រាជធានីភ្នំពេញ ៖ ខណៈប្រជាជនកម្ពុជារួមគ្នាអនុវត្តវិធានការគម្លាតសង្គមដ៏សំខាន់ដើម្បីទប់ស្កាត់ការរីករាលដាលជំងឺកូវីដ-១៩ ក្រុមហ៊ុនប្រតិបត្តិការផ្លាតហ្វមឌីជីថល ធំៗមួយចំនួនក៏រួមដៃគ្នាផងដែរដើម្បីធ្វើឱ្យពេលវេលារក្សាគម្លាតសង្គមនៅផ្ទះរបស់អតិថិជនមានភាពរីករាយថែមទៀតក្នុងអំឡុងពេលវេលាដ៏លំបាកទាំងនេះ ។ នៅជុំវិញពិភពលោក ការរាតត្បាតជំងឺកូវីដ-១៩ បានពន្លឿនការប្រើប្រាស់ដំណោះស្រាយឌីជីថលសម្រាប់កិច្ចការប្រចាំថ្ងៃជាច្រើនដែលកន្លងមកយើងមិនធ្លាប់នឹកឃើញអំពីវាសោះឡើយកាលពីពេលអាចនៅជួបគ្នាផ្ទាល់បាន ។ រាប់ចាប់ពីរឿងសាមញ្ញៗដូចជាការទិញអាហារ ឬបញ្ចូលទឹកប្រាក់ក្នុងទូរស័ព្ទដៃ រហូតដល់មើលភាពយន្ត ឬលេងហ្គេមអនឡាញ ក្រុមហ៊ុនឌីជីថលទាំងនេះកំពុងជួយឱ្យជីវិតរបស់យើងបន្តរស់នៅជាមួយនឹងទិដ្ឋភាពសំខាន់ៗ ខណៈដែលអនុវត្តវិធានការរក្សាគម្លាតសង្គមផងដែរ ។
លោក Tomas Pokorny អគ្គនាយកក្រុមហ៊ុន Pi Pay ដែលជាប្រតិបត្តិករកម្មវិធីទូទាត់ការចំណាយឌីជីថលឈានមុខគេនៅកម្ពុជា និងមានអ្នកប្រើប្រាស់ជាង ៣៥០.០០០ នាក់ បានមានប្រសាសន៍ថា ៖ «មុនពេលមានការរាតត្បាតជំងឺ យើងមានភាពច្បាស់លាស់ថា ភាពជាដៃគូរវាងក្រុមហ៊ុនឌីជីថលដែលកំពុងស្ទុះងើបនានាក្នុងប្រទេសកម្ពុជាកំពុងក្លាយជាគន្លឹះដ៏សំខាន់មួយក្នុងការបម្រើដល់តម្រូវការរបស់អតិថិជន ហើយក្នុងកំឡុងពេលដែលការរាតត្បាតកាន់តែខ្លាំងយើងកាន់តែត្រូវផ្តោតការយកចិត្តទុកដាក់បន្ថែមទៀតដើម្បីគាំទ្រដល់ប្រជាពលរដ្ឋកម្ពុជាដែលកំពុងឆ្លងកាត់ការរឹតបន្តឹងការធ្វើដំណើរ ការធ្លាក់ចុះសេដ្ឋកិច្ច និងការលំបាកផ្សេងៗទៀតជាច្រើន» ។
ក្នុងនាមជាផ្លាតហ្វមទូទាត់ប្រាក់ឌីជីថលដែលត្រូវបានបង្កើតឡើងយូរជាងគេមួយនៅកម្ពុជា ក្រុមហ៊ុន Pi Pay បានកសាងបណ្តាញដៃគូពាណិជ្ជកម្មដ៏ធំមួយ ជាពិសេសជាមួយភោជនីយដ្ឋាន និងហាងកាហ្វេដែលកំពុងមានប្រជាប្រិយភាពនានា ។ ប៉ុន្តែដោយសារការញ៉ាំនៅក្នុងហាងអាចជាកត្តានាំមកនៅហានិភ័យក្នុងការចម្លងមេរោគកូវីដ-១៩ នៅពេលនេះ ក្រុមហ៊ុន Pi Pay រួមជាមួយសេវាដឹកជញ្ជូនអាហារ NHAM24 កំពុងគាំទ្រប្រជាពលរដ្ឋដែលកំពុងរក្សាគម្លាតសង្គមនៅគេហដ្ឋានរបស់ពួកគេឲ្យបានរីករាយនឹងអាហារដែលពួកគេចូលចិត្ត ។
រាល់ការទូទាត់ប្រាក់តាមរយៈ Pi Pay នៅក្នុងកម្មវីធី NHAM24 អតិថិជននឹងទទួលបានការដឹកជញ្ជូនអាហារដោយឥតគិតថ្លៃសម្រាប់ការបញ្ជាទិញណាមួយដែលមានតម្លៃលើសពី ៥ ដុល្លារ និងទទួលបានការបង្វិលប្រាក់ជូនវិញជាប្រាក់រៀល ៥% ចូលក្នុងគណនី Pi Pay របស់ពួកគេ ដែលប្រាក់នេះអាចទុកសម្រាប់ការប្រើប្រាស់នៅពេលទិញទំនិញតាមអនឡាញ និងនៅតាមបណ្តាហាងផ្សេងៗនៅពេលបន្ទាប់ ។
លោក ចាន់ បូរីម៉ា អគ្គនាយកក្រុមហ៊ុន NHAM24 បានមានប្រសាសន៍ថា ៖ «យើងក៏កំពុងកសាងបណ្តាញដៃគូដ៏មានសក្តានុពលដទៃបន្ថែមទៀតដែរ មិនត្រឹមតែក្នុងវិស័យម្ហូបអាហារ និងភេសជ្ជៈប៉ុណ្ណោះទេ ប៉ុន្តែថែមទាំងហាងលក់ទំនិញ ឱសថស្ថាន ហាងផ្កា និងផ្សេងៗទៀត» ។ លោកបន្ថែមថា ៖ «ការភ្ជាប់ជាមួយដៃគូទាំងអស់នេះរួមគ្នាជាមួយការដឹកជញ្ជូនពី NHAM24 និងការទូទាត់បែបឌីជីថលពីក្រុមហ៊ុន Pi Pay នឹងអាចជួយឲ្យប្រជាពលរដ្ឋអាចនៅផ្ទះបានសុខស្រួលជាមួយជម្រើសកាន់ច្រើន និងកាន់តែសុវត្ថិភាព» ។
គ្មានអ្វីសំខាន់ជាងការរក្សាទំនាក់ទំនងជាមួយមិត្តភក្តិ និងក្រុមគ្រួសារនោះទេ ហើយតាមរយៈភាពជាដៃគូរបស់ក្រុមហ៊ុន Pi Pay ជាមួយក្រុមហ៊ុន Smart Axiata អតិថិជនរបស់ក្រុមហ៊ុន Smart អាចរីករាយនឹងការទទួលបានការបង្វិលប្រាក់ជូនវិញចំនួន ៣០% រាល់ពេលដែលពួកគេបញ្ជូលទឹកប្រាក់ទូរស័ព្ទរបស់ពួកគេដោយប្រើប្រាស់កម្មវិធី Pi Pay ដែលផ្តល់ឱ្យពួកគេនូវពេលវេលាបន្ថែមទៀតសម្រាប់ការជជែកគ្នាតាមអនឡាញ ឬលេងកម្មវិធីបណ្តាញទំនាក់ទំនងសង្គមដែលពួកគេចូលចិត្តផ្សេងទៀតដូចជា Facebook ឬ Instagram ជាដើម ។ សម្រាប់អ្នកលេងហ្គេមតាមឧបករណ៍ចល័តវិញ ក៏មានការផ្តល់ជូនផងដែរ ហើយក្រុមហ៊ុន Pi Pay បានចាប់ដៃគូជាមួយគេហទំព័រហ្គេម Codashop សម្រាប់ការផ្តល់ជូននូវការបង្វិលប្រាក់ជូនវិញចំនួន ១៥% នៅរៀងរាល់ថ្ងៃពុធ នៅពេលទិញក្រេឌីតលេងហ្គេមល្បីៗដូចជា Mobile Legends, PUBG Mobile, Free Fire, Rules of Survival និងហ្គេមផ្សេងៗទៀត ។
លោក Theparath Laohavoravudhikul ប្រធានប្រចាំតំបន់ផ្នែកការទូទាត់ចំណាយរបស់ក្រុមហ៊ុន Codashop បានថ្លែងថា ៖ «យើងបានមើលឃើញថា ការលេងហ្គេមនៅកម្ពុជាមានប្រជាប្រិយភាពខ្លាំង ហើយប្រហែលកាន់តែមានប្រជាប្រិយភាពថែមទៀតក្នុងអំឡុងពេលរាតត្បាតជំងឺនេះ ហើយការបង្វិលប្រាក់ជូនវិញនេះដែលធ្វើឡើងតាមរយៈដៃគូរបស់យើងគឺក្រុមហ៊ុន Pi Pay នឹងមានភាពទាក់ទាញខ្លាំងចំពោះអ្នកចូលចិត្តលេងហ្គេមទាំងអស់ ពិសេសអ្នកលេងហ្គេមពូកែៗ ប្រាកដជាចង់ចាប់ឱកាសនេះមិនខាន» ។
លោក Tomas Pokorny អគ្គនាយកក្រុមហ៊ុន Pi Pay បានថ្លែងថា ៖ «ភាពជាដៃគូសំខាន់មួយរបស់យើងនៅពេលយើងបានចាប់ផ្តើមក្រុមហ៊ុន Pi Pay កាលពីប៉ុន្មានឆ្នាំមុន ពិតណាស់គឺជាមួយធនាគារ ABA ដែលជាធនាគារនាំមុខគេខាងផ្នែកឌីជីថល ។ ចរន្តនៃផ្ទេរប្រាក់ដោយសេរីរវាងគណនីរធនាគារ ABA និងគណនី Pi Payនៅតែមានជាបន្តបន្ទាប់បានបង្ហាញពីភាពជាដៃគូនេះមានសារៈសំខាន់យ៉ាងណា បើទោះជាមានទស្សនៈមើលមកថាយើងអាចជាដៃគូប្រកួតប្រជែង ប៉ុន្តែនៅក្នុងយុគសម័យឌីជីថល យើងក៏ជាដៃគូនឹងគ្នាផងដែរ ។ យើងកំពុងបង្កើតភាពជាដៃគូថ្មីៗនៅគ្រប់ពេល ហើយយើងនឹងរក្សាការជូនដំណឹងដល់អតិថិជនអំពីអ្វីថ្មីៗដែលយើងអាចគាំទ្រដល់ពួកគេ ខណៈដែលកំពុងប្រយុទ្ធប្រឆាំងរួមគ្នាដើម្បីជម្នះជំងឺមរណៈនេះ» ៕
អំពីក្រុមហ៊ុន Pi Pay
ចាប់តាំងពីបង្កើតឡើងក្នុងឆ្នាំ ២០១៧ ក្រុមហ៊ុន Pi Pay បានអភិវឌ្ឍខ្លួនយ៉ាងឆាប់រហ័សក្លាយជាផ្លាតហ្វមទូទាត់អេឡិចត្រូនិចឈានមុខគេក្នុងប្រទេសកម្ពុជា ដោយមានការពង្រីកបណ្តាញដៃគូពាណិជ្ជកម្ម និងហិរញ្ញវត្ថុយ៉ាងច្រើន រួមទាំងក្រុមហ៊ុនលំដាប់ពិភពលោកនានាផងដែរដូចជា ក្រុមហ៊ុន Alipay ក្រុមហ៊ុន WeChat Pay និងក្រុមហ៊ុន UnionPay ។
ត្រូវបានបង្កើតឡើងជាកម្មវិធីសម្រាប់អ្នកប្រើប្រាស់ ដែលរួមបញ្ចូលសេវាទូទាត់ការចំណាយ និងសេវាផ្ទេរប្រាក់រួមជាមួយនឹងមុខងារផ្នែកសង្គម និងបែបកម្សាន្តជាច្រើនដូចជាមុខងារជជែកកម្សាន្ត និងមុខងារស្វែងរកមិត្តភក្តិ ក្រុមហ៊ុន Pi Pay មានបំណងផ្លាស់ប្តូរមុខមាត់វិស័យបច្ចេកវិទ្យាហិរញ្ញវត្ថុរបស់កម្ពុជាជាមួយនឹងបច្ចេកវិទ្យា និងហេដ្ឋារចនាសម្ព័ន្ធទូទាត់ការចំណាយលំដាប់ពិភពលោករបស់ខ្លួន ។
រហូតមកដល់ពេលនេះ កម្មវិធី Pi Pay មានអ្នកប្រើប្រាស់ជាង ៣៥០.០០០ នាក់ មានប្រតិបត្តិការជាង ៤០០ លានដុល្លារ និងសហការជាមួយទីតាំងអាជីវកម្មជាង ៤.៥០០ កន្លែងនៅទូទាំងប្រទេសកម្ពុជា ។ ជាមួយនឹងកំណើនមូលដ្ឋានដ៏រឹងមាំនៅទូទាំងព្រះរាជាណាចក្រកម្ពុជា កម្មវិធី Pi Pay កំពុងបង្ហាញរបៀបដែលបច្ចេកវិទ្យាទូទាត់ប្រាក់តាមអេឡិចត្រូនិចអាចនាំមកនូវភាពងាយស្រួល និងដំណោះស្រាយពិតប្រាកដដល់ទាំងមនុស្ស និងអាជីវកម្ម ។
ដោយធ្វើការងារយ៉ាងជិតស្និទជាមួយធនាគារជាតិនៃកម្ពុជា ស្ថាប័នហិរញ្ញវត្ថុ និងក្រុមហ៊ុនបច្ចេកវិទ្យាឈានមុខគ្នានានា ក្រុមហ៊ុន Pi Pay ព្យាយាមយ៉ាងខ្លាំងក្នុងការបញ្ចេញលទ្ធភាពគ្មានដែនកំណត់នានាក្នុងការអភិវឌ្ឍវិស័យបច្ចេកវិទ្យាហិរញ្ញវត្ថុរបស់កម្ពុជាតាមមធ្យោបាយដែលមានសុវត្ថិភាព សន្តិសុខ និងមានអត្ថប្រយោជន៍ដល់កំណើនរបស់ប្រទេសជាតិ ៕ ដោយសហការ
ចែករំលែកព័តមាននេះ