៀនក្នុងថ្នាក់ខិតខំស្ដាប់គ្រូពន្យល់ ជាពិសេសចំណាយពេលរៀនបំប៉នបន្ថែម លើមុខវិជ្ជាដែលខ្សោយ ។ ចំណែក នៅចុងឆ្នាំប្រឡង សិស្សានុសិស្សអាចរៀនផ្ដោត តែលើមុខវិជ្ជាណា ដែលត្រូវប្រឡង នោះនឹងទទួលបានលទ្ធផលល្អក្នុងការសិក្សា ។
សូមជម្រាបថា សាលារៀនវ៉េស្ទឡាញន៍ និងសាលារៀនណត្សឡាញន៍ នឹងបើកវគ្គសិក្សាថ្មី ចូលរៀនថ្ងៃទី ១ ខែកុម្ភៈ ឆ្នាំ ២០២៣ ខាងមុខនេះ សម្រាប់កម្មវិធីមត្តេយ្យភាសាខ្មែរ និងអង់គ្លេស កម្មវិធី ភាសាអង់គ្លេសសម្រាប់សិស្សធំ និងកម្មវិធីភាសាចិន ។ សាលារៀនផ្តល់ជូនការបញ្ចុះតម្លៃ ១៥% លើតម្លៃសិក្សា សម្រាប់កាចុះឈ្មោះ ចូលរៀនជាលក្ខណៈគ្រួសារ ឬពីរកម្មវិធី និងផ្តល់ជូនការធានារ៉ាប់រងគ្រោះថ្នាក់ ការពារការ សិក្សាបុត្រធីតារហូតដល់ ៥ ឆ្នាំ ព្រមទាំងទទួលបានពិន្ទុសន្សំកាន់តែច្រើន ។ ការផ្តល់ជូនខាង លើនេះមានសុពលភាពត្រឹមថ្ងៃទី ១ ខែកុម្ភៈ ឆ្នាំ ២០២៣ ៕ អត្ថបទសហការ
ចែករំលែកព័តមាននេះ