ពានរង្វាន់សហគ្រិនវ័យក្មេងកម្ពុជា ២០២២ បើកទទួលពាក្យចាប់ពីថ្ងៃនេះតទៅហើយ !
រាជធានីភ្នំពេញ៖ នៅថ្ងៃទី៥ ខែសីហា ឆ្នាំ២០២២ សមាគមសហគ្រិនវ័យក្មេងកម្ពុជា( YEAC) និង សភាយុវពាណិជ្ជករអន្ដរជាតិកម្ពុជា (JCI Cambodia)…
រាជធានីភ្នំពេញ៖ នៅថ្ងៃទី៥ ខែសីហា ឆ្នាំ២០២២ សមាគមសហគ្រិនវ័យក្មេងកម្ពុជា( YEAC) និង សភាយុវពាណិជ្ជករអន្ដរជាតិកម្ពុជា (JCI Cambodia)…
រាជធានីភ្នំពេញ៖ នៅថ្ងៃទី៥ ខែសីហា ឆ្នាំ២០២២ សមាគមសហគ្រិនវ័យក្មេងកម្ពុជា( YEAC) និង សភាយុវពាណិជ្ជករអន្ដរជាតិកម្ពុជា (JCI Cambodia) បានរៀបចំកម្មវិធីបើកទទួលពាក្យប្រកួតប្រជែងលើ ពានរង្វាន់សហគ្រិនវ័យក្មេងកម្ពុជា (CYEA) ២០២២ ដែលការទទួលពាក្យនេះ ចាប់ពីថ្ងៃនេះរហូតដល់ថ្ងៃទី១៦ ខែកញ្ញា ឆ្នាំ២០២២ ។
កម្មវិធីនេះរៀបចំឡើងក្នុងគោលបំណង ដើម្បីជួយលើកកម្ពស់សហគ្រិនភាព នៅព្រះរាជាណាចក្រកម្ពុជា តាមរយៈការប្រមាញ់យកសហគ្រិនឆ្នើមជាគំរូដល់សហគ្រិនទាំងអស់ និងការលើកតម្កើននូវភាតរភាពរបស់សហគ្រិនឆ្នើម ទាំងនោះ ទៅកាន់ពិភពលោកតាមរយៈអ្នកដឹកនាំធុរៈកិច្ច ។
នាឱកាសថ្ងៃបើកទទួលពាក្យប្រកួតប្រជែងនេះផងដែរ លោកជំទាវ ស្រួ ណារីយ៉ា ប្រធានថ្នាក់ជាតិសភាយុវពាណិជ្ជករអន្តរជាតិកម្ពុជា បានឱ្យដឹងថា៖ «ក្នុងកម្មវិធីនេះដែរ ពួកយើងនឹងជួយលើកទឹកចិត្ត បង្ហាត់បង្រៀនបន្ថែមនៃសហគ្រិន ដើម្បីអោយការធ្វើអាជីកម្មរបស់ពួកគាត់កាន់តែមានស្តង់ដារខ្ពស់ជាងមុន ហើយក៏មានការទទួលស្គាល់ពីសំណាក់សាធារណជន ដែលសមត្ថភាពអ្នកចូលរួមនឹងត្រូវបង្ហាញ និងជាការលើកទឹកចិត្តក្នុងចូលរួមកម្មវិធីនេះ» ។
លោកជំទាវ ស្រួ ណារីយ៉ា បន្តថា ការទទួលពាក្យនេះ គឺខាងគម្រោងនៃកម្មវិធីលើកទឹកចិត្តអោយសហគ្រិនវ័យក្មេងចូលរួមអោយបានកាន់តែច្រើន ព្រោះប្រសិនបើអ្នកចូលរួមប្រកួតប្រជែងបានជាប់ នោះពួកគាត់មិនត្រឹមតែមានឱកាសបង្ហាញសមត្ថភាពក្នុងស្រុកនោះទេ ប៉ុន្តែពួកគាត់នឹងមានឱកាសដើម្បីបង្ហាញទៅលើឆាកអន្តរជាតិ ដែលនេះគឺជាការតំណាងអោយប្រទេសកម្ពុជាផងដែរ ។
តាមរយៈប្រធានគម្រោងកម្មវិធី ពានរង្វាន់សហគ្រិនវ័យក្មេងកម្ពុជា កញ្ញា ទុយ មុនីរ៉េត បានឱ្យដឹងថា៖ «កន្លងមកពុំសូវមានសហគ្រិនដាក់ពាក្យចូលរួមអោយបានច្រើនកុះករនោះទេ ក៏ព្រោះថាអាចមកពីកត្តាខ្លះៗផងដែរ ដូចជាសហគ្រិនខ្លះគាត់មិនទាន់មានលក្ខណៈគ្រប់គ្រាន់ក្នុងការដាក់ពាក្យប្រកួតប្រជែង ហេតុផលមួយទៀត ប្រហែលជាសហគ្រិនខ្លះគាត់មិនដឹងព័ត៌មាន ។ ហើយក៏អាចមានហេតុផលថា សហគ្រិនខ្លះគាត់មិនហ៊ានដាក់ពាក្យប្រកួត ព្រោះគាត់គិតថាខ្លាចធ្លាក់ចឹងគាត់នឹងខ្មាស់គេ ។ ទាំងនេះគឺជាហេតុផលដែលខ្ញុំគិតថា មិនសូវមានសហគ្រិនច្រើនចូលរួមក្នុងកម្មវិធី» ។
ជាមួយនឹងលក្ខខណ្ឌក្នុងការដាក់ពាក្យចូលរួមប្រកួតប្រជែង កញ្ញា ទុយ មុនីរ៉េត ក៏បានបន្តទៀតថា អ្នកដាក់ពាក្យចូលរួមតម្រូវអោយមានអាយុក្រោម ៤៥ ឆ្នាំ។ អាជីកម្មរបស់ពួកគាត់ត្រូវតែបានចុះបញ្ជីជាមួយក្រសួង និងមានបុគ្គលិកធ្វើការយ៉ាងហោចណាស់ក៏ ៥ នាក់ដែរ ។ មួយវិញទៀត អាជីវកម្មរបស់ពួកគាត់ត្រូវតែបង្កើតឡើងដោយជនជាតិខ្មែរ ប៉ុន្តែប្រសិនជាគាត់ដែលជនជាតិខ្មែរមិនបានបង្កើតអាជីវកម្មនោះទេ ក៏គាត់ត្រូវតែមានភាគហ៊ុននៅក្នុងក្រុមហ៊ុននោះ ៥១ ភាគរយ ដែរ ។
កញ្ញា ទុយ មុនីរ៉េត បានបន្ថែមថា ៖ «អត្ថប្រយោជន៍ជាច្រើនដែលអ្នកចូលរួមនឹងទទួលបាន ទី១ គឺពានរង្វាន់ ទី២ គឺគាត់នឹងទទួលបានវិញ្ញាបនបត្របញ្ជាក់ថាគាត់គឺជាសហគ្រិនឆ្នើម ។ និងទី ៣ គឺមេដាយសម្រាប់អ្នកឈ្នះ បន្ថែមពីពានទាំងនេះ អាជីវកម្មរបស់ពួកគាត់ត្រូវបានផ្សព្វផ្សាយ ទាំងនៅលើទូរទស្សន៍ និងសារព័ត៌មានជាច្រើន ក៏ដូចជាការផ្សព្វផ្សាយលើបណ្តាញសង្គមផងដែរ» ។
កញ្ញា មុនីរ៉េត ក៏បានលើកទឹកចិត្តដល់សហគ្រិនទាំងអស់ថា ការដាក់ពាក្យប្រកួតប្រជែងលើកម្មវិធីនេះ គឺមិនមែនជាការប្រកួតប្រជែងយកឈ្នះយកចាញ់នោះទេ ផ្ទុយទៅវិញបើទោះសហគ្រិនណាដែលមិនបានឈ្នះ និងទទួលពានក្តី ប៉ុន្តែគំរូអាជីកម្មរបស់ពួកគាត់ត្រូវបានផ្សព្វផ្សាយ ការនិយាយជាសាធារណៈរបស់ពួកគាត់នឹងមានការរីកចម្រើន ដោយសារតែកម្មវិធី ពានរង្វាន់សហគ្រិនវ័យក្មេងកម្ពុជា គឺមានការបណ្តុះបណ្តាលលើជំនាញទាំងអស់នឹង ។
សូមជម្រាបផងដែរថា កម្មវិធី ពានរង្វាន់សហគ្រិនវ័យក្មេងកម្ពុជា ត្រូវបានរៀបចំឡើងដំបូងនៅក្នុងឆ្នាំ ២០១៥ ក្រោមកិច្ចសហប្រតិបត្តិការរវាងសមាគមសហគ្រិនវ័យក្មេងកម្ពុជា (YEAC) និងសភាយុវពាណិជ្ជករអន្តរជាតិកម្ពុជា (JCI) ដែលមានការចូលរួមគាំទ្ររបស់ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ និងក្រសួងកិច្ចការនារី ។
សម្រាប់ព័ត៌មានន្ថែមសូមទំនាក់ទំនង៖ កញ្ញា ទុយ មុនីរ៉េត តាមរយៈទូរស័ព្ទ ៖ ០១៧ ៧២ ៨៨ ៩៥ ៕ អត្ថបទសហការ
ចែករំលែកព័តមាននេះ